குறை கேட்கச் சென்றபோது தவறி சாக்கடையில் விழுந்த பாஜக பெண் எம்.பி... மருத்துவமனையில் அனுமதி
ஆமதாபாத்: குஜராத் மாநில பாஜக எம்.பி.யான பூனம்பென், தனது தொகுதி குடிசை வாழ் மக்களிடம் குறை கேட்டுக் கொண்டிருந்தபோது எதிர்பாராதவிதமாக அவர் நின்றிருந்த சிலாப் இடிந்து சாக்கடையில் விழுந்தார். இதில், பலத்த காயமடைந்த அவர் சிகிச்சைக்காக மருத்துவமனையில் அனுமதிக்கப்பட்டுள்ளார்.
குஜராத் மாநிலம் ஜாம்நகர் சிட்டி தொகுதி பாஜக எம்.பி. பூனம் பென். இவர் இன்று தன்னுடைய தொகுதிக்கு உட்பட்ட ஜலராம் பகுதியில் உள்ள குடிசைகளைப் பார்வையிடச் சென்றார். அப்போது சட்டவிரோதமாக கட்டப்பட்ட கட்டிடங்கள் இடிக்கப்பட்டதைத் தொடர்ந்து, தங்களுக்கு உதவி செய்ய வேண்டும் என பூனம் பென்னிடம் அப்பகுதி மக்கள் கோரிக்கை விடுத்தனர்.
இது தொடர்பாக அப்பகுதி மக்களிடம் அவர் பேசிக் கொண்டிருந்தபோது, எதிர்பாராதவிதமாக அவர் நின்றிருந்த சிலாப் இடிந்து விழுந்தது. இதில், சுமார் 10 அடி ஆழமுள்ள சாக்கடையில் பூனமும், அவருடன் வந்திருந்த சில அதிகாரிகள் மற்றும் தொண்டர்கள் விழுந்தனர்.
இதில், பூனமுக்கு தலை, கை மற்றும் கால் பகுதிகளில் பலத்த காயம் ஏற்பட்டது. உடனடியாக பூனம் உட்பட சாக்கடையில் விழுந்த அனைவரையும் மீட்ட அப்பகுதி மக்கள், அவர்களை அருகில் இருந்த மருத்துவமனையில் சிகிச்சைக்காகச் சேர்த்துள்ளனர்.
இந்த சம்பவம் தொடர்பான வீடியோ தற்போது இணையத்தில் வைரலாகப் பரவி வருகிறது.
Click it and Unblock the Notifications
Sign in with Google