புதிய தலைமை தேர்தல் ஆணையராக ஞானேஷ்குமார் அறிவிப்பு! யார் இவர்? முழு விவரம்

டெல்லி: இந்திய தேர்தல் ஆணையத்தின் தலைமை தேர்தல் ஆணையராக இருந்த ராஜீவ் குமாரின் பதவிக்காலம் முடிவடைவதால், புதிய தலைமை ஆணையராக ஞானேஷ்குமார் அறிவிக்கப்பட்டிருக்கிறார்.

ஜம்மு காஷ்மீரில் சிறப்பு சட்டப்பிரிவு 370-ஐ நீக்கம் செய்வது தொடர்பான மசோதாவை வரைவு செய்ததிலும், அயோத்தி கோயில் தொடர்பான உச்சநீதிமன்ற வழக்குகளில் ஆவணங்களை கையாண்டதிலும் இவர் முக்கிய பங்கு வகித்திருக்கிறார்.

61 வயதான ஞானேஷ்குமார், ஏற்கெனவெ மத்திய உள்துறை அமைச்சகத்தில் பணியாற்றிய அனுபவத்தை பெற்றிருக்கிறார். 1988ம் ஆண்டு கேரளா ஐஏஎஸ் பேட்சை சேர்ந்தவராவார். சமீபத்தில் இவர் உள்துறை அமைச்சகத்தில் இணைச் செயலாளர் (காஷ்மீர் பிரிவு) பதவியை வகித்திருந்தார். அமிதஷாவுக்கு நெருக்கமானவராக அறியப்படும் இவர், அமித்ஷா தலைமையிலான கூட்டுறவு அமைச்சகத்தின் செயலாளராகவும் இருந்திருக்கிறார். தவிர, நாடாளுமன்ற விவகாரத்துறை அமைச்சகத்தில் செயலாளராகவும், காங்கிரஸ் ஆட்சியில் பாதுகாப்புத்துறையிலும் பணியாற்றிய அனுபவம் கொண்டிருக்கிறார்.

கல்வியை பொறுத்த அளவில், கான்பூரில் உள்ள இந்திய பொறியியல் நிறுவனத்தில் சிவில் பொறியியலில் பி.டெக் பட்டம் பெற்றுள்ளார். இந்திய பட்டய நிதி ஆய்வாளர்கள் நிறுவனத்தில் வணிக நிதி படிப்படையும், ஹார்வர்ட் பல்கலைக்கழகத்தில் சுற்றுச்சூழல் பொருளாதாரம் ஆகியவற்றையும் பயின்றிருக்கிறார்.

இவர் பொறுப்பேற்று இந்த ஆண்டு பீகாரில் நடைபெற உள்ள சட்டமன்ற தேர்தல், அடுத்த ஆண்டு தமிழ்நாடு, கேரளா, புதுச்சேரி, அசாம், மேற்கு வங்கம் உள்ளிட்ட மாநிலங்களின் சட்டமன்ற தேர்தல்களையும் நடத்துவார். மட்டுமல்லாது 2027ம் ஆண்டு நடைபெற உள்ள குஜராத், இமாச்சலப் பிரதேசம், உத்தரப் பிரதேசம், பஞ்சாப், மணிப்பூர், கோவா உள்ளிட்ட சட்டமன்றங்களுக்கான தேர்தலையும், 2029ம் ஆண்டு நாடாளுமன்ற தேர்தலையும் நடத்துவார்.

சுருக்கமாக சொல்வதெனில் இவர் 20 சட்டமன்ற தேர்தல்களையும், 2027ம் ஆண்டு நடைபெறும் குடியரசுத் தலைவர், துணை குடியரசுத் தலைவர் தேர்தலையும் 2029 நாடாளுமன்ற தேர்தல்களையும் நடத்தி முடித்து 2029ம் ஆண்டு ஜனவரி 29ம் தேதி ஓய்வு பெறுவார். இவர் 2029ம் ஆண்டு தொடக்கத்திலேயே ஓய்வு பெறுவதால் அந்த ஆண்டு நாடாளுமன்ற தேர்தலுக்கான தயாரிப்பு பணிகளை மட்டுமே இவர் செய்வார் என்றும் சொல்லப்படுகிறது.

English summary

With the tenure of Rajiv Kumar as the Chief Election Commissioner of India coming to an end, Gyanesh Kumar has been announced as the new Chief Election Commissioner. He played a key role in drafting the bill for the removal of Article 370 in Jammu and Kashmir and handling documents related to the Ayodhya temple cases in the Supreme Court.