சட்டக் கல்லூரி மாணவருக்கு.. பட்டப் பகலில் அரிவாள் வெட்டு.. கலவரமான தஞ்சாவூர் பெட்ரோல் பங்க்
தஞ்சாவூர்: தஞ்சாவூர் மாவட்டத்தில், பெட்ரோல் பங்கில் பணியாற்றும் பெண் ஊழியருக்கும், சட்டக் கல்லூரிக்கும் இடையே தகராறு ஏற்பட்டுள்ளது. இதில் ஆத்திரமடைந்த பெண் ஊழியரின் கணவர், தன் மனைவியிடம் தகராறு செய்த சட்டக் கல்லூரி மாணவரை பட்டப்பகலில் அரிவாளால் வெட்டியுள்ளார். அது தொடர்பான சிசிடிவி காட்சிகள் வெளியாகி அதிர்ச்சியை ஏற்படுத்தியுள்ளன.
தஞ்சாவூர், காந்தி சாலை, ஆத்துப்பாலம் அருகே, தனியார் பெட்ரோல் பங்க் இயங்கி வருகிறது. இன்று காலை அங்கு பாலசுப்பிரமணியம் என்பவர் பெட்ரோல் நிரப்புவதற்காக சென்றுள்ளார். அந்த நேரத்தில் பெட்ரோல் பங்கில் பணிபுரியும் பெண் ஊழியர் ஜெயராணிக்கும், பாலசுப்ரமணியனுக்கும் இடையே வாக்குவாதம் ஏற்பட்டது. சுற்றி இருந்தவர்கள் சமாதானப்படுத்த முயற்சி செய்தும் பிரச்னை ஓயவில்லை.
ஒருகட்டத்தில் வாக்குவாதம் முற்றியது. இதனால் பெட்ரோல் பங்க் பெண் ஊழியர் ஜெயராணி, தனது கணவரை செல்போனில் தொடர்பு கொண்டு அங்கு வரச்சொல்லியுள்ளார். இதேபோல பாலசுப்பிரமணியமும் தனது மகனை செல்போனில் தொடர்பு கொண்டு அங்கு உடனடியாக வரச்சொல்லியுள்ளார்.
பாலசுப்ரமணியனின் மகன் ஹரிஹரன் சட்டக்கல்லூரி மாணவராக உள்ளார். சம்பவ இடத்தில் இரண்டு தரப்பினரும் மீண்டும் பேச்சு வார்த்தையில் ஈடுபட்டனர். ஹரிஹரன் தன் உறவினர்களுடனும், ஜெயராணியின் கணவர் தன் நண்பர்களுடனும் வந்திருந்தனர். ஆனால் வாக்குவாதம் தீவிரமாகிக் கொண்டே சென்றது. ஒருகட்டத்தில் ஹரிஹரன் கோபத்தில், ஜெயராணியின் கணவரை தாக்கிவிட்டார்.
இதை எதிர்பாராத ஜெயராணியின் கணவர், ஆத்திரமடைந்து தான் மறைத்து வைத்திருந்த பட்டக்கத்தியை கையில் எடுத்தார். தொடர்ந்து பட்டாக்கத்தி மூலம் ஹரிஹரன் மற்றும் அவருடன் வந்தவர்களை சரமாரியாக வெட்டி தாக்கியுள்ளார். இதனால் இந்த இடத்தில் பதற்றம் தொற்றி கொண்டது. இதையடுத்து, அங்கிருந்த மக்கள் ஓட்டம் பிடித்தனர்.
இந்தத் தாக்குதலில், ஹரிஹரனுக்கு முதுகில் பலத்த காயம் ஏற்பட்டது. இதைத்தொடர்ந்து, அருகில் இருந்தவர்கள் அவரை மீட்டு சிகிச்சைக்காக தஞ்சாவூர் அரசு மருத்துவக் கல்லூரி மருத்துவமனைக்கு அனுப்பி வைத்தனர். இந்த சம்பவம் தொடர்பாக காவல்துறைக்கும் தகவல் அளிக்கப்பட்டது.
இதையடுத்து சம்பவ இடத்துக்கு சென்ற காவல்துறையினர், இந்த சம்பவம் தொடர்பாக வழக்குப் பதிந்து, விசாரணை நடத்தி வருகின்றனர். இந்த பதைபதைக்கும் சிசிடிவி காட்சிகள் வெளியாகி பரபரப்பை ஏற்படுத்தியுள்ளன.
Click it and Unblock the Notifications
Sign in with Google