முஸ்லிம் நாடுகளிடம்தான் நிறைய நிலம் இருக்கே! பாலஸ்தீனம் உருவாக்க கொடுக்கலாமே: இஸ்ரேல் அமெரிக்க தூதர்

வாஷிங்டன்: எதிர்காலத்தில் பாலஸ்தீனிய நாடு உருவாவதற்கு "முஸ்லிம் நாடுகள்" சில தங்கள் நிலங்களை விட்டுக்கொடுக்க வேண்டும் என்று இஸ்ரேலுக்கான அமெரிக்கத் தூதர் மைக் ஹக்கபீ கருத்து தெரிவித்துள்ளார்.

பிபிசிக்கு அளித்த பேட்டியில், இஸ்ரேலை விட முஸ்லிம் நாடுகளிடம் 644 மடங்கு அதிக நிலம் இருப்பதாக ஹக்கபீ கூறினார். "பாலஸ்தீன நாடு உருவாவதற்கு விருப்பமிருந்தால், அதை வழங்க யாராவது முன்வரலாம்," என்றும் அவர் கூறினார்.

இஸ்ரேலும், எதிர்கால பாலஸ்தீனிய நாடும் பக்கத்து பக்கத்து நாடுகளாக இருக்க வேண்டும் என்ற இரு நாடுகள் தீர்வு யோசனையை ஹக்கபீ "ஆம் அது ஒரு லட்சிய இலக்கு" என்று குறிப்பிட்டார். இந்த யோசனைக்கு அமெரிக்க அரசுகள் உட்பட சர்வதேச அளவில் பரவலான ஆதரவு உள்ளது. பாலஸ்தீன நாடு மேற்கு கரை மற்றும் காஸாவில் அமைய வேண்டும் என்றும், கிழக்கு ஜெருசலேம் அதன் தலைநகராக இருக்க வேண்டும் என்றும் அந்த திட்டம் கூறுகிறது.

மேற்கு கரையில் பாலஸ்தீனிய நாடு உருவாவதை அமெரிக்கா எதிர்க்கிறதா என்று கேட்டதற்கு ஹக்கபீ, "அது இருக்க முடியாது என்று நான் கூற மாட்டேன், ஆனால் ஒரு கலாச்சாரம் மாற வேண்டும் என்று நான் கூறுவேன். யூதர்களை குறிவைத்து அவர்களைக் கொல்வது சரியெனவும், அதற்கு வெகுமதி அளிக்கப்படுகிறது என்ற கலாச்சாரம் தற்போது உள்ளது. அது மாற வேண்டும்" என்று ஹக்கபீ மேலும் தெரிவித்தார்.

இஸ்ரேலின் நிலைப்பாடு

இஸ்ரேல் இரு நாடுகள் தீர்வு திட்டத்தை நிராகரிக்கிறது. எந்தவொரு இறுதி உடன்பாடும் பாலஸ்தீனியர்களுடனான பேச்சுவார்த்தைகள் மூலம் மட்டுமே எட்டப்பட வேண்டும் என்றும், பாலஸ்தீன நாடு உருவாவது ஒரு முன்நிபந்தனையாக இருக்கக்கூடாது என்றும் இஸ்ரேல் கூறுகிறது.

ஹக்கபீ நீண்ட காலமாக "கிரேட்டர் இஸ்ரேல்" என்ற கருத்தை ஆதரித்து வருகிறார். இதன்மூலம் ஆக்கிரமிக்கப்பட்ட பாலஸ்தீனிய பிரதேசங்களின் நிரந்தர இஸ்ரேலிய கட்டுப்பாட்டை அவர் விரும்புகிறார்.

அமெரிக்காவின் நட்பு நாடுகளுக்கு கண்டனம்

மேற்கு கரையில் பாலஸ்தீனிய சமூகங்களுக்கு எதிரான வன்முறையை தூண்டியதற்காக இரு தீவிர வலதுசாரி இஸ்ரேலிய அமைச்சர்கள் மீது தடைகளை விதித்த அமெரிக்க நட்பு நாடுகளான இங்கிலாந்து மற்றும் ஆஸ்திரேலியாவையும் ஹக்கபீ கடுமையாக விமர்சித்தார்.

