உபி சட்டசபைத் தேர்தல் 2022: இன்று இறுதிக்கட்ட வாக்குப்பதிவு - களத்தில் 613 வேட்பாளர்கள்

உத்தரப்பிரதேச மாநில சட்டசபைக்கான 7 வது மற்றும் இறுதிக்கட்ட வாக்குப்பதிவு இன்று நடைபெறுகிறது. 2 கோடிக்கும் மேற்பட்ட வாக்காளர்கள் வாக்களிக்க உள்ளனர்.

லக்னௌ: உத்தரப்பிரதேச மாநில சட்டசபைக்கான 7 வது மற்றும் இறுதிக்கட்ட வாக்குப்பதிவு இன்று நடைபெறுகிறது. 54 தொகுதிகளுக்கு நடைபெறும் வாக்குப்பதிவு காலை 7 மணிக்குத் தொடங்கி மாலை 6 மணிக்கு முடிவடைகிறது. இன்றைய தினம் 613 வேட்பாளர்கள் களத்தில் உள்ளனர். 2 கோடியே 6 லட்சம் வாக்காளர்கள் வாக்களிக்க உள்ளனர்.

உத்தரப்பிரதேசம், பஞ்சாப், மணிப்பூர், உத்தராகண்ட், கோவா ஆகிய 5 மாநில சட்டசபைத் தேர்தல் கடந்த பிப்ரவரி மாதம் முதல் நடைபெற்று வருகிறது. இதில், பஞ்சாப், உத்தராகண்ட், கோவா மாநிலங்களில் ஒரே கட்டமாகவும், மணிப்பூரில் இரண்டு கட்டங்களாகவும் வாக்குப்பதிவு நடந்து முடிந்துள்ளன.

403 தொகுதிகள் கொண்ட உத்தரபிரதேச மாநில சட்ட சபைக்கு 7 கட்டங்களாக தேர்தல் நடத்தப்படும் என்று அறிவிக்கப்பட்டது.

உ.பி மாநில சட்டசபைத் தேர்தல்

அதன்படி முதல் கட்ட வாக்குப்பதிவு பிப்ரவரி 10ஆம் தேதி நடந்தது. 2வது கட்ட ஓட்டுப்பதிவு 14ஆம் தேதியும், 3 வது கட்டம் ஓட்டுப்பதிவு 20ஆம் தேதியும், 4வது கட்டம் 23ஆம் தேதியும், 5 வது கட்டம் 27ஆம் தேதியும், 6 வது கட்டம் மார்ச் 3ஆம் தேதியும் நடந்து முடிந்தது. இதுவரை 349 தொகுதிகளுக்கு தேர்தல் நடந்து முடிந்து உள்ளது.

7ஆம் கட்ட வாக்குப்பதிவு

பூர்வாஞ்சல் பகுதியில் உள்ள 9 மாவட்டங்களுக்கு உட்பட்ட 54 தொகுதிகளுக்கு இன்றைய தினம் வாக்குப்பதிவு நடைபெறுகிறது. இதில், 613 வேட்பாளர்கள் களத்தில் உள்ளனர். 2 கோடியே 6 லட்சம் வாக்காளர்கள் வாக்களிக்க உள்ளனர். காலை 7 மணிக்கு தொடங்கும் வாக்குப்பதிவு, மாலை 6 மணிவரை நடைபெறுகிறது.

நக்சல்கள் ஆதிக்கம்

நக்சல்கள் ஆதிக்கம் உள்ள சாகியா, ராபர்ட்கஞ்ச், துத்தி ஆகிய தொகுதிகளில் மாலை 4 மணியுடன் வாக்குப்பதிவு நிறுத்தப்படும். மற்ற தொகுதிகளில் 6 மணி வரை வாக்குப்பதிவு நடத்தப்படும் என்று தெரிவிக்கப்பட்டுள்ளது. இந்தத் தேர்தலை அமைதியாகவும், நேர்மையாகவும் நடத்தி முடிப்பதற்கான ஏற்பாடுகளை தேர்தல் ஆணையம் செய்துள்ளது.

தேர்தலுக்கு பிந்தைய கருத்துக்கணிப்பு

5 மாநில சட்டசபைத் தேர்தலிலும் பதிவான வாக்குகள் வரும் 10ஆம் தேதி வியாழக்கிழமை எண்ணப்படுகின்றன. இந்தத் தேர்தலில் உத்தரப்பிரதேசம் உள்ளிட்ட 4 மாநிலங்களில் பாஜக ஆட்சியைத் தக்க வைக்கும் என்றும், பஞ்சாப் மாநிலத்தில் கூடுதல் இடங்களில் வெற்றிபெறும் என்று அக்கட்சியின் தலைவர் ஜே.பி.நட்டா, மத்திய உள்துறை அமைச்சர் அமித் ஷா ஆகியோர் நம்பிக்கை தெரிவித்துள்ளனர். 5 மாநில தேர்தலுக்கான வாக்குப்பதிவுக்கு பிந்தைய கருத்துக்கணிப்பு முடிவுகள் இன்று மாலை வெளியாகின்றன.

English summary

The 7th and final phase of voting for the Uttar Pradesh State Assembly is taking place today. Voting for the 54 constituencies begins at 7 a.m. and ends at 6 p.m. Today 613 candidates are in the fray. 2 crore 6 lakh voters are eligible to vote.