மோடி அரசின் மூன்றாண்டு சாதனை: அதிமுக பாணியில் ஸ்டிக்கர் ஒட்டிய பாஜக

பாஜக அரசின் 3 ஆண்டுகால சாதனைகளை விளக்கும் வகையில், மோடி முகம் பதித்த ஸ்டிக்கர் வெளியிடப்பட்டுள்ளது.

By Mayura Akilan

Published: Friday, May 26, 2017, 13:13 [IST]

Subscribe to Oneindia Tamil

சென்னை: 2015ஆம் ஆண்டு வெள்ளத்தில் பாதிக்கப்பட்ட மக்களுக்கு வந்த நிவாரணப் பொருட்களில் அதிமுகவினர் தமிழக முதல்வர் ஜெயலலிதாவின் படம் போட்ட 'அம்மா ஸ்டிக்கர்' ஒட்டியதுபோல் மோடி அரசின் 3 ஆண்டுகால நிறைவை தமிழக பாஜக ஸ்டிக்கர் வெளியிட்டு கொண்டாடியுள்ளது.

மத்திய அரசின் மூன்று ஆண்டு சாதனை குறித்த இணையதள சேவையை, தி.நகரில் உள்ள பாஜக அலுவலகத்தில், பி.ஜே.பி மாநில தலைவர் தமிழிசை சௌந்தரராஜன், தேசிய செயலாளர் ஹெச். ராஜா ஆகியோர் தொடங்கி வைத்தனர். மேலும், பி.ஜே.பி அரசின் சாதனைகளை விளக்கும் வகையில், மோடி முகம் பதித்த ஸ்டிக்கர் ஒன்றும் வெளியிடப்பட்டது.

கடந்த 2014ஆம் ஆண்டு நடைபெற்ற லோக்சபா தேர்தலில் பாஜக அமோக வெற்றிபெற்று ஆட்சியை கைப்பற்றியது. இதையடுத்து, பிரதமர் நரேந்திர மோடி தலைமையிலான மத்திய அமைச்சரவை கடந்த 2014,மே 26 அன்று நாட்டின் ஆட்சித் தலைமைக்கு பொறுப்பேற்று கொண்டது.

மோடி அரசு

நாட்டின் பிரதமராக நரேந்திர மோடி பதவியேற்ற பின்னர் பல்வேறு மக்கள் நலத் திட்டங்களை மத்திய அரசு அறிமுகப்படுத்தி நடைமுறைப்படுத்தியும் வருகிறது.

3 ஆண்டு நிறைவு

இத்தகைய திட்டங்களால் அடித்தட்டு மக்கள் எவ்வித பலனையும் பெறவில்லை என்று காங்கிரஸ், இடதுசாரி மற்றும் இதர எதிர்க்கட்சிகள் குற்றம்சாட்டி வருகின்றன. இந்நிலையில், இன்றுடன் பாஜக தலைமையிலான மத்திய அரசு தனது மூன்றாண்டு கால ஆட்சியை நிறைவு செய்கிறது.

நாடு முழுவதும் பயணம்

இதையடுத்து, பிரதமர் மோடி, அமித்ஷா, மத்திய அமைச்சர்கள், பாஜக மாநில முதல்வர்கள் ஆகியோர் நாடு முழுவதும் சென்று மத்திய அரசின் செயல்பாடுகள் குறித்து கருத்து கேட்க உள்ளனர். அப்போது, பாஜக அரசின் மூன்று ஆண்டுகளின் செயல்பாடுகள் குறித்தும், மக்களிடம் விளக்கமளிக்க உள்ளனர்.

மோடி ஸ்டிக்கர்

இந்நிலையில், மத்திய அரசின் மூன்றாண்டு சாதனை குறித்த இணையதள சேவையை, தியாகராய நகரில் உள்ள பாஜக அலுவலகத்தில், பாஜக மாநிலத் தலைவர் தமிழிசை சௌந்தரராஜன், தேசியச் செயலாளர் ஹெச்.ராஜா ஆகியோர் தொடங்கி வைத்தனர். மேலும், பாஜக அரசின் சாதனைகளை விளக்கும் வகையில், மோடி முகம் பதித்த ஸ்டிக்கர் ஒன்றும் வெளியிடப்பட்டது.

ஜெ., பாணி

கடந்த 2011 -2016 ஆம் ஆண்டு அதிமுக அரசு பதவியில் இருந்த போது 2015ஆம் ஆண்டு பெருவெள்ளம் ஏற்பட்டது. அப்போது, அதிமுகவினர் ஜெயலலிதா முகம் பதித்த ஸ்டிக்கர் ஒட்டினர். ஜெயலலிதா அரசை ஸ்டிக்கர் அரசு என்று பாஜக உள்ளிட்ட எதிர்கட்சியினர் வசைபாடினர். இப்போது பாஜகவினர் அதே பாணியை பின்பற்றத் தொடங்கியுள்ளனர்.

Published On May 26, 2017