Kantara vs Idli Kadai: இட்லி கடை vs காந்தாரா.. 2 நாள் வசூலில் யார் டாப்பு? அதுவும் 3 மடங்கு வித்தியாசம்!

Updated: Friday, October 3, 2025, 9:46 [IST]

Subscribe to Oneindia Tamil

சென்னை: தமிழ், கன்னடம் உள்ளிட்ட இந்திய திரையுலகில் தற்போது இரண்டு படங்கள் குறித்துதான் பெரிய விவாதம் ஓடிக்கொண்டிருக்கிறது: ஒன்று, பான் இந்தியா எதிர்பார்ப்புடன் வெளியான ரிஷப் ஷெட்டியின் 'காந்தாரா சாப்டர் 1'. மற்றொன்று, ஃபீல் குட் படமாக நடிகர் தனுஷ் இயக்கி நடித்த 'இட்லி கடை'. இந்த இரண்டு படங்களின் வசூல் வேட்டையில், 'காந்தாரா சாப்டர் 1' பிரம்மாண்டமான சாதனையை நிகழ்த்தி, முதல் நாளிலேயே ரூ.60 கோடிக்கும் அதிகமாக வசூலித்துள்ள தகவல் கோலிவுட் மற்றும் சாண்டல்வுட் வட்டாரங்களில் பரபரப்பை ஏற்படுத்தியுள்ளது.

காந்தாரா சாப்டர் 1

கடந்த 2022ஆம் ஆண்டு வெறும் ரூ.20 கோடி பட்ஜெட்டில் உருவாகி, உலகம் முழுவதும் ரூ.400 கோடிக்கும் மேல் வசூலித்து அனைவரையும் திரும்பிப் பார்க்க வைத்த கன்னடப் படம் 'காந்தாரா'. இந்தக் காவியத்தின் பிரம்மாண்ட வெற்றியின் நம்பிக்கையில், அதன் முந்தைய பாகமாக (Prequel) 'காந்தாரா சாப்டர் 1' படத்தை கடந்த மூன்று வருடங்களாக ரிஷப் ஷெட்டி உருவாக்கி வந்தார்.

படத்தின் கதை

'காந்தாரா சாப்டர் 1' திரைப்படம், முதல் பாகம் முடிவடைந்த இடத்திலிருந்து தொடங்கவில்லை. மாறாக, பழங்கால தெய்வங்களின் வருகை, முன்னோர்கள் திடீரென காணாமல் போனதன் பின்னணி மற்றும் பல்லாயிரம் ஆண்டுகளுக்கு முந்தைய புராணக் கதைகளைச் சொல்கிறது. இந்தப் படத்தில், ரிஷப் ஷெட்டி மீண்டும் நாயகனாக நடிக்க, ருக்மணி வசந்த், ஜெயராம், குல்சன் தேவையா, கிஷோர் உள்ளிட்ட பல முன்னணி நடிகர்கள் முக்கிய வேடங்களில் நடித்துள்ளனர்.

வரவேற்பு

அதிக பட்ஜெட்டில் உருவான இந்தப் படத்தின் சண்டைக் காட்சிகள், ஒளிப்பதிவு, ஆர்ட் டைரக்‌ஷன் மற்றும் வி.எஃப்.எக்ஸ் காட்சிகள் ஆகியவை ரசிகர்களிடம் மிகப்பெரிய வரவேற்பைப் பெற்றுள்ளன. படம் வெளியான உடனேயே சமூக வலைதளங்களில் 'இது ஒரு தியேட்டர் எக்ஸ்பீரியன்ஸ் படம்' என்று பலரும் பாராட்டி எழுதியதால், படம் பார்க்க வேண்டும் என்ற ஆர்வம் ரசிகர்களிடையே பன்மடங்கு அதிகரித்தது.

