தஞ்சை பள்ளி மாணவியின் பெற்றோரை சந்தித்து அண்ணாமலை ஆறுதல்.. ரூ.10 லட்சம் நிதியுதவி!

Updated: Sunday, January 30, 2022, 23:34 [IST]

Subscribe to Oneindia Tamil

தஞ்சை: தமிழக பாஜக தலைவர் அண்ணாமலை , தற்கொலை செய்த தஞ்சை பள்ளி மாணவியின் பெற்றோரை சந்தித்து ஆறுதல் கூறினார். தஞ்சாவூர் மாவட்டம் திருக்காட்டுப்பள்ளி அருகே உள்ள பள்ளியில் பிளஸ் 2 படித்து வந்த அரியலூர் மாணவி, சில தினங்களுக்கு முன்பு திடீரென விஷம் குடித்து தற்கொலை செய்துகொண்டார்.

இவர் தங்கியிருந்த விடுதியில் வார்டன், அனைத்து அறைகளையும் சுத்தம் செய்ய சொன்னதால், மன உளைச்சல் ஏற்பட்டு தற்கொலைக்கு முயன்றதாக அந்த மாணவி தனது மரணப்படுக்கையில் வாக்குமூலம் கொடுத்ததாக கூறப்படுகிறது.

பாஜக வைக்கும் குற்றச்சாட்டு

வார்டன் சகாயமேரியை (62) ஏற்கனவே போலீஸார் கைது செய்தனர். மாணவியை மதமாற்றம் செய்யக் கட்டாயப்படுத்தியதன் காரணமாக தான், விஷம் குடித்து தற்கொலை செய்துக்கொண்டதாக பாஜக தரப்பில் தொடர்ந்து குற்றச்சாட்டு முன்வைக்கப்பட்டு வருகிறது. இது தொடர்பாக பாஜக தனியாக விசாரணை குழு அமைத்துள்ளது. மாணவியின் மரணத்திற்கு கட்டாய மத மாற்றம் காரணமில்லை என அரசு தரப்பிலும், பள்ளி நிர்வாகம் தரப்பிலும் தெரிவிக்கப்பட்டுள்ளது.

தமிழக அரசு புகார்

குடும்ப பிரச்சினை காரணமாகவே மாணவி தற்கொலை செய்து கொண்டதாகவும் ஒரு தரப்பினர் கருத்து கூறி வருகின்றனர். மாணவி தற்கொலை வழக்கை சிபிசிஐடிக்கு மாற்றக்கோரி அவரது தந்தை உயர் நீதிமன்ற கிளையில் மனு தாக்கல் செய்தார். தஞ்சை பள்ளி மாணவி தற்கொலை சம்பவத்தை வைத்து தமிழகத்தில்பிரச்சினையை உருவாக்க முயற்சிக்கின்றனர் என உயர் நீதிமன்றத்தில் தமிழக அரசு பரபரப்பு குற்றம் சாட்டியது.

அண்ணாமலை ஆறுதல்

இந்த நிலையில் தற்கொலை செய்து கொண்ட மாணவியின் சொந்த ஊரான வடுகபாளையத்தில் உள்ள இல்லத்திற்கு பாஜக மாநில தலைவர் அண்ணாமலை , பாஜக தேசிய மகளிர் அணித்தலைவி வானதி சீனிவாசன் ஆகியோர் சென்றிருந்தனர். மாணவியின் பெற்றோரை சந்தித்து ஆறுதல் கூறிய இருவரும் ரூ.10 லட்சத்திற்கான காசோலையை அவர்களிடம் வழங்கினார்கள்.

மாணவி படத்துக்கு மரியாதை

பின்னர் மாணவியின் படத்திற்கு மாலை அணிவித்து மரியாதை செலுத்தினார்கள். அப்போது பாஜக மாநிலத் துணை தலைவர் கருப்பு முருகானந்தம், மாவட்ட தலைவர் ஜயப்பன் உள்பட ஏராளமான பாஜகவினர் அங்கு இருந்தனர். பாஜக தொண்டர்களும் வீட்டின் முன்பு கூடி இருந்தனர். பின்பு அண்ணாமலையும், வானதி சீனிவாசனும் அங்கு இருந்து புறப்பட்டு சென்றனர்.