இன்போசிஸ்: ஒரே கல்லில் ரெண்டு மாங்காய்.. லாபம் + ஈவுத்தொகை.. பட் முதலீட்டாளர் சோகம்!

இந்திய தகவல் தொழில்நுட்ப துறையில் முன்னணி நிறுவனமாக விளங்கும் இன்போசிஸ், மார்ச் 31, 2026-ஆம் தேதியுடன் முடிவடைந்த நான்காம் காலாண்டுக்கான (Q4FY26) வலுவான நிதியியல் முடிவுகளை இன்று வெளியிட்டுள்ளது. உலகளாவிய சவால்களுக்கு மத்தியிலும் நிறுவனம் நல்ல வளர்ச்சியைப் பதிவு செய்துள்ளது, இதோடு ஈவுத்தொகை கொடுத்தும் முதலீட்டாளர்கள் மத்தியில் நம்பிக்கை வரவில்லை.

மார்ச் காலாண்டில் இன்போசிஸ் நிறுவனத்தின் ஒருங்கிணைந்த நிகர லாபம் வருடாந்திர அடிப்படையில் 21 சதவீதம் அதிகரித்து ரூ.8,501 கோடியாக உயர்ந்துள்ளது. கடந்த ஆண்டு இதே காலத்தில் இது ரூ.7,033 கோடியாக இருந்தது.

மேலும் இக்காலாண்டில் இன்போசிஸ் நிறுவனத்தின் வருவாய் 13.4 சதவீதம் உயர்ந்து ரூ.46,402 கோடியைத் தொட்டது. முந்தைய ஆண்டின் இதே காலத்தில் ரூ.40,925 கோடியாக இருந்தது.

காலாண்டு அடிப்படையில் (QoQ) லாபம் 28 சதவீதம் உயர்ந்துள்ளது. மூன்றாம் காலாண்டில் ரூ.6,654 கோடியாக இருந்த லாபம் இப்போது அதிகரித்துள்ளது. வருவாயும் காலாண்டு அடிப்படையில் 2 சதவீதம் உயர்ந்துள்ளது.

மேலும் வரும் நிதியாண்டில் அதாவது 2027ஆம் நிதியாண்டில் இன்போசிஸ் மிகவும் எச்சரிக்கையான கணிப்பை வெளியிட்டுள்ளது. நிலையான நாணய மதிப்பில் வருவாய் வளர்ச்சி 1.5 சதவீதம் முதல் 3.5 சதவீதம் வரை இருக்கும் என எதிர்பார்க்கப்படுவதாக அறிவித்துள்ளது. இதேவேளையில் ஆப்பரேட்டிங் மார்ஜின் 20 சதவீதம் முதல் 22 சதவீதம் வரை இருக்கும் என கணித்துள்ளது.

மேலும் மார்ச் காலாண்டில் இன்போசிஸ் நிறுவனத்தின் ஆப்பரேட்டிங் மார்ஜின் என்பது 21 சதவீதமாக இருந்தது, இது கடந்த வருடத்திற்கு சமமாக இருக்கிறது. டிசம்பர் காலாண்டை விட 2.60 சதவீதம் உயர்ந்துள்ளது.

டாலர் அடிப்படையில் இக்காலாண்டில் வருவாய் 5,040 மில்லியன் டாலராக இருந்தது. இது முந்தைய காலாண்டை விட 6.6 சதவீதம் உயர்ந்தது, ஆனால் வருடாந்திர அடிப்படையில் 1.2 சதவீதம் குறைந்துள்ளது.

இறுதி டிவிடெண்ட் அறிவிப்பு

இன்போசிஸ் நிறுவனம் முதலீட்டாளர்களை கவரும் வகையில் 2025-26 நிதியாண்டுக்கான இறுதி டிவிடெண்டாக ஒரு பங்குக்கு ரூ.25 அறிவித்துள்ளது. இந்த
டிவிடெண்ட் தொகை அளிப்பதற்காக ரெக்கார்ட் தேதியான ஜூன் 10, 2026-ஐ நிர்ணயித்துள்ளது. டிவிடெண்ட் ஜூன் 25, 2026 அன்று வழங்கப்படும்.

பங்கு விலை வீழ்ச்சி

இன்போசிஸ் ஒப்பிட்டளவில் நல்ல காலாண்டு முடிவுகள் வெளியிட்ட போதிலும், சந்தை எதிர்பார்ப்புக்கு ஏற்ப வருவாய் வளர்ச்சி இல்லாததால் பங்கு விலை பெரும் நெருக்கடியை எதிர்கொண்டு உள்ளது. நியூயார்க் பங்குச் சந்தையில் பட்டியலிடப்பட்ட அதன் ADRகள் ப்ரீ-மார்க்கெட் வர்த்தகத்தில் 5 சதவீதம் வீழ்ச்சியடைந்து சுமார் 12.81 டாலரில் வர்த்தகமானது.

மும்பை பங்குச்சந்தையிலும் இன்றைய வர்த்தகத்தில் இன்போசிஸ் பங்குகள் 2.04 சதவீதம் சரிந்து 1242.60 ரூபாய் அளவில் உள்ளது.

இன்போசிஸ் தனது 45-வது ஆண்டு பொதுக்கூட்டத்தை ஜூன் 23, 2026 அன்று நடத்தவுள்ளதாக அறிவித்துள்ளது. இந்த கூட்டத்தில் எதிர்கால திட்டங்கள் குறித்து விவாதிக்கப்படும். இதில் முக்கியமாக இன்போசிஸ் நிறுவனத்தின் புதிய சிஇஓ தேர்வு செய்வது குறித்த முடிவுகள் எடுக்கப்பட உள்ளது.

இன்போசிஸின் இந்த முடிவுகள், தற்போதைய காலாண்டில் வலுவான செயல்திறனை வெளிப்படுத்தினாலும், வரும் காலத்தில் ஐடி துறையின் நிச்சயமின்மையை பிரதிபலிக்கிறது. இதற்கு காரணம் ஏஐ தொழில்நுட்பத்தின் ஆதிக்கம்.

English summary

Infosys delivered a strong Q4 performance with 21% YoY net profit growth to ₹8,501 crore and 13.4% revenue increase to ₹46,402 crore, alongside announcing a final dividend of ₹25 per share for FY26. Despite solid numbers and improved margins, the company’s conservative 1.5-3.5% revenue guidance for FY27 led to a 5% drop in its NYSE ADRs as investors focused on the cautious outlook amid global IT uncertainty.