Ravi Mohan: அடி மேல் அடி.. ரவி மோகனுக்கு வந்த அடுத்த பிரச்சனை! நீதிமன்றத்தில் கொடுத்த அதிரடி தீர்ப்பு!

Updated: Tuesday, October 28, 2025, 15:49 [IST]

Subscribe to Oneindia Tamil

சென்னை: தமிழ் திரையுலகில் நடிகர், தயாரிப்பாளர் எனப் பன்முகத்தன்மை கொண்டு இயங்கி வருபவர் ரவி மோகன். இவர் தனது தயாரிப்பு நிறுவனமான ரவி மோகன் ஸ்டூடியோஸ் சார்பில் தயாரித்து, நடிகர் சந்தானத்தின் 'டிக்கிலோனா' திரைப்படத்தை இயக்கிய கார்த்திக் யோகி இயக்கத்தில் உருவாகி வரும் புதிய திரைப்படத்திற்கு 'BRO CODE' என்றப் பெயர் வைக்கப்பட்ட நிலையில், அந்தத் தலைப்பைப் பயன்படுத்த டெல்லி உயர் நீதிமன்றம் இடைக்காலத் தடை விதித்துள்ளது. இது திரையுலகிலும், வணிகச் சட்ட வட்டாரங்களிலும் பெரும் பரபரப்பை ஏற்படுத்தியுள்ளது.

டைட்டிலுக்கு வந்த தடை

ரவி மோகன், கார்த்திக் யோகி இயக்கத்தில் உருவாகும் இந்தப் புதியப் படத்தை 'BRO CODE' என்றப் பெயருடன் ஆரம்பத்தில் அறிவித்தார். இந்தப் படத்தில் எஸ்.ஜே. சூர்யா, ஷரத்தா ஸ்ரீநாத், மாளவிகா மனோஜ், ஸ்ரீ கௌரி பிரியா ஆகியோர் முக்கிய கதாபாத்திரங்களில் நடிக்கின்றனர். இந்தப் படத்திற்கான புகைப்படங்கள் மற்றும் பிரமோ வீடியோ இணையத்தில் பலருடைய கவனத்தை பெற்றது.

மதுபான நிறுவனத்தின் வழக்கு

இந்த பெயரில் இந்தியாவில் பிரபலமான மதுபானத்தைத் தயாரித்து வரும் 'Indo-Spirit Beverages' என்ற நிறுவனம், சென்னை உயர்நீதிமன்றத்தில் வழக்குத் தொடுத்தது. 'BRO CODE' என்பது தங்களுடையப் பதிவு செய்யப்பட்ட வணிகச் சின்னம் (Trademark) என்றும், இதே பெயரைத் திரைப்படத்தின் தலைப்பாகப் பயன்படுத்துவது, நுகர்வோருக்குக் குழப்பத்தை ஏற்படுத்தும் (Consumer Confusion) என்றும், இது தங்களது வர்த்தக உரிமைகளை மீறுவதாகவும் நிறுவனம் வாதிட்டது.

நீதிமன்றத் தீர்ப்பு

இந்த வழக்கை விசாரித்த டெல்லி உயர் நீதிமன்றம், 'BRO CODE' என்ற தலைப்பைப் படத்திற்குப் பயன்படுத்த ரவி மோகன் ஸ்டூடியோஸுக்கு இடைக்காலத் தடை விதித்து உத்தரவிட்டது. வர்த்தக முத்திரை விதிமீறலைக் கருத்தில் கொண்டு, திரைப்படத்தின் விளம்பரம் மற்றும் வெளியீட்டிற்கு இந்தத் தலைப்பைப் பயன்படுத்தக் கூடாது என்று நீதிமன்றம் கூறியுள்ளது.

ஏற்கனவே இருந்த சிக்கல்: LIC Vs LIK

பிரபலமான ஒரு வணிக பெயரையோ, வர்த்தகச் சின்னத்தையோ திரைப்படத்திற்குப் பயன்படுத்துவது சட்ட சிக்கலை ஏற்படுத்தும் என்பது புதிதல்ல. ஏற்கனவே, விக்னேஷ் சிவன் இயக்கத்தில் பிரதீப் ரங்கநாதன் நடிப்பில் உருவாகிய படத்துக்கு 'Life Insurance Company' (LIC) என டைட்டில் வைக்கக் கூடாது என வழக்கு தொடரப்பட்ட நிலையில், அத்தலைப்புச் சற்றே மாற்றியமைக்கப்பட்டு 'LIK' என்று மாற்றப்பட்டது.

அதே போல, நடிகர் ரவி மோகனின் இந்தப் படத்துக்கும் தலைப்புச் சற்றே மாற்றியமைக்கப்படலாம் என்று எதிர்பார்க்கப்படுகிறது. தற்போது, ரவி மோகன் ஸ்டூடியோஸ் நிறுவனம் இந்தத் தடை குறித்து நான்கு வாரங்களுக்குள் பதிலளிக்க வேண்டும் என்று உத்தரவிட்டு, வழக்கு விசாரணையை டிசம்பர் 23ஆம் தேதிக்கு டெல்லி உயர் நீதிமன்றம் ஒத்திவைத்துள்ளது. நடிகர் ரவி மோகன் தற்போது 'பராசக்தி' மற்றும் 'கராத்தே பாபு' ஆகிய திரைப்படங்களிலும் நடித்து வருகிறார் என்பது குறிப்பிடத்தக்கது.