வசூலில் காந்தாராவின் அசுர பாய்ச்சல்

உலகம் முழுவதும் நேற்று (அக்டோபர் 2) வெளியான 'காந்தாரா சாப்டர் 1' திரைப்படம், முதல் நாளிலேயே வசூலில் அதிர்ச்சியூட்டும் சாதனையைப் பதிவு செய்துள்ளது. இந்த மெகா படைப்பு, ஒரே நாளில் உலகளவில் ரூ.60 கோடிக்கும் அதிகமாக வசூலைத் தாண்டிவிட்டதாகத் தகவல்கள் வெளியாகியுள்ளன.

இதில் குறிப்பாக, இந்தி மொழியில் மட்டும் இப்படம் ரூ.19 கோடி முதல் ரூ.21 கோடி வரை வசூல் செய்திருக்கிறது என்பது, படத்தின் பான் இந்தியா வெற்றியை உறுதி செய்கிறது.

இந்தப் பிரம்மாண்ட வசூலைக் கண்ட தெலுங்கு சினிமாவின் உச்ச நட்சத்திரங்களான பிரபாஸ் மற்றும் ஜூனியர் என்.டி.ஆர் ஆகியோர் படக்குழுவுக்கு வாழ்த்து தெரிவித்துள்ளனர். இது இந்த வருடத்தின் மெகா ஹிட் படங்களில் ஒன்றாக மாறும் என்று எதிர்பார்க்கப்படுகிறது.

தனுஷின் இட்லி கடை vs காந்தாரா

மறுபுறம், நடிகர் தனுஷ் இயக்கி நடித்த 'இட்லி கடை' திரைப்படம், வெளியாகி இரண்டு நாட்களிலுமே இந்தியாவில் ரூ.20 கோடி மட்டுமே வசூல் செய்திருக்கிறது. இது 'காந்தாரா சாப்டர் 1' படத்தின் முதல் நாள் வசூலை ஒப்பிடும்போது, கிட்டத்தட்ட மூன்று மடங்கு குறைவாகும்.

இட்லி கடை கதை & நடிகர்கள்

தனுஷ் இயக்கி நடித்துள்ள இந்தப் படம், வெளிநாட்டு மோகத்தைத் துறந்து, சொந்த மண்ணின் பாரம்பரியத் தொழிலை மதிக்கும்படி வலியுறுத்தும் ஒரு ஃபீல் குட் கதையாகும். இதில் நித்யா மேனன் கதாநாயகியாக நடிக்க, அருண் விஜய், சத்யராஜ், ராஜ்கிரண் போன்றோர் முக்கியக் கதாபாத்திரங்களில் நடித்துள்ளனர். இந்தப் படம் தமிழ் மற்றும் தெலுங்கு மொழிகளில் மட்டுமே வெளியானது.

வரவேற்பின் வேறுபாடு

'இட்லி கடை' ஒரு குறிப்பிட்ட ஃபீல் குட் கதைக்களத்தைக் கொண்டிருப்பதால், அது தமிழ் மற்றும் தெலுங்கு குடும்பப் பார்வையாளர்களை மட்டுமே சென்றடையும். ஆனால், 'காந்தாரா சாப்டர் 1' திரைப்படம், ஆக்‌ஷன், புராணம், சண்டைக் காட்சிகள் மற்றும் பிரம்மாண்டமான தயாரிப்பு என ஒரு முழுமையான பான் இந்தியா மசாலா ஃபார்முலாவைக் கொண்டிருப்பதால், அது நாடு முழுவதும் உள்ள அனைத்துத் தரப்பு ரசிகர்களையும் எளிதில் ஈர்த்திருக்கிறது.

எனவே, ரூ.125 கோடி பட்ஜெட்டில் உருவாகி, பிரம்மாண்டமான புராணக் கதையைப் பேசிய 'காந்தாரா சாப்டர் 1' படத்திற்கு இந்தளவு பெரிய ஓப்பனிங் கிடைப்பது ஆச்சரியமில்லை. அதே சமயம், 'இட்லி கடை' ஒரு எளிய கதையைச் சொன்னாலும், அதுவும் குறுகிய காலத்தில் ரூ.20 கோடி வசூலை ஈட்டியிருப்பது, தனுஷின் ரசிகர்கள் மத்தியில் திருப்தியை அளித்துள்ளது.