இனி ‛புள்ளிங்கோ’ கட்டிங் கிடையாது.. பள்ளி மாணவர்களை திருத்த சலூன் தொழிலாளர் நலச்சங்கம் புதுமுடிவு

ராமநாதபுரம்: கோடை விடுமுறைக்கு பிறகு ஜுன் 10ம் தேதி மீண்டும் பள்ளிகள் திறக்கப்பட உள்ளது. இந்நிலையில் தான் பள்ளி மாணவர்களுக்கு ‛புள்ளிங்கோ’ ஹேர் கட்டிங் செய்யக்கூடாது என ராமநாதபுரம் மாவட்ட முடித்திருத்தும் தொழிலாளர் நலச்சங்கம் அறிவுரை வழங்கி உள்ளது.

தமிழகத்தில் பிளஸ் 2, பிளஸ் 1 மற்றும் 10ம் வகுப்பு மாணவ-மாணவிகளுக்கு பொதுத்தேர்வு மார்ச் 1 முதல் ஏப்ரல் 8 ம் தேதி வரை நடந்து முடிந்தது. இதையடுத்து அவர்களுக்கு கோடை விடுமுறை அளிக்கப்பட்டது. அதேபோல் 1 முதல் 9ம் வகுப்பு மாணவ-மாணவிகளுக்கு இறுதி தேர்வு முடிந்த பிறகு ஏப்ரல் 24 முதல் கோடை விடுமுறை அளிக்கப்பட்டது.

இந்நிலையில் தான் தமிழகத்தில் மீண்டும் பள்ளிகள் ஜுன் 6ம் தேதி திறக்கப்படும் என அறிவிக்கப்பட்டது. ஆனால் தற்போது கோடை வெயில் அதிகரித்துள்ளதால் பள்ளிகள் திறப்பு ஜுன் 10ம் தேதிக்கு ஒத்திவைக்கப்பட்டுள்ளது. இதற்கான அறிவிப்பை நேற்று அதிகாரப்பூர்வமாக பள்ளி கல்வித்துறை வெளியிட்டது.

தமிழகத்தில் பள்ளிகள் திறப்பு தள்ளிவைப்பு! கோடை வெயிலால் ஜுன் 10ல் பள்ளி திறக்கப்படும் என அறிவிப்பு


இதற்கிடையே தான் பள்ளிகள் திறக்கும் தேதி அறிவிக்கப்பட்டுள்ளதால் ராமநாதபுரம் மாவட்டத்தில் பள்ளி மாணவ-மாணவிகளுக்கு ஒன்சைட் கட்டிங், பாக்ஸ் கட்டிங், மண்டையில் கோடு போடுவது, ஹேர் கலரிங் உள்ளிட்டவை செய்ய மாட்டோம் என்று முடித்திருத்தும் தொழிலாளர் நலச்சங்கத்தில் முடிவு எடுக்கப்பட்டுள்ளது.

இதுதொடர்பாக ராமநாதபுரம் மாவட்ட முடித்திருத்தும் தொழிலாளர் நலச்சங்கத்தின் தலைவர் முத்துமாரி, செயலர் செந்தில் குமார், பொருளாளர் சேகர் கூறுகையில், ‛‛கோடை விடுமுறைக்கு பிறகு மீண்டும் ஜுன் 10ல் பள்ளிகள் திறக்கப்பட உள்ளது. இதனால் சமூக பொறுப்புடன் நடந்து கொள்ள வேண்டும். இதன் காரணமாக மாணவர்கள் வலியுறுத்தினாலும் கூட ஒன்சைட் கட்டிங், பாக்ஸ் கட்டிங், மண்டையில் கோடு போடுவது உள்ளிட்டவற்றுக்கு மறுப்பு தெரிவிக்க வேண்டும் என நலச்சங்கத்தினருக்கு அறிவுறுத்தி உள்ளோம்’’ என்றனர்.

இந்நிலையில் தான் ராமநாதபுரம் மாவட்ட முடித்திருத்தும் தொழிலாளர் நலச்சங்கத்தின் முடிவை பலரும் வரவேற்றுள்ளனர். இவர்கள் எடுத்த முடிவை பிற மாவட்ட முடித்திருத்தும் தொழிலாளர்களும் பின்பற்ற வேண்டும் என்று பெற்றோர்களும், ஆசிரியர்களும் வலியுறுத்தி உள்ளனர்.

English summary

In Tamil Nadu Schools will reopen on June 10 after summer vacation. In this case, the Ramanathapuram District Hairdressing Workers' Welfare Association has advised its members for avoid irregular hair style to school students.