''இன்னும் 5-6 மாதங்களில் அரசு எங்கள் கோரிக்கையை ஏற்கும்''.. விவசாய சங்க தலைவர் நம்பிக்கை!

Published: Sunday, April 4, 2021, 17:04 [IST]

Subscribe to Oneindia Tamil

ஜெய்ப்பூர்: வேளாண் சட்டம் தொடர்பாக அடுத்த 5 அல்லது 6 மாதங்களில் மத்திய அரசு எங்கள் கோரிக்கைகளை ஏற்றுக் கொள்ளும் என்று நம்புவதாக விவசாய சங்க தலைவர் ராகேஷ் திகைத் தெரிவித்தார்.

வேளாண் சட்டம் தொடர்பாக குஜராத் விவசாயிகளை சந்தித்து விளக்கம் அளிக்க உள்ளதாகவும் ராகேஷ் திகைத் கூறினார்.

விவசாயிகளின் தீர்க்கமான போராட்டம்

மத்திய அரசின் வேளாண் சட்டத்தை கண்டித்து தலைநகர் டெல்லியில் பஞ்சாப், ஹரியானா, உத்தரபிரதேசம் ஆகிய மாநிலங்களை சேர்ந்த விவசாயிகள் 120 நாட்களுக்கும் மேலாக தொடர்ந்து போராட்டம் நடத்தி வருகின்றனர். மத்திய அரசு விவசாயிகளுடன் பலகட்ட பேச்சுவார்த்தை நடத்தி விட்டது. ஆனால் இதில் எதிலும் நல்ல முடிவு கிடைக்கவில்லை.

திசைமாறிய டிராக்டர் பேரணி

இதற்கிடையே குடியரசு தினம் அன்று நடைபெற்ற டிராக்டர் பேரணி திசைமாறி வன்முறையாக வெடித்தது. போராட்டக்காரர்கள் கூட்டத்தில் விஷமிகள் புகுந்ததால் போலீசார் தடியடி நடத்தினார்கள். பலர் டெல்லி செங்கோட்டையை சென்று அங்கு காலிஸ்தான் கொடிகளை ஏற்றியதாகவும் குற்றம்சாட்டப்படுகிறது. இதனால் சில விவசாய சங்கங்கள் போராட்டத்தில் இருந்து விலகின. ஆனாலும் விவசாயிகள் மனம் தளராமல் தொடர்ந்து டெல்லியின் பல எல்லைகளில் தொடர்ந்து போராட்டம் நடத்தி வருகின்றனர்.

போராட்டம் தொடரும்

மூன்று வேளாண் சட்டங்களை தற்காலிகமாக ஒன்றரை வருடங்களுக்கு நிறுத்தி வைப்பதாகவும், அதன்பிறகு குழு அமைத்து நல்ல முடிவுக்கு வரலாம் என்று மத்திய அரசு கூறுகிறது. ஆனால் இதை ஏற்க மறுத்துள்ள விவசாயிகள், 120 நாட்களுக்கும் மேலாக போராடி வருகின்றனர். கடந்த ஒரு வாரத்துக்கு முன்பு நாடு தழுவிய போராட்டமும் நடத்தினார்கள். அசாமில், மேற்கு வங்கத்தில் சட்டசபை தேர்தல் நடந்து வருவதால் அங்கு சென்ற விவசாயிகள் பா.ஜ.கவுக்கு எதிராக தீவிர பிரசாரம் மேற்கொண்டனர்.

அரசு எங்கள் கோரிக்கையை ஏற்கும்

அவ்வப்போது விவசாயிகள் ஒன்று திரண்டு மகா பஞ்சாயத்தும் நடத்தி வருகின்றனர். இந்த நிலையில் ராஜஸ்தானில் நிருபர்களிடம் பேசிய பாரதிய கிஷான் யூனியன் சங்க தலைவர் ராகேஷ் திகைத் கூறியதாவது:- வேளாண் சட்டம் தொடர்பாக குஜராத் விவசாயிகளை சந்தித்து விளக்கம் அளிக்க உள்ளோம். பர்தோலி மற்றும் சபர்மதிக்கும் செல்ல உள்ளோம். அடுத்த 5 அல்லது 6 மாதங்களில் மத்திய அரசு எங்கள் கோரிக்கைகளை ஏற்றுக் கொள்ளும் நம்புகிறோம்' என்று ராகேஷ் திகைத் கூறினார்.

Published On April 4, 2021