வெற்றிப் பாதையில் அதிமுக.. எடப்பாடி பழனிசாமியின் வியூகமும்.. அதிகரிக்கும் மக்கள் செல்வாக்கும்!
சென்னை: தமிழகத்தில் சட்டப்பேரவைத் தேர்தல் களம் சூடுபிடித்துள்ள நிலையில், அதிமுக வெற்றிப் பாதையில் முந்திச் செல்வதாக அக்கட்சியினர் பெருமிதம் கொள்கின்றனர்.. இதற்கு அக்கட்சியின் பொதுச் செயலாளர் எடப்பாடி பழனிசாமியின் உழைப்பும், ஆற்றலும், செயல் திறனுமே முக்கியக் காரணம் என்று அவர்கள் கருதுகின்றனர்.. அதிமுகவில் ஓர் அடிமட்டத் தொண்டராகத் தனது அரசியல் பயணத்தைத் தொடங்கிய பழனிசாமி, இன்று கட்சியின் தலைமைப் பொறுப்பை எட்டியுள்ளார்.
நிர்வாகத் திறனும் மக்கள் நலனும்
2017-ல் நடந்த அரசியல் மாற்றங்களின்போது தமிழக முதல்வராகப் பதவியேற்ற அவர், கட்சியை ஒருங்கிணைத்து ஆட்சியை நிலைநிறுத்தினார். அவரது ஆட்சிக் காலத்தில் செயல்படுத்தப்பட்ட அம்மா மினி கிளினிக், இருசக்கர வாகனத் திட்டம், மற்றும் பல்வேறு சுகாதார நலத்திட்டங்கள் மக்களின் மனங்களில் நீங்கா இடம் பிடித்துள்ளன.. குறிப்பாக, கொரோனா கால இடர்பாடுகளை அவர் கையாண்ட விதம் மற்றும் அரசுப் பள்ளி மாணவர்களுக்கான மருத்துவ இடஒதுக்கீடு ஆகியவை அவருக்கு இந்திய அளவில் புகழைத் தேடித்தந்தன.. 2021 தேர்தலில் வலுவான எதிர்க்கட்சித் தலைவராக உருவெடுத்த அவர், மேற்கு மண்டலத்தில் அதிமுகவை அசைக்க முடியாத சக்தியாக மாற்றியுள்ளார்.
கவர்ச்சிகரமான தேர்தல் அறிக்கை
தற்போதைய தேர்தலில் அதிமுக வெளியிட்டுள்ள தேர்தல் அறிக்கை அனைத்துத் தரப்பு மக்களையும் கவரும் வகையில் அமைந்துள்ளது. அதன் முக்கிய அம்சங்கள் குறித்து நாம் பார்க்கலாம்..!
பொருளாதார உதவிகள்: வரிச் சுமையைக் குறைக்க ஒவ்வொரு குடும்பத்திற்கும் ரூ.10,000 சிறப்பு உதவித்தொகை வழங்கப்படும்.
மகளிர் நலன்: குடும்பத் தலைவிகளுக்கு மாதம் ரூ.2,000, வேலைக்குச் செல்லும் பெண்களுக்கு இருசக்கர வாகன மானியம் ரூ.25,000, மற்றும் கட்டணமில்லா பேருந்து பயணம் ஆண்களுக்கும் நீட்டிக்கப்படும்.
வேளாண் திட்டங்கள்: நெல் குவிண்டாலுக்கு ரூ.3,500, கரும்பு டன்னுக்கு ரூ.4,500 விலை நிர்ணயம் மற்றும் பயிர்க் கடன் தள்ளுபடி செய்யப்படும்.
சமூகப் பாதுகாப்பு: முதியோர் ஓய்வூதியம் ரூ.2,000 ஆக உயர்த்தப்படும் மற்றும் 100 நாள் வேலைத் திட்டம் 150 நாட்களாக அதிகரிக்கப்படும்.
இலவசங்கள்: ஆண்டுக்கு 3 கேஸ் சிலிண்டர்கள் இலவசம், குளிர்ப்பதனப் பெட்டி (Fridge), மற்றும் பொங்கல் தொகுப்புடன் ரூ.1,000 ரொக்கம் வழங்கப்படும்.
தேர்தல் களத்தில் எழுச்சி
கடந்த ஒரு மாதமாக எடப்பாடி பழனிசாமியின் செயல்பாடுகள் வேகம் எடுத்துள்ளன. அவரது பிரச்சாரப் பேச்சைக் கேட்க பல்லாயிரக்கணக்கான மக்கள் கூடுகின்றனர்.. கூட்டணிக் கட்சிகளை லாவகமாகக் கையாள்வது, உரிய தொகுதிகளைப் பங்கீடு செய்வது மற்றும் வேட்பாளர் தேர்வு என அவரது ஒவ்வொரு நகர்வும் அதிமுகவை வெற்றியை நோக்கி அழைத்துச் செல்கிறது.
அமைதியான நிர்வாகம், உறுதியான அரசியல் பாதை மற்றும் மக்கள் நலனில் அக்கறை கொண்ட வாக்குறுதிகள் ஆகியவற்றால், வரும் தேர்தலில் அதிமுக பெரும்பான்மையுடன் வெற்றி பெற்று எடப்பாடி பழனிசாமி மீண்டும் முதல்வராவதை யாராலும் தடுக்க முடியாது என மக்கள் மகிழ்ச்சியுடன் தெரிவிக்கின்றனர்.
Click it and Unblock the Notifications
Sign in with Google