Bigg Boss 9: பிக் பாஸ் 9ல் சேட்டையை தொடங்கிய திவாகர்! பாவாடையை விடுங்க, கத்திய விஜே பார்வதி!
சென்னை: விஜய் டிவியில் இன்று பிரமாண்டமாகத் தொடங்கிய 'பிக் பாஸ் தமிழ் சீசன் 9' நிகழ்ச்சி, முதல் போட்டியாளராக உள்ளே வந்த 'வாட்டர்மெலன் ஸ்டார்' திவாகரின் அதிரடி ஆர்வக்கோளாறு சேட்டைகளால் ஆரம்பத்திலேயே சூடுபிடித்துள்ளது. பிக் பாஸ் வீட்டுக்குள் செல்வதற்கு முன்னர் தொகுப்பாளர் விஜய் சேதுபதி சில முக்கிய அறிவுரைகளை வழங்கியிருந்த நிலையில், திவாகர் அவற்றையெல்லாம் காற்றில் பறக்கவிட்டு தனது வழக்கமான சேட்டைகளைச் செய்ய ஆரம்பித்துவிட்டார்.
உண்மையில், திவாகரைத் தேர்வு செய்யக் காரணமே அவரது நடிப்புத் திறமை அல்லவாம்! பல கட்டங்களாக நடந்த தேர்வில், குறிப்பாக அவரது பிசியோதெரபி துறை குறித்த கேள்விகளுக்கு அவர் அளித்த மிகச் சரியான பதில்களால் ஈர்க்கப்பட்டே, பிக் பாஸ் குழு அவரைத் தேர்வு செய்ததாக விஜய் சேதுபதி வெளிப்படையாகத் தெரிவித்தார். ஆனால், திவாகரோ தனது 'நடிப்பு அரக்கன்' நாடகத்தையே பிக் பாஸ் வீட்டுக்குள்ளும் நடத்திக் கொண்டிருக்கிறார்
அரோராவை வம்பிழுத்த திவாகர்
வீட்டிற்குள் வந்தவுடன் சக போட்டியாளர்களுடன் சகஜமாகப் பேச ஆரம்பித்த திவாகர், தனது அடுத்த வேலையை ஆரம்பித்தார். இரண்டாவது போட்டியாளராக வந்த அரோராவைச் சந்தித்துப் பேசிய சிறிது நேரத்திலேயே, தேவையே இல்லாமல் "உங்க கண் அழகாக இருக்கிறது" என்று ஜொள்ளுடன் கூடிய புகழாரம் சூட்டினார்.
உடனடியாக, அங்கு இருந்த மூன்றாவது போட்டியாளரான எஃப்.ஜே. (F.J.) குறுக்கிட்டு, "அந்தப் பொண்ணுக்கு உன்னோட பேத்தி வயசு ஆகுது" என்று நச்சென்று ஒரு 'தக் லைஃப்' கொடுத்துக் கலாய்த்தார். முதல் நாளே திவாகருக்குக் கிடைத்த இந்தச் சவுக்கடி, ரசிகர்களுக்கு மிகுந்த சிரிப்பைக் கொடுத்தது.
VJ பார்வதியை சீண்டிய சேட்டை
ஆரம்பக் கலாய்ப்புகளால் சோர்ந்து போகாத திவாகர், அடுத்ததாக தனது சிவாஜி போல நடிக்கும் வழக்கமான நடிப்புத் தொல்லைகளை அரங்கேற்றத் தொடங்கினார். அப்படி அவர் நடிப்பில் திளைத்து நடந்து வந்து கொண்டிருந்தபோது, அருகில் நின்று கொண்டிருந்த வி.ஜே. பார்வதியின் ஆடையை (பாவாடையை) மிதித்துவிட்டார்.
உடனே பார்வதி கோபத்துடன் "ஏய் பாவாடை பாவாடை!" என்று கத்தினார். இந்தச் சம்பவம் தொடர்பான வீடியோக்கள் இணையத்தில் காட்டுத்தீ போலப் பரவி, திவாகரின் ஆர்வக்கோளாறு சேட்டைகளுக்கு மற்றுமொரு எடுத்துக்காட்டாக அமைந்தது.
இயக்குநர் பிரவீன் காந்தி செய்த செயல்
தனது புகழ் வெளிச்சத்தைப் பற்றி மற்றவர்களிடம் சொல்லாமல் இருக்க திவாகரால் முடியவில்லை. இயக்குநர் பிரவீன் காந்தியிடம் சென்று, இங்குள்ள மற்ற போட்டியாளர்கள் எல்லாம் பல ஆண்டுகள் வி.ஜே.வாக இருந்திருக்கிறார்கள் என்றும், அவர்கள் நீண்ட காலமாகச் சமூக வலைதளங்களில் பிரபலமாக இருக்கிறார்கள் என்றும் கூறிவிட்டு, "ஆனால் நான் கடந்த ஒரு வருடத்தில்தான் இணையத்தில் பிரபலமானேன்" என்று புலம்பினார்.
இந்த சுய புராணம் பாடுதலைக் கேட்டு பிரவீன் காந்திக்கு எரிச்சல் ஏற்பட, அவர் திவாகரை அவாய்ட் செய்ய முயற்சித்தார். பிரவீன் காந்தி லேசாகத் தலையசைத்து "குட்.. குட்.. குட்..." என்று மட்டும் சொல்லிவிட்டு அங்கிருந்து நகர்ந்துவிட்டார்.
இந்தக் காட்சிகளைக் கண்ட ரசிகர்கள், "இந்த வாட்டர்மெலன் திவாகர் ஒரு சரியான ஆர்வக்கோளாறு தான் போல!" என்று சமூக வலைதளங்களில் பேசி வருகின்றனர். டாக்டர் திவாகர் தனது உண்மையான திறமையைக் காட்டாமல், இந்த 'ஆர்வக்கோளாறு' ஆட்டத்தைத் தொடர்ந்தால், பிக் பாஸ் வீட்டில் அவருக்கு நிச்சயம் சவால்கள் காத்திருக்கின்றன. விஜய் சேதுபதி முதல் நாளே கொடுத்த அறிவுரையை திவாகர் எப்போது கடைப்பிடிப்பார் என்று நினைக்கிறீர்களா?
Click it and Unblock the Notifications
Sign in with Google