சட்டென சரிந்த போர் விமானம்.. பைலட் பரிதாபமாக உயிரிழப்பு! என்ன நடந்தது

Updated: Wednesday, July 9, 2025, 23:59 [IST]

Subscribe to Oneindia Tamil

ஜெய்ப்பூர்: ராஜஸ்தான் மாநிலம் சுரு என்ற பகுதியில் இந்திய விமானப்படைக்குச் சொந்தமான போர் விமானம் விபத்திற்குள்ளானது. இதில் விமானத்தை இயக்கிய பைலட்கள் இருவருமே உயிரிழந்ததாகத் தெரிவிக்கப்பட்டுள்ளது. அவர்கள் ஜாகுவார் பயிற்சி விமானத்தை இயக்கிய போதே இந்த விபத்து ஏற்பட்டதாகத் தெரிவிக்கப்பட்டுள்ளது.

இந்தியா பாகிஸ்தான் மோதலுக்குப் பிறகு எல்லைப் பகுதிகளில் பாதுகாப்பு பலப்படுத்தப்பட்டுள்ளது. தீவிர ரோந்துப் பணிகளும் மேற்கொள்ளப்பட்டு வருகிறது. இதற்கிடையே ராஜஸ்தானின் சுரு என்ற பகுதியில் இந்திய விமானப்படைக்குச் சொந்தமான விமானம் வழக்கமான ரோந்துப் பணிகளில் ஈடுபட்டு இருந்தது. அப்போது விமானம் எதிர்பாராத விதமாக விபத்தில் சிக்கியது.

இதில் விமானத்தை இயக்கிய பைலட்கள் இருவருமே பரிதாபமாக உயிரிழந்தனர். அவர்கள் ஜாகுவார் பயிற்சி விமானத்தை இயக்கிய போதே இந்த விபத்து ஏற்பட்டதாகத் தெரிவிக்கப்பட்டுள்ளது. இந்த விபத்து பானுடா கிராமத்தில் மதியம் 12.30 மணியளவில் நடந்ததாகக் கூறப்படுகிறது. இந்த இடம் இந்தியா பாகிஸ்தான் எல்லையில் இருந்து வெறும் 250 கிமீ தொலைவில் அமைந்துள்ளது.

இருவரும் விபத்தில் படுகாயம் அடைந்த நிலையில், இதனால் உயிரிழந்தனர். அவர்கள் தாழ்வான தூரத்தில் விமானத்தை இயக்கிய போது விபத்து நிகழ்ந்ததாக விமானப்படை சார்பில் தெரிவிக்கப்பட்டுள்ளது. அதேநேரம் உயிரிழந்தோரின் பெயர் உள்ளிட்ட இதர விவரங்கள் வெளியிடப்படவில்லை. இந்த விபத்தால் வேறு யாருக்கும் எந்தவொரு பாதிப்பும் ஏற்படவில்லை என்பதை ராணுவம் உறுதி செய்துள்ளது.

வானில் பயங்கரச் சத்தம் கேட்டதாகவும், அதனைத் தொடர்ந்து வயல்வெளிகளில் இருந்து தீயும், புகையும் எழுந்ததாகவும் கிராம மக்கள் தெரிவித்துள்ளனர். தெரிவித்தனர். உடனடியாக போலீசார் மற்றும் அதிகாரிகள் சம்பவ இடத்திற்கு விரைந்தன. விபத்தில் சிக்கிய விமானத்தின் அருகேயே விமானியின் உடல் மீட்கப்பட்டது. ராணுவம் உடலை அடையாளம் காணும் பணியில் ஈடுபட்டுள்ளது.

விபத்து குறித்த செய்தி பரவியதும், ரத்தன்கர் பகுதியில் பரபரப்பு ஏற்பட்டது. மாவட்ட ஆட்சியர் அபிஷேக் சுரானா மற்றும் உள்ளூர் காவல்துறை அதிகாரிகள் சம்பவ இடத்திற்கு விரைந்துள்ளனர். கிராம மக்கள் விபத்து நடந்த இடத்தில் தீயை அணைக்க முயற்சிகள் மேற்கொண்டனர். இந்த விபத்துக்கான காரணம் குறித்து இதுவரை ராணுவம் எந்தவொரு தகவலையும் பகிரவில்லை.