"மக்களால் தேர்ந்தெடுக்கப்பட்ட இந்த இரண்டு அமைச்சர்கள் எந்த குற்றவியல் நடவடிக்கையிலும் ஈடுபடாத நிலையில், அவர்களின் நாட்டின் இறையாண்மையை மதித்து அவர்களை ஏன் தடை செய்தீர்கள் என்பதற்கு எந்தவொரு நல்ல காரணத்தையும் நான் இன்னும் கேள்விப்படவில்லை," என்று அவர் கூறினார்.

காஸா போர்

ஹமாஸ் இஸ்ரேல் மீது திடீரென ஏவுகணை தாக்குதல் நடத்திய பிறகு, 2023ம் ஆண்டு அக்டோபர் மாதம் காஸா போர் தொடங்கியது. இந்த தாக்குதலில் சுமார் 1,200 பேர் கொல்லப்பட்டனர் மற்றும் சுமார் 251 பேர் பிணைக்கைதிகளாக பிடித்து செல்லப்பட்டனர். காஸாவில் இன்னும் 56 பிணைக்கைதிகள் இருக்கிறார்கள், அவர்களில் குறைந்தது 20 பேராவது உயிருடன் இருப்பதாக நம்பப்படுகிறது.

போர் தொடங்கியதில் இருந்து, காஸாவின் ஹமாஸ் கட்டுப்பாட்டில் உள்ள சுகாதார அமைச்சகத்தின் கருத்துப்படி, குறைந்தது 54,927 பாலஸ்தீனியர்கள் கொல்லப்பட்டுள்ளனர். கொல்லப்பட்டவர்களில் கால் பங்கிற்கும் அதிகமானோர் குழந்தைகள் என்று ஐ.நா கூறுகிறது.

பாலஸ்தீன நாடு உருவாவதற்கு முஸ்லிம் நாடுகள் சில தங்கள் நிலங்களை விட்டுக்கொடுக்க வேண்டும் என்ற ஹக்கபீயின் கருத்து சர்ச்சையை ஏற்படுத்தியுள்ளது. அதே நேரத்தில் இஸ்ரேல் இரு நாடுகள் தீர்வு திட்டத்தை நிராகரிக்கிறது என்பது குறிப்பிடத்தக்கது.

இரு நாடுகள் திட்டம் என்றால் என்ன?

இஸ்ரேல் மற்றும் பாலஸ்தீனியர் தங்களுக்கென தனித் தனி நாடுகளாக அமைந்து, பக்கத்து நாடுகளாக அமைதியாக வாழ வேண்டும். பொதுவாக, எதிர்கால பாலஸ்தீனிய நாடு, மேற்கு கரை (West Bank), காசா (Gaza Strip), மற்றும் கிழக்கு ஜெருசலேம் (East Jerusalem) ஆகிய பகுதிகளில் அமைய வேண்டும் என்பது திட்டத்தின் நோக்கம். 1993-ல் ஒஸ்லோ ஒப்பந்தத்தின் போது இந்தத் திட்டம் இருபுறமும் ஒப்புக்கொள்ளப்பட்டது. ஆனால், பல்வேறு காரணங்களால் இது நடைமுறைப்படவில்லை. தற்போது பாலஸ்தீனிய அதிகாரிகள் (Palestinian Authority) இந்த திட்டத்தை ஆதரிக்கின்றனர்; ஆனால், இஸ்ரேல் தற்போதைய அரசாங்கம் இதை நிராகரிக்கிறது

English summary

US envoy Mike Huckabee stated that Muslim countries may need to relinquish land for a future Palestinian state. His comments reflect ongoing tensions and Israel's rejection of a two-state solution.