ஆமா.. நான் கர்ப்பமாதான் இருக்கேன்.. அதுக்கென்ன.. காட்டு தீயை நானும் அணைப்பேன்.. அசத்திய பெண்!

காட்டு தீயை அணைக்க, 23 வயது கர்ப்பிணி உதவி வருகிறார்

Published: Friday, November 15, 2019, 18:22 [IST]

Subscribe to Oneindia Tamil

சிட்னி: "ஆமா.. நான் கர்ப்பமாதான் இருக்கேன்.. அதுக்கென்ன.. காட்டுத் தீயை நானும் அணைப்பேன்" என்று இளம்பெண் ஒருவர் தீயணைப்பு படையினருடன் இணைந்து உதவிசெய்து வருகிறார்.

ஆஸ்திரேலியாவின் நியூ சவுத் வேல்ஸ் மாகாணத்தில் சில நாட்களுக்கு முன்பு திடீரென காட்டு தீ பற்றி கொண்டது.. இந்த காட்டுதீ ஏற்பட 16 வயசு சிறுவன்தான் காரணம் என்று அவன் மீது வழக்கு பதிவு செய்யப்பட்டுள்ளது.

காற்று அடித்த வேகத்தில், அந்த காட்டில் தீ கொழுந்துவிட்டு இன்னமும் எரிந்து கொண்டிருக்கிறது. இதுபோக வறண்ட வானிலை அங்கு நிலவி வருவதால், தீயின் வேகம் அதிகமாகி கொண்டு இருக்கிறதே தவிர குறைந்தபாடில்லை.

கர்ப்பிணி

இந்த காட்டுத்தீயில் இதுவரை 4 பேர் உயிரிழந்துள்ளனர்.. 300-க்கும் மேற்பட்ட வீடுகள் தீயில் கருகிவிட்டன.. எனினும் தீயணைப்பு வீரர்கள் தீயை அணைக்க போராடி வருகிறார்கள். இவர்களுக்கு உதவி செய்யதான் ஒரு இளம் பெண் கிளம்பி உள்ளார். இவர் பெயர் கேத் ராபின்சன் வில்லியம்ஸ். தாரீ என்ற நகரத்தைச் சேர்ந்தவர்.. 24 வயசாகிறது.. இப்போதுதான் மூன்றரை மாதம் கர்ப்பமாக இருக்கிறார்.

தீயணைப்பு வீராங்கணை

பொதுவாக, கர்ப்பிணிகள் ஆபத்தான வேலைகளில் ஈடுபட மாட்டார்கள். அப்படியே ஈடுபட்டாலும் பெரியவர்கள் அவர்களின் உடல்நலனை கருத்தில் கொண்டு அதை தடுத்து விடுவார்கள். ஆனால், கேத் அப்படி இல்லை.. இவர் ஒரு சாதாரண பெண் இல்லை.. 11 வருஷங்களாக தன்னார்வ தீயணைப்பு வீராங்கணையாக ஈடுபட்டு வந்துள்ளார். இப்போது மாசமாக இருக்கும் நேரத்திலும் தீயை அணைக்க கேத் கிளம்பிவிட்டார்.

செல்பி

இதை பார்த்த அவரது சொந்தக்காரர்கள், நண்பர்கள், வேண்டாமே என்று அறிவுறுத்தினர். அதை கேத் காதிலேயே வாங்கவில்லை.. தொடர்ந்து தீயணைக்கும் வேலையில் இறங்கி உள்ளார். இதை பற்றி இன்ஸ்டாகிராமில் ஒரு செல்பி எடுத்து ஒரு பதிவு போட்டுள்ளார்.

கவலையில்லை

அதில், "நான் ஒரு தீயணைப்பு வீராங்கனை. நான் ஒரு கர்ப்பிணி. மற்றவர் சொல்வதை பற்றி எனக்கு எந்த கவலையுமில்லை.. நான் என் வேலையில் நன்றாகவே இருக்கிறேன். இதை எப்பவுமே கைவிட போவது இல்லை.. என் உடல் நிறுத்த சொன்னால் மட்டுமே நிறுத்துவேன்" என்று நச்சென ஒரு பதிவு போட்டுள்ளார். கேத் போட்ட இந்த பதிவுக்கு பெருமளவுக்கு ஆதரவுகள் குவிந்து வருகின்றன.. பாராட்டுக்கள், வாழ்த்துக்கள், உற்சாகங்களுக்கு நடுவில், களத்தில் குதித்து.. ஸாரி.. காட்டுக்குள் குதித்து பேருதவி செய்து வருகிறார் இந்த இளம் கர்ப்பிணி!

Published On November 15, 2019