தி ராஜா சாப் பார்க்க முதலையுடன் வந்த பிரபாஸ் ரசிகர்கள்! தியேட்டர் நிர்வாகம் அதிர்ச்சி! இப்படி இறங்கிட்டாங்களே

சென்னை: நடிகர் பிரபாஸ் நடித்துள்ள மிகுந்த எதிர்பார்ப்பை ஏற்படுத்திய திரைப்படம் 'தி ராஜா சாப்' இன்று உலகம் முழுவதும் திரையரங்குகளில் வெளியாகியுள்ளது. இதனை முன்னிட்டு, நேற்று இரவு ஆந்திரா மற்றும் தெலங்கானா மாநிலங்களில் இப்படத்தின் ப்ரீமியர் காட்சிகள் நடைபெற்றன. ஆனால் அந்த ப்ரீமியர் காட்சியின் போது நடந்த ஒரு வித்தியாசமான சம்பவம், தற்போது சமூக வலைதளங்களில் பெரும் பரபரப்பை ஏற்படுத்தியுள்ளது.

தியேட்டருக்குள் முதலையுடன் ரசிகர்கள்

படம் பார்க்க வந்த பிரபாஸ் ரசிகர்களில் சிலர், குட்டி முதலையை கையில் எடுத்துக்கொண்டு தியேட்டருக்குள் நுழைந்த காட்சி அனைவரையும் அதிர்ச்சியில் ஆழ்த்தியது. திடீரென முதலையை பார்த்ததும், தியேட்டர் நிர்வாகம் மற்றும் அங்கிருந்த மற்ற ரசிகர்கள் பதற்றமடைந்தனர். பாதுகாப்பு காரணங்களுக்காக உடனடியாக விசாரிக்கப்பட்ட நிலையில், அவை உண்மையான முதலையல்ல, ரப்பர் மூலம் செய்யப்பட்ட டம்மி முதலையென தெரிய வந்தது.

இதையடுத்து அனைவரும் நிம்மதி அடைந்தாலும், அந்த காட்சிகள் வீடியோவாக சமூக வலைதளங்களில் வெளியானதும் வைரலாகி, "பிரபாஸ் ரசிகர்களின் ரசிகத்தனம் எல்லை தாண்டுகிறது" என்ற விவாதத்தை கிளப்பியுள்ளது.

'தி ராஜா சாப்' படத்தின் ட்ரெய்லரில், பிரபாஸ் முதலையுடன் மோதும் காட்சி இடம்பெற்றிருந்தது. அதில் அவர் மந்திர சக்திகளைப் பெறும் காட்சிகள் ரசிகர்களிடம் பெரும் வரவேற்பை பெற்றன. இதனை கொண்டாடும் வகையிலேயே, சில ரசிகர்கள் முதலை பொம்மையை எடுத்துக்கொண்டு தியேட்டருக்கு வந்ததாக கூறப்படுகிறது.

தி ராஜா சாப் படத்தின் கதை

மாருதி இயக்கத்தில் உருவாகியுள்ள 'தி ராஜா சாப்', ஹாரர் - காமெடி கலந்த வித்தியாசமான கதையமைப்பைக் கொண்ட திரைப்படமாகும். ஒரு பழைய அரச மரபு, சாபம், மந்திர சக்திகள் மற்றும் அதனைச் சுற்றிய மர்மங்களே படத்தின் மையம். பிரபாஸ் இதில் இரண்டு விதமான கேரக்டரில் நடித்துள்ளதாக கூறப்படுகிறது.

இந்த படத்தில் பிரபாஸுடன், மாளவிகா மோகனன், நிதி அகர்வால், ரித்தி குமார் ஆகியோர் ஹீரோயின்களாக நடித்துள்ளனர். முக்கிய வேடத்தில் சஞ்சய் தத் நடித்திருப்பது படத்திற்கு கூடுதல் பலமாக அமைந்துள்ளது. தமன் இசையமைத்துள்ள இப்படத்தை People Media Factory மற்றும் IVY Entertainment இணைந்து தயாரித்துள்ளனர்.

விமர்சனங்கள்

படம் வெளியாகும் முன்பே, முதல் நாள் 100 கோடிக்கு மேல் வசூல் செய்யும் என கணிக்கப்பட்டுள்ளது. ப்ரீமியர் காட்சிகளை பார்த்த ரசிகர்கள், "பிரபாஸ் முழுமையான என்டர்டெய்னர் மூடில் திரும்பி வந்துள்ளார்" என்று சமூக வலைதளங்களில் கருத்து தெரிவித்து வருகின்றனர். ஹாரர் காட்சிகள், காமெடி டைமிங் மற்றும் பிரபாஸின் ஸ்டைல் ரசிகர்களை கவர்ந்துள்ளதாக கூறப்படுகிறது.

'தி ராஜா சாப்' படம் வெளியாகிய முதல் நாளே, முதலையுடன் தியேட்டருக்கு வந்த ரசிகர்கள் சம்பவம் மூலம் கூடுதல் கவனம் பெற்றுள்ளது. படம் ஹிட் ஆகுமா, இல்லையா என்பது போக, பிரபாஸ் ரசிகர்களின் தீவிரம் மீண்டும் ஒருமுறை நிரூபிக்கப்பட்டுள்ளது.

English summary

Prabhas: Actor Prabhas’s much-anticipated film The Raja Saab has hit theatres worldwide, with grand premiere shows held across Andhra Pradesh and Telangana. Amid the celebrations, an unusual incident grabbed widespread attention when a group of Prabhas fans entered a theatre carrying what appeared to be a small crocodile. The sudden sight caused panic among theatre staff and audiences, only to later be revealed that the crocodile was a rubber dummy used as a symbolic tribute to a scene from the film’s trailer where Prabhas confronts a crocodile while gaining mystical powers. Videos of the incident quickly went viral on social media, sparking debates about fan frenzy crossing limits. Directed by Maruthi, The Raja Saab is a horror-comedy entertainer revolving around curses, royal legacy, and supernatural elements, with Prabhas reportedly playing dual roles. Featuring Malavika Mohanan, Nidhhi Agerwal, Riddhi Kumar, and Sanjay Dutt in key roles, the film has opened to strong audience reactions, with fans praising Prabhas’s return to a full-fledged entertainer mode.