திருவண்ணாமலையில் மண் சரிவு.. மண்ணில் புதைந்த வீடுகள்.. குழந்தைகள் உள்பட 7 பேர் நிலைமை என்ன?

திருவண்ணாமலை: திருவண்ணாமலை மாவட்டம் வ உ சி நகரில் மண் சரிவு ஏற்பட்டு, 3 வீடுகள் மண்ணில் புதைந்துள்ளதாக தகவல் வெளியாகியுள்ளது. இதில் மொத்தம் பெண்கள், குழந்தைகள் உள்பட 7 பேர் சிக்கியிருக்கலாம் என்று அஞ்சப்படுகிறது. தேசிய மீட்பு படையினர் சம்பவ இடத்திற்கு விரைந்துள்ளதாகவும், மலையடிவாரத்தில் இருப்பவர்கள் வெளியேற்றப்பட்டதாகவும் தகவல் வெளியாகி உள்ளது.

தமிழகத்தில் இன்று பல்வேறு மாவட்டங்களில் மழை பெய்தது. ஃபெஞ்சல் புயல் கரையை கடந்த பின்னரும் சேலம், கடலூர், விழுப்புரம், திருவண்ணாமலை, தர்மபுரி, கள்ளக்குறிச்சி, ராணிப்பேட்டை உள்ளிட்ட மாவட்டங்களில் கனமழை பெய்து வருகிறது. விழுப்புரம் மற்றும் கடலூரில் நேற்று மாலை முதல் கனமழை கொட்டி வருகிறது.

இன்று இரவு வரை மழை விட்டு விட்டு மழை தொடர்ந்து பெய்ததால் விழுப்புரம் மற்றும் கடலூர் மாவட்டங்களில் உள்ள ஏரி, குளம், ஆறுகளில் தண்ணீர் மட்டம் நிரம்பி, வெள்ளப்பெருக்கு ஏற்பட்டுள்ளது. இதனால் ஒருசில பகுதிகளில் வெள்ள நீர் வீடுகளுக்குள் புகுந்தது. திருவண்ணாமலையில் மலைப்பகுதிகளில் தொடர்ந்து மழை பெய்ததால் மலையை ஒட்டியுள்ள பகுதிகளில் மண் சரிவு ஏற்பட்டுள்ளது.

திருவண்ணாமலை மாவட்டம் வ உ சி நகரில் மண் சரிவில் சில வீடுகள் மண்ணில் புதைந்தன. குறிப்பாக ஒரு பெரிய பாறை ஒன்று சரிந்து அந்த வீடுகளின் மீது விழுந்துள்ளது. இதையடுத்து இது குறித்து மீட்பு படையினருக்கு தகவல் தெரிவிக்கப்பட்டது. இந்த வீடுகளில் 7 பேர் இருந்ததாக அக்கம் பக்கத்தினர் தெரிவித்தனர்.

ராஜ்குமார் என்பவரின் வீட்டில் தான் இந்த பாறை சரிந்து விழுந்துள்ளது. வீட்டில் ராஜ்குமார் மற்றும் அவரது மனைவி மீனா, இவர்களது குழந்தைகள் கவுதம், இனியா மற்றும் ராஜ்குமாரின் உறவினர்களின் மகன், மகள்கள் தேவிகா, வினோதினி இன்னொரு பெண் என மொத்தம் 7 பேர் சிக்கியிருப்பதாக கூறப்படுகிறது.

7 பேரையும் காணாததால் அவர்கள் நிலைமை என்னவென்று தெரியவில்லை. மண் சரிவுக்கு முன்பு ராஜ்குமார் செல்போன் எண்ணில் ஒருவர் பேசியதாகவும், ஆனால் மண் சரிவு ஏற்பட்ட பிறகு ராஜ்குமார் செல்போன் சுவிட்ச் ஆப் ஆகியுள்ளது என்றும் கூறப்படுகிறது.

சம்பவ இடத்துக்கு வந்த போலீசார் மற்றும் அதிகாரிகள் அங்கு ஆய்வு செய்து வருகின்றனர். மீட்பு குழுவினரும் மீட்பு பணியில் ஈடுபட்டனர். ஆனால் பெரிய பாறையை அகற்றினால் தான் மீட்பு பணியை தொடர முடியும். எனவே மீட்பு பணியை தொடங்குவதில் சிக்கல் உள்ளது.

விழுப்புரம் மாவட்டத்தில் மீட்பு பணியில் ஈடுபட்ட தேசிய மீட்பு படையினர் சற்று நேரத்தில் அங்கு வந்துவிடுவார்கள் என்று தகவல் வெளியாகிள்ளது. மேலும் அப்பகுதியில் மலை அடிவாரத்தில் இருப்பவர்களை, வசிப்பவர்களை அங்கிருந்து வெளியேற்றி விட்டதாக அம்மாவட்ட ஆட்சியர் தெரிவித்துள்ளார்.

English summary

A landslide has occurred in VUC Nagar, Tiruvannamalai district, and 3 houses have been buried under the soil. It is feared that a total of 7 people, including women and children, may be trapped in this. It is reported that the National Rescue Team has rushed to the scene and those living on the foothills have been evacuated.