திருப்பரங்குன்றத்தில் தர்கா அருகே தீபம்! நீதிபதி சுவாமிநாதன் உத்தரவுக்கு எதிராக.. அரசு அவசர வழக்கு

Updated: Thursday, December 4, 2025, 0:17 [IST]

Subscribe to Oneindia Tamil

மதுரை: திருப்பரங்குன்றத்தில் சிக்கந்தர் தர்காவுக்கு அருகே தீப தூணில் கார்த்திகை தீபம் ஏற்ற வேண்டும் என்று, இந்துத்துவா அமைப்பை சேர்ந்த ராம ரவிக்குமார் உயர்நீதிமன்ற மதுரை கிளையில் வழக்கு தொடுத்திருந்தார். வழக்கை விசாரித்த நீதிபதி ஜி.ஆர்.சுவாமிநாதன், தீப தூணில் தீபம் ஏற்ற உத்தரவிட்டிருந்தார். இதனையடுத்து திருப்பரங்குன்றத்தில் கலவரம் ஏற்பட்டிருக்கிறது. எனவே உத்தரவை எதிர்த்து நீதிபதி ஜெயச்சந்திரன் அமர்வில் தமிழக அரசு தரப்பு முறையீடு செய்துள்ளது.

திருப்பரங்குன்றத்தில் கலவரம் வெடித்ததில், 2 காவலர்களுக்கு காயம் ஏற்பட்டிருக்கிறது. தடுப்புகளை உடைத்துக்கொண்டு இந்துத்துவா அமைப்பினர் கோயிலுக்கு உள்ளே செல்ல முயன்றுள்ளனர். இதனையடுத்து நிலைமையை கட்டுக்குள் கொண்டுவர 144 தடை உத்தரவை மாவட்ட ஆட்சியர் பிறப்பித்திருக்கிறார்.

இந்நிலையில், நீதிபதி ஜி.ஆர்.சுவாமிநாதன் உத்தரவுக்கு தடை விதிக்க வேண்டும் என்று மதுரை உயர்நீதிமன்ற கிளை அமர்வில் தமிழ்நாடு அரசு முறையீடு செய்திருக்கிறது. தமிழக அரசின் கூடுதல் தலைமை வழக்கறிஞர் வீரா கதிரவன், நீதிபதி ஜெயச்சந்திரன் முன் முறையீடு செய்தார். இதை ஏற்ற நீதிபதி, நாளை முதல் வழக்காக இது விசாரணைக்கு எடுத்துக்கொள்ளப்படும் என்று அறிவித்துள்ளார்.

இருப்பினும் நீதிபதி ஜி.ஆர்.சுவாமிநாதன் உத்தரவை காட்டி, தங்களை மலைக்கு மேலே அனுமதிக்க வேண்டும், 144 தடை உத்தரவு தானே! குறைந்தபட்சம் 3 பேரை அனுமதிக்கலாம். எனவே மனுதாரரையும் உடன் 2 பேரையும் அனுமதிக்க வேண்டும் என்று இந்துத்துவா அமைப்பு வழக்கறிஞர் போலீசாரிடம் வாக்குவாதம் செய்தார். ஆனால், போலீசார் உறுதியாக அனுமதியளிக்க மறுத்துவிட்டனர். வழக்கு தொடர்பாக முறையீடு செய்யப்பட்டிருப்பதால் அனுமதிக்க முடியாது என்று கூறியுள்ளனர்.

முன்னதாக இந்த வழக்கை விசாரித்த ஜி.ஆர்.சுவாமிநாதன் நீதிமன்றத்தில் காவலுக்கு உள்ள சிஐஎஸ்எஃப் வீரர்களின் உதவியுடன் கோயிலுக்கு சென்று விளக்கை ஏற்ற வேண்டும் என உத்தரவிட்டிருந்தார் என்பது குறிப்பிடத்தக்கது.