VIP Break Darshan: திருப்பதியில் ஜூன் மாதம் இறுதி வரை விஐபி தரிசனம் ரத்து! தேவஸ்தானம் அறிவிப்பு

Updated: Saturday, May 2, 2026, 13:29 [IST]

Subscribe to Oneindia Tamil

திருப்பதி: திருப்பதியில் வரும் ஜூன் மாதம் இறுதி வரை விஐபி தரிசனம் ரத்து செய்யப்படுவதாக திருமலை திருப்பதி தேவஸ்தானம் அறிவித்துள்ளது. இதற்கான காரணத்தையும் வெளியிட்டுள்ளது.

கோடை விடுமுறை தொடங்கியுள்ள நிலையில், ஆந்திரா, தமிழ்நாடு, கர்நாடகா உள்ளிட்ட பல்வேறு மாநிலங்களிலிருந்தும் திருப்பதி ஏழுமலையானைத் தரிசிக்க பக்தர்கள் கூட்டம் பெருமளவில் குவிந்து வருகின்றனர்.

தற்போது திருமலையில் உள்ள வைகுண்டம் காத்திருப்பு அறைகள் அனைத்தும் நிரம்பி வழிவதால், பக்தர்கள் தரிசன வரிசையில் கிலோமீட்டர் கணக்கில் காத்திருக்க வேண்டிய சூழல் ஏற்பட்டுள்ளது.

தர்ம தரிசனம் (டோக்கன் இல்லாதவர்கள்): ஏழுமலையானைத் தரிசிக்க சுமார் 24 மணி நேரம் வரை காத்திருக்க வேண்டியுள்ளது.

ரூ.300 விரைவு தரிசனம்: இதற்குக் கிட்டத்தட்ட 3 முதல் 4 மணி நேரம் வரை ஆகிறது.

பாட்ட கங்கம்மா கோயில் வரை வரிசை நீண்டுள்ளதால், பக்தர்களுக்குத் தேவையான நீர் மற்றும் உணவு வசதிகளைத் தேவஸ்தானம் செய்து வருகிறது.

பாமர பக்தர்களுக்கு முன்னுரிமை அளிக்கும் வகையில், அடுத்த மூன்று மாதங்களுக்கு (கோடைக்காலம் முடியும் வரை) கீழ்க்கண்ட கட்டுப்பாடுகள் விதிக்கப்பட்டுள்ளன:

விஐபி தரிசனம் ரத்து: சிபாரிசு கடிதங்களின் அடிப்படையில் வழங்கப்படும் விஐபி பிரேக் தரிசனம் (VIP Break Darshan) முழுமையாக ரத்து செய்யப்பட்டுள்ளது. (தன்னார்வ விஐபிகளுக்கு மட்டுமே அனுமதி உண்டு).

இலவச தரிசன டோக்கன்கள் ரத்து: திருப்பதி நகரில் வழங்கப்பட்டு வந்த நேரடி இலவச தரிசன (SSD) டோக்கன்கள் மற்றும் அலிபிரி நடைபாதைக்கான 'திவ்ய தரிசன' டோக்கன்கள் ரத்து செய்யப்பட்டுள்ளன.

காத்திருப்பு முறை: தரிசன டிக்கெட் இல்லாத பக்தர்கள், வரிசையில் அல்லது காத்திருப்பு அறைகளில் (Compartments) காத்திருந்து மட்டுமே சுவாமி தரிசனம் செய்ய முடியும்.

நடைபாதை பக்தர்களுக்கான கட்டுப்பாடுகள்

அலிபிரி மற்றும் ஸ்ரீவாரி மெட்டு நடைபாதை வழியாக வரும் பக்தர்களுக்குப் புதிய நேரக் கட்டுப்பாடுகள் விதிக்கப்பட்டுள்ளன:

12 வயதுக்குட்பட்ட குழந்தைகள்: பெற்றோருடன் பிற்பகல் 2 மணி வரை மட்டுமே மலைப்பாதையில் அனுமதிக்கப்படுவர்.

மற்ற பக்தர்கள்: இரவு 10 மணி வரை நடைபாதையைப் பயன்படுத்த அனுமதிக்கப்படுவர்.

கோடை வெயிலின் தாக்கம் மற்றும் கடும் கூட்ட நெரிசலைக் கருத்தில் கொண்டு, பக்தர்கள் தங்களது திருப்பதி பயணத்தைத் திட்டமிடுமாறு தேவஸ்தானம் கேட்டுக் கொண்டுள்ளது. குறிப்பாக, முன்கூட்டியே தரிசன டிக்கெட் பதிவு செய்தவர்கள் மட்டுமே தடையற்ற தரிசனத்தைப் பெற முடியும் என்பது குறிப்பிடத்தக்கது.