Vijay: நீங்க அரசியலுக்கு செட் ஆக மாட்டீங்க! சர்க்கார் சூட்டிங்கில் நேரடியாக சொன்ன நடிகர்!

Updated: Monday, September 29, 2025, 17:48 [IST]

Subscribe to Oneindia Tamil

சென்னை: தமிழ் சினிமாவில் உச்ச நட்சத்திரமாகத் திகழ்ந்த நடிகர் விஜய், இப்போது முழுநேர அரசியல்வாதியாகத் தன்னை அறிவித்து, தமிழக வெற்றிக் கழகம் (தவெக) என்ற கட்சியைத் தொடங்கியுள்ளார். 2026 சட்டமன்றத் தேர்தலை இலக்கு வைத்துச் செயல்பட்டு வருகிறார்.

அவர் தீவிர அரசியல் பாதையைத் தேர்வு செய்துள்ள நிலையில், ஒரு சில சனிக்கிழமைகளில் மாவட்ட வாரியாக மக்களைச் சந்தித்து உரையாடுவதை வழக்கமாகக் கொண்டுள்ளார். கடந்த சனிக்கிழமை அவர் கரூர் சென்றபோது, அங்கு ஏற்பட்ட கோரமான கூட்ட நெரிசலில் சுமார் 40 பேர் வரை உயிரிழந்த சம்பவம், தமிழகத்தில் பெரும் அதிர்ச்சியை ஏற்படுத்தியுள்ளது.

விமர்சனங்களின் அரசியல்

கரூரில் ஏற்பட்ட இந்தத் துயரச் சம்பவத்தைத் தொடர்ந்து, விஜயைக் கைது செய்ய வேண்டும் என்று அவரைப் பிடிக்காதவர்களும், தி.மு.க.வினரும் கடுமையாக விமர்சித்து வருகிறார்கள். ஆனால், விஜய்யின் ஆதரவாளர்களோ, "இந்த உயிரிழப்புக்கு முழுக்க முழுக்க தி.மு.க. அரசே காரணம். காவல்துறை சரியான பாதுகாப்பு கொடுக்கவில்லை. இது கரூரில் நடந்த திட்டமிட்ட சதி" என்று எதிர்க் குரல் கொடுத்து வருகிறார்கள்.

மேலும், விஜய் இன்னும் தன்னை ஒரு நடிகராகவே உணர்கிறார் என்றும், அவர் பார்க்க வரும் மக்கள் கூட்டம் இன்னும் ரசிக மனப்பான்மையுடன் தான் அவரை அணுகுகிறார்கள் என்றும் விமர்சனங்கள் அவர் மீதும், அவரின் தொண்டர்கள் மீதும் வைக்கப்படுகின்றன.

விஜய், தான் நடிகராக இருந்தபோதே தனது ரசிகர் மன்றங்களை விஜய் மக்கள் இயக்கம் என்று அமைப்பாக மாற்றி, அரசியல் பணிகளில் ஈடுபட்டு வந்தது குறிப்பிடத்தக்கது. அவருடைய இந்த நீண்டநாள் அரசியல் ஆசை குறித்து, அவருடன் இணைந்து பணியாற்றிய சக நடிகர் ஒருவர் சுவாரசியமான ஒரு தகவலைப் பகிர்ந்துள்ளார்.

ஆறு பாலாவின் கருத்து

தமிழில் பல படங்களில் நடித்தவரும், விஜய்யின் 'சர்கார்' படத்தில் அவருடன் ஒரு காட்சியில் நடித்தவருமான நடிகர் ஆறு பாலா ஊடகம் ஒன்றுக்கு அளித்த பேட்டியில் ஒரு முக்கியத் தகவலைப் பகிர்ந்திருக்கிறார்.

ஆறு பாலா கூறுகையில், "சர்கார் பட ஷூட்டிங்கின்போது நான் விஜய் சாருடன் நடித்தேன். அப்போது அவர் என்னிடம், 'நான் அரசியலுக்கு செட் ஆவேனா?' என ஒரு கேள்வியைக் கேட்டார். நான் உடனே சிரித்தபடி, 'நீங்க அரசியலுக்கு செட் ஆக மாட்டீங்க' எனச் சொன்னேன்" என்று தெரிவித்துள்ளார்.

ஆறு பாலாவின் இந்தக் கருத்தைக் கேட்ட விஜய், ஒரு நிமிடம் அவருடைய முகத்தை உற்றுப் பார்த்துவிட்டு, "ஏன் இப்படி சொல்றீங்க?" எனக் கேட்டிருக்கிறார். அதற்கு ஆறு பாலா, விஜய்யின் முகத்தைப் பார்த்துக் கூறிய பதில், அனைவரையும் சிந்திக்க வைத்திருக்கிறது.

ஆறு பாலா அளித்த பதில் இதுதான்: "உங்க மேல எந்த வழக்கும் இல்லை. கோடிக் கணக்கில் கொள்ளை அடிக்க மெடிக்கல் காலேஜ் உங்ககிட்ட இல்ல. உங்ககிட்ட ரவுடிசம் பண்ண ஆளும் இல்லை. இது எதுவுமே உங்ககிட்ட இல்லாம நீங்க அரசியலுக்கு செட் ஆக மாட்டீங்க" என்று கூறியிருக்கிறார்.

ஆறு பாலாவின் இந்தச் சமூக அரசியலைக் கிண்டல் செய்யும் கருத்துக்குப் பதிலளித்த விஜய், லேசாகச் சிரித்துவிட்டு, "மக்களுக்கு நல்லது செய்ய இதெல்லாம் தேவையில்லை நண்பா" என்று பணிவுடன் சொன்னாராம்.

கரூரின் துயரம்

விஜய்யுடன் பழகிய விதத்தை வைத்து, ஆறு பாலா, அவரை மிகவும் 'சென்சிடிவான மனிதர்' என்றும், கரூரில் நடந்த இந்தத் துயர நிகழ்வு அவருடைய மனதைக் கடுமையாகக் காயப்படுத்தி இருக்கும் என்றும் தெரிவித்துள்ளார். "அவர் மிகவும் கவலையில் இருப்பார்" என்றும் ஆறு பாலா பேசியிருக்கிறார்.

விஜய்யின் அரசியல் ஆசை, 'நல்லது செய்ய இதெல்லாம் தேவையில்லை' என்ற அவரின் வார்த்தைகள் மூலம் வெளிப்படுகிறது. ஆனால், கரூர் சம்பவம், வெறும் நல்லெண்ணம் மட்டும் அரசியலுக்குப் போதாது என்றும், பாதுகாப்பும், திட்டமிடலும், நிர்வாகத் திறனும் அவசியம் என்பதை அவருக்கு உணர்த்தியுள்ளது.