தமிழகத்தில் மதவாத சக்திகள் காலூன்ற முடியாது- முதல்வர் ஸ்டாலினை சந்தித்த சிபிஎம் பொது செயலாளர் பேபி

Updated: Sunday, April 20, 2025, 14:29 [IST]

Subscribe to Oneindia Tamil

சென்னை: தமிழ்நாட்டில் மதவாத சக்திகள் ஒரு போதும் காலூன்றவே முடியாது; திமுக கூட்டணி வலுவாக இருப்பதாலேயே மதவாத சக்திகள் தமிழகத்தில் தலையெடுக்க முடியாது; இந்தியா முழுவதும் பின்பற்ற வேண்டிய மாடலாக தமிழகத்தில் திமுக கூட்டணி அமைந்துள்ளது என்று முதல்வர் மு.க.ஸ்டாலினை சந்தித்த சிபிஎம் கட்சியின் பொதுச்செயலாளர் பேபி தெரிவித்துள்ளார்.

சென்னையில் திமுக தலைவரும் தமிழ்நாடு முதல்வருமான மு.க.ஸ்டாலினை அண்மையில் சிபிஎம் பொதுச்செயலாளராக தேர்ந்தெடுக்கப்பட்ட எம்.ஏ. பேபி இன்று சந்தித்து பேசினார். சென்னை அண்ணா அறிவாலயத்தில் இந்த சந்திப்பு நடைபெற்றது.

இந்த சந்திப்புக்குப் பின்னர் செய்தியாளர்களிடம் பேபி கூறியதாவது: சிபிஎம் கட்சியின் பொதுச்செயலாளராக தேர்ந்தெடுக்கப்பட்ட பின்னர் தமிழ்நாடு முதல்வர் மு.க ஸ்டாலினை சந்தித்தேன். இது ஒரு மரியாதை நிமித்தமான சந்திப்பு. மதுரையில் நடைபெற்ற சிபிஎம் அகில இந்திய மாநாடு மிகச் சிறப்பாக நடைபெற்றது.தமிழ்நாடு அரசு, இந்த மாநாட்டுக்கு முழு ஒத்துழைப்பை வழங்கியதற்கு நன்றி தெரிவித்தேன்.

தமிழ்நாட்டுக்கு தந்தை பெரியார் தொடங்கி மிகப் பெரிய பாரம்பரியம் உள்ளது. தமிழ்நாட்டில்தான் அனைத்து ஜனநாயக, மதச்சார்பற்ற சக்திகள் அனைத்தும் ஒருங்கிணைந்து நிற்கின்றன. இந்த கூட்டணிதான் இந்தியாவுக்கே வழிகாட்டும் கூட்டணியாக உள்ளது. தமிழகத்தில் மதவாத சக்திகள் காலூன்ற முடியாமல் இருப்பதற்கும் இந்த கூட்டணிதான் காரணம். தமிழ்நாட்டில் சட்டசபை தேர்தலுக்கு இன்னும் ஓராண்டு இருக்கும் நிலையில் வலுவான ஒருங்கிணைப்பு அவசியமாகிறது.

மத்திய பாஜக அரசின் வக்பு சட்டத்தை நாடாளுமன்றத்தில் எதிர்க்கிறது அதிமுக. ஆனால் அதே மதவாத சக்திகளுடன் அதிமுக, தமிழகத்தில் கைகோர்த்து நிற்கிறது. தமிழக மக்கள் ஒன்றும் முட்டாள்கள் அல்ல. இதனை தமிழக மக்கள் நன்கு புரிந்து கொள்வர்.

மத்திய பாஜக அரசின், சிறுபான்மையினர் மீதான தாக்குதலுக்கு வக்பு சட்டம்தான் நல்ல உதாரணம். ஆகையால்தான் அதிமுக- பாஜக இடையேயான கூட்டணி சந்தர்ப்பவாத அணியாகும்.

மாநில உரிமைகளைப் பாதுகாக்கும் சட்டப் போராட்டத்தில் திமுக முன்னணியில் நின்று வெற்றி பெற்று வருகிறது. தமிழகத்தில் திமுக தலைமையிலான மதச்சார்பற்ற கூட்டணியை மேலும் வலுப்படுத்த வேண்டும்.

கேரளா, தமிழ்நாடு, மேற்குவங்க மாநிலங்களில் அடுத்த ஆண்டு சட்டசபை தேர்தல் நடைபெற உள்ளது. தமிழ்நாடு முதலமைச்சர் மற்றும் திமுக தோழர்களையும் நான் பாராட்டுகிறேன். தமிழ்நாட்டில் மிக வலுவான கட்சியாக திமுக உள்ளது.

இன்றைய சந்திப்பில் தேர்தல் கூட்டணி பற்றி எதுவும் பேசவில்லை. பாஜக - அதிமுக சந்தர்ப்பவாத கூட்டணி பற்றி விவாதித்தோம். பாஜக - அதிமுக கூட்டணியால் தமிழ்நாட்டில் எந்த ஒரு மாற்றமும் நிகழப்போவதில்லை. இவ்வாறு பேபி கூறினார்.