எப்போதுமே "இந்தியன்" தான்! 9 ஆண்டு ஜெர்மனி வாழ்க்கை.. இந்திய குடியுரிமையை துறக்க மறுத்த தொழிலதிபர்

பெர்லின்: கடந்த 9+ ஆண்டுகளாக ஜெர்மனியில் வசிக்கும் ஒருவர், இதுவரை ஜெர்மனி குடியுரிமை கோரி விண்ணப்பிக்கவில்லையாம். இத்தனை ஆண்டுகள் ஜெர்மனியில் வசித்தாலும் ஒருபோதும் ஜெர்மனி நாட்டவராக உணரவில்லை என்றும் தான் இந்தியராகவே உணர்வதாகவும் தெரிவித்துள்ளார். இதன் காரணமாகவே ஜெர்மனி குடியுரிமைக்குத் தகுதி பெற்றாலும் விண்ணப்பிக்கவில்லை என அவர் தெரிவித்துள்ளார்.

இந்தியாவில் இருந்து வெளிநாடுகளுக்கு, குறிப்பாக மேற்குலக நாடுகளுக்கு, செல்லும் பலரும் அங்கேயே செட்டிலாகவே விரும்புவார்கள். குறிப்பிட்ட ஆண்டுகள் அங்கு வசித்தால் குடியுரிமை பெற முடியும் என்பதால் அப்படிக் குடியுரிமை பெறவே விரும்புவார்கள். இருப்பினும், பல ஆண்டுகளாக அப்படி வெளிநாட்டில் வசிக்கும் நபர் ஒருவர் நேர் எதிரான நிலைப்பாட்டை எடுத்திருக்கிறார். இது தொடர்பாக அவரது போஸ்ட் இணையத்தில் டிரெண்டாகி வருகிறது.

பிரபலத் தொழிலதிபர்

ஜெர்மனி நாட்டில் வசித்து வரும் ஆய்வாளர் மயுக் மஞ்ஜா.. இவர் அங்குச் சுமார் 10 ஆண்டுகளாக வசித்து வருகிறார். முனைவர் பட்ட ஆய்வுக்காக ஜெர்மனிக்குச் சென்று இவர், பின்னர் அங்கேயே ஒரு ஏஐ நிறுவனத்தையும் தொடங்கினார். 10 ஆண்டுகளாக இவர் அங்கு வசிக்கும் நிலையில், ஜெர்மனி குடியுரிமைக்கு இவர் தகுதி பெற்றவராக மாறிவிட்டார். இருந்த போதிலும், அவர் ஜெர்மன் குடியுரிமை கோரி விண்ணப்பிக்கவில்லையாம். இந்தியா உடனான பிணைப்பு மற்றும் தேச அடையாளம் ஆகியவையே இந்த முடிவுக்குக் காரணம் என அவர் குறிப்பிடுகிறார்.

இது தொடர்பாக அவர் தனது ட்விட்டர் பக்கத்தில், "நான் ஜெர்மனி நாட்டில் 9+ ஆண்டுகளாக வசித்து வருகிறேன். ஓராண்டிற்கு முன்பே ஜெர்மனி பாஸ்போர்ட் கோரி விண்ணப்பிக்க நான் தகுதி பெற்றுவிட்டேன். என்னால் ஓராண்டிற்கு முன்பே குடியுரிமை பெற்றிருக்க முடியும். ஆனாலும், நான் அதை வாங்கவில்லை. இது குறித்து நீண்ட காலம் யோசித்தேன்.. அதன் பிறகே என்னால் ஜெர்மன் குடிமகனாக மாற முடியாது.. எனவே, ஜெர்மனி குடியுரிமை வேண்டாம் என முடிவெடுத்தேன்.

