நடுவானில் கோளாறு... அவசர தரையிறக்கம்... விமானத்தில் சென்ற 139 பேரின் கதி?

Updated: Saturday, November 27, 2021, 16:22 [IST]

Subscribe to Oneindia Tamil

நாக்பூர் : பெங்களூருவில் இருந்து பாட்னா சென்றுகொண்டிருந்த விமானத்தில் திடீர் கோளாறு ஏற்பட்டதால் அவசர அவசரமாக நாக்பூர் விமான நிலையத்தில் தரையிறக்கப்பட்டது.

கோ பர்ஸ்ட் நிறுவனத்துக்கு சொந்தமான விமானத்தில் என்ஜினில் கோளாறு ஏற்பட்டதால் விமானி சமயோசிதமாக விமானத்தை தரையிறக்கினார்.

விமானத்தில் பயணம் செய்த பயணிகள் உள்பட 139 பேரும் பாதுகாப்புடன் வெளியேற்றப்பட்டனர்.

கோ பர்ஸ்ட் விமானம் ஜி8 873

கோ பர்ஸ்ட் நிறுவனத்துக்கு சொந்தமான G8 873 விமானம், விமானிகள், பணிப்பெண்கள், பயணிகள் என 139 பேருடன் பெங்களூரு விமான நிலையத்தில் இருந்து பாட்னா விமான நிலையத்திற்கு சென்று கொண்டிருந்தது.

நடுவானில் என்ஜின் பழுது

விமானம் பெங்களூருவில் இருந்து பாட்னா நோக்கி சென்றுகொண்டிருந்தபோது நடுவானில் என்ஜினில் திடீரென கோளாறு ஏற்பட்டதாக தெரிகிறது. கோளாறு காரணமாக என்ஜினில் தீப்பிடித்தால் என்ன செய்வது என யோசித்த விமானிகள் செய்வதறியாது தவித்தனர். பின்னர் விமானத்தின் கேப்டன் சமயோசிதமாக யோசித்து முடிந்தவரை மேலாண்மை செய்து விமானத்தை வேறு ஒரு இடத்தில் தரையிறக்க முயற்சி செய்தார்.

விமானம் தரையிறக்கம்

பின்னர் நாக்பூர் விமான நிலையத்திற்கு தகவல் தெரிவிக்கப்பட்டது. அதன்படி நாக்பூர் விமான நிலைய அதிகாரிகள் அனுமதி அளித்தனர். பின்னர் கோ பர்ஸ்ட் விமானம் நாக்பூர் விமான நிலையத்தில் காலை 11.15 மணியளவில் பத்திரமாக தரையிறக்கப்பட்டது. இது குறித்து தகவல்கள் முன்னரே வெளியானதால் தீயணைப்பு வாகனங்கள், ஆம்புலன்ஸ்கள், மருத்துவக் குழு தயார் நிலையில் இருந்தன.

தீயணைப்பு வீரர்கள் தயார்

இதுகுறித்து நாக்பூர் விமான நிலைய இயக்குனர் அபிட். ரூஹி தெரிவிக்கையில் காலை 11 மணியளவில் கோ பர்ஸ்ட் விமானத்தில் கோளாறு ஏற்பட்டுள்ளதாகவும் அதை அவசரமாக தரையிறக்க அனுமதி வேண்டும் என்றும் விமானிகள் கோரிக்கை விடுத்தனர். பின்னர் காலை 11.15 மணியளவில் விமானம் நாக்பூர் விமான நிலையத்தில் பாதுகாப்பாக தரையிறக்கப்பட்டது. அனைத்து பயணிகளும் பத்திரமாக இறக்கிவிடப்பட்டு அவர்களுக்கு தேவையான வசதிகள் செய்து கொடுக்கப்பட்டன. அவசர நிலை அறிவிக்கப்பட்டு ஓடுபாதையில், தீயணைப்பு வாகனங்கள், மருத்துவர்கள், ஆம்புலன்ஸ்கள் மற்றும் காவல்துறையின் ஒருங்கிணைப்போடு அனைத்து ஏற்பாடுகளையும் நாங்கள் செய்திருந்ததோம்.

வேறு விமானம்

மேலும் பாட்னா செல்லவேண்டிய பயணிகளுக்கு மாலை 4.45 மணிக்கு மாற்று விமானம் ஏற்பாடு செய்யப்பட்டுள்ளதாகவும் அவர் குறிப்பிட்டார். இதற்கிடையே கோ பர்ஸ்ட் விமானத்தில் ஏற்பட்ட கோளாறை பொறியியல் குழுவினர் சரி செய்து வருகின்றனர்.