கொங்கணாபுரம் ரோட்டில் என்ன நடக்கிறது.. ஒன்று திரண்டு வந்த ஆடுகள்.. குஷியில் இடைப்பாடி..!

கொங்கணாபுரம் சந்தையில் ஆடுகள் இன்று அமோக விற்பனையானது

By Hema Vandhana

Updated: Saturday, April 23, 2022, 16:07 [IST]

Subscribe to Oneindia Tamil

சேலம்: கொங்கணாபுரம் சந்தையில் ஆடுகள் அமோகமாக விற்பனையானதால், வியாபாரிகள் படுமகிழ்ச்சியுடன் காணப்படுகின்றனர்.

சேலம் மாவட்டம் இடைப்பாடி அருகே கொங்கணாபுரம் சந்தை என்றாலே படுபேமஸ்.. வார வாரம், சனிக்கிழமை இந்த வாரச்சந்தை கூடுகிறது.

இந்த சந்தை ஆடு, கோழிகளுக்கு பிரசித்தி பெற்றது. என்றாலும், காய்கறிகள், இதர மளிகை சாமான்களும் விற்பனைக்கு குவிக்கப்படும்.

சேவல்கள்

இந்த சந்தைக்கு, சேலம் மட்டுமின்றி ஈரோடு, நாமக்கல் மாவட்டங்களில் இருந்தும் கால்நடைகளை வியாபாரிகள் விற்பனைக்குக் கொண்டு வருகின்றனர்... இந்த சந்தையில் அதிக எண்ணிக்கையில் சண்டை சேவல்களும் விற்பனைக்கு வரும்.. ஆந்திரா, கர்நாடகா, கேரளா உள்ளிட்ட அண்டை மாநில வியாபாரிகள், அதிக சண்டை சேவல்களை வாங்கி செல்வார்கள்.. சண்டை சேவல்களை வாங்க வருபவர்கள், அதன் சண்டையிடும் திறனை பரிசோதித்துவிட்டு, அதற்கு பிறகுதான் விலைபேசி வாங்கி செல்வார்களாம்.

ஆட்டு மந்தைகள்

எனினும், ஆடுகள் விற்பனைதான் இந்த சந்தையில் அதிகம் நடக்கும்.. அதிலும், பொங்கல், தீபாவளி, பக்ரீத் பண்டிகைகள் வந்தால் போதும், சந்தை முழுவதும் ஆடுகள்தான் தென்படும்.. பெரிய ஆட்டுச் சந்தை என்பதால், அந்த வாரம் முழுவதுமே ஆடுகள் வரத்து அதிகமாக காணப்படும்.. பல்வேறு பகுதிகளில் இருந்து ஆடுகளை கொண்டு வந்துவிடுவார்கள்.. அதனால் ஆடு விற்பனை நடக்கும்போது மட்டும் அதிகாலையில் இருந்தே கூட்டம் இந்த சந்தையில் நிரம்பி வழியும்...

வார சந்தை

10 கிலோ எடையுள்ள ஆடு 5000 ரூபாய் முதல் 10 ஆயிரம் ரூபாய் வரை விற்பனையாகும். அதன்படி, சனிக்கிழமை வாரச்சந்தை என்பதால், இன்றும் களைகட்டியது.. எடப்பாடி, கொங்கணாபுரம், சின்னப்பம்பட்டி, சங்ககிரி, ஆட்டையாம்பட்டி உட்பட சுற்றுவட்டார பகுதிகளில் உள்ள விவசாயிகள் ஆடுகளைக் கொண்டுவந்து விற்பனை செய்தும் வளர்ப்பதற்காக ஆடுகளை வாங்கியும் செல்கின்றனர்..

கொங்கணாபுரம் சந்தை

கொங்கணாபுரம் வாரச் சந்தைக்கு சுமார் 5000 ஆடுகள் விற்பனைக்காக கொண்டு வரப்பட்டன... 5000 ஆடுகள் கொண்டு வந்திருந்த நிலையில் 3000 ஆடுகள் கடகடவென விற்பனையாகிவிட்டதாம்.. ஆடு ஒன்று, 1000 முதல் 12 ஆயிரம் ரூபாய் வரைக்கும் விற்பனையானது.. எப்படியும் இன்று மட்டும் கொங்கணாபுரம் சந்தையில் சுமார் இரண்டு கோடி ரூபாய்க்கு ஆடுகள் விற்பனையாகியுள்ளதாக சொல்கிறார்கள்..!