ஜெர்மனி

நான் என்னை ஜெர்மன் நாட்டவராக உணரவில்லை. இது (குடியுரிமை என்பது) வெறுமன ஆவணம் மட்டுமே என்பது புரிகிறது. ஆனாலும் நான் ஒரு இந்தியன். ஜெர்மன் குடியுரிமை பெறுவது விசித்திரமாகத் தோன்றும்.. ஜெர்மன் வரலாறு, மொழி, கலாச்சாரத்துடன் என்னால் ஒன்றிப்போக முடியவில்லை. என்னால் அதைப் புரிந்து கொள்ள முடிகிறது.. ஆனால், அதை உணர்வது ஒன்றிப்போக முடியவில்லை.

பெர்லினில் உள்ள சர்வதேச மற்றும் அறிவியல் ஆய்வாளர்களிடையே எளிதில் பேசவும் கலந்துரையாடவும் முடிகிறது. ஆனால், உள்ளூர் சமூகத்துடன் முழுமையாக ஒன்றிணைய முடியவில்லை.. உதாரணத்திற்கு ஜெர்மனி கால்பந்து போட்டியில் தோற்றாலும், வென்றாலும் நான் எதையும் உணருவதில்லை. அதேநேரம் இந்தியாவின் உலகக் கோப்பை வெற்றி என்னை உற்சாகத்தில் ஆழ்த்தும். அது எப்போதும் அப்படித்தான் இருக்கும்.

முக்கியமானது

நான் என்னை ஜெர்மனியின் நண்பனாகப் பார்க்கிறேன்.. ஆனால் அதன் ஒரு பகுதியாக ஒருபோதும் பார்க்கவில்லை.. இது ஒரு நுட்பமான அதேநேரம் முக்கியமான வேறுபாடு.. இதில் முக்கியமான விஷயம் என்னவென்றால் நான் ஜெர்மனி குடியுரிமை பெற்றால், இந்த நாட்டின் லட்சியங்கள், மதிப்புகளுக்கு ஏற்ப நான் மாற வேண்டும். அப்படிச் செய்வது தான் சரியாக இருக்கும். பல நூற்றாண்டு (ஜெர்மனி) கலாச்சாரம் எனக்கு ஏற்ப மாற்ற வேண்டும் என நான் நினைக்கவில்லை. ஆனால், நான் அதற்கேற்ப மாறுவது சரியாக இருக்கும் என்றும் தோன்றவில்லை.

எப்போதும் இந்தியர்

அதேநேரம் இதற்கு மாறாக இந்தியாவில் அப்படி இல்லை. அங்கு என்னுடைய கருத்துக்கள் பெரும்பான்மையான மக்களுடன் ஒத்துப்போகாவிட்டாலும், என் நிலைப்பாட்டில் உறுதியாக நிற்கவும், நான் உணர்வதைச் சொல்லும் உரிமையும் எனக்கு இருப்பதாக என்று நினைக்கிறேன். நான் இந்தியாவின் ஒரு பகுதி. என்னுடைய கருத்துக்கள் வரையறையின்படி இந்தியக் கருத்துக்கள். உங்களுக்கு அவை பிடிக்காமல் இருக்கலாம். இந்திய பாஸ்போர்ட் எனக்கு அந்த உரிமையைப் பெறத் தருகிறது. அது எனக்கு ரொம்வே முக்கியமானது" எனப் பதிவிட்டுள்ளார்.

ஜெர்மனி நாடு இரட்டைக் குடியுரிமையை அனுமதிக்கிறது. அதாவது வேறு ஒரு நாட்டில் குடியுரிமை பெற்ற ஒருவர், அதை இழக்காமல் ஜெர்மனி நாட்டிலும் குடியுரிமையைப் பெற முடியும். இருப்பினும், இந்தியாவில் இரட்டைக் குடியுரிமைக்கு அனுமதி இல்லை. எனவே, மயுக் ஜெர்மனி குடியுரிமையைப் பெற விரும்பினால் அதற்கு இந்தியக் குடியுரிமையை அவர் துறந்தே தீர வேண்டும் என்பது குறிப்பிடத்தக்கது.

English summary

After 9+ years in Germany, Indian AI founder Mayukh Panja rejects citizenship eligibility (ஜெர்மனி குடியுரிமையை நிராகரித்த இந்தியர்): Indians living in Germany latest news in tamil.