எலான் மஸ்க் vs சாம் ஆல்ட்மேன்! OpenAI விவகாரத்தில் கோர்ட்டில் நேருக்கு நேர் மோதும் டெக் ஜாம்பவான்கள்

Updated: Tuesday, April 28, 2026, 9:06 [IST]

Subscribe to Oneindia Tamil

ஓக்லாந்து: எலான் மஸ்க் vs சாம் ஆல்ட்மேன் வழக்கு இன்று முதல் 4 வாரங்களுக்கு அமெரிக்காவின் ஓக்லாந்தில் உள்ள மத்திய நடுவர் மன்றத்தில் விசாரிக்கப்படுகிறது. OpenAI நிறுவனத்தை லாப நோக்கமுள்ள நிறுவனமாக ஆல்ட்மேன் மாற்றியதாக குற்றம்சாட்டி, தனக்கு துரோகம் செய்ததற்கு இழப்பீடு கோரி வழக்கு தொடர்ந்தார் எலான் மஸ்க்.

உலகின் முன்னணி கோடீஸ்வரரான எலான் மஸ்க் கடந்த 2015 ஆம் ஆண்டு சாம் ஆல்ட்மேனுடன் இணைந்து OpenAI நிறுவனத்தை தொடங்கினார். கூகுள் போன்ற பெரிய நிறுவனங்கள் ஏஐ துறையில் ஏகபோக ஆதிக்கம் செலுத்துவதை தடுக்க மனித குலத்தின் நன்மைக்காக லாப நோக்கமற்ற முறையில் பாதுகாப்பான ஏஐ-யை உருவாக்கும் நோக்கத்துடன் எலான் மஸ்க் - ஆல்ட்மேன் இணைந்து இந்த நிறுவனத்தை தொடங்கினர்.

ஒருகட்டத்தில் ஓபன் ஏஐ நிறுவனம் ஆல்ட்மேன் கட்டுப்பாட்டில் வந்தது. மஸ்க் கடந்த 2018 ஆம் ஆண்டு ஓபன்ஏஐ அறக்கட்டளையில் இருந்து வெளியேறினார். ஓபன்ஏஐ நிறுவனத்தை முதலாளித்துவ நிறுவனமான மாறிவிட்டதால், சுமார் 130 பில்லியன் டாலர் வரை நஷ்டஈடு கேட்டு ஆலட்மேனுக்கு எதிராக மஸ்க் வழக்கு தொடர்ந்தார். இந்த வழக்கு அமெரிக்காவின் ஓக்லாந்தில் உள்ள மத்திய நடுவர் மன்றத்தில் இன்று முதல் 4 வாரத்திற்கு விசாரிக்கப்பட உள்ளது.

புரட்சிகரமான AI தொழில்நுட்பத்தின் தன்னலமற்ற பாதுகாவலராக இருக்க வேண்டும் என்ற நிறுவனத்தின் ஸ்தாபக நோக்கத்திலிருந்து விலகி, OpenAI-யின் தலைமைச் செயல் அதிகாரியான ஆல்ட்மேன், அவரது முதன்மை உதவியாளரும் இணை நிறுவனருமான கிரெக் ப்ராக்மேன் ஆகியோர் தனக்கு துரோகம் செய்துவிட்டதாக எலான் மஸ்க் உரிமையியல் வழக்கு தொடர்ந்தார். மஸ்க்கின் விலகலுக்குப் பிறகு அவர்கள் OpenAI-ஐ பணம் சம்பாதிக்கும் முறைக்கு மாற்றியதாகவும் குற்றம்சாட்டப்பட்டுள்ளது.

மனிதகுலத்திற்குப் பயனளிக்கும் செயற்கை நுண்ணறிவை உருவாக்கும் ஒரு லாப நோக்கற்ற நிறுவனமாக அதைத் தொடர்ந்து பராமரிப்பதாக அதன் ஆரம்ப நாட்களில் ஆல்ட்மேன் மற்றும் OpenAI தலைவர் கிரெக் ப்ராக்மேன் ஆகியோர் வாக்குறுதி அளித்து தன்னை ஏமாற்றி, நிறுவனத்திற்கு நிதியுதவி பெற வைத்ததாகவும், பின்னர் அந்நிறுவனத்தை ஒரு லாப நோக்குடைய துணை நிறுவனமாகச் செயல்படுமாறு மறுசீரமைத்ததாகவும் குற்றம் சாட்டி மஸ்க் OpenAI மீது வழக்குத் தொடுத்துள்ளார் .

OpenAI ஒரு இலாப நோக்கற்ற அமைப்பாக மீண்டும் மாற வேண்டும் என்றும் , ஆல்ட்மேன் மற்றும் ப்ராக்மேன் ஆகியோர் அதிகாரிகள் பதவிகளிலிருந்தும், ஆல்ட்மேன் அதன் இயக்குநர் குழுவிலிருந்தும் நீக்கப்பட வேண்டும் என்றும் எலான் மஸ்க் கோருகிறார். penAI நிறுவனம், எலான் மஸ்க்கின் குற்றச்சாட்டுகளை ஆதாரமற்ற, பொறாமையின் வெளிப்பாடாகக் கூறி நிராகரித்துள்ளது. இது OpenAI-இன் விரைவான வளர்ச்சியைச் சீர்குலைப்பதையும், போட்டியாளராக 2023-ல் மஸ்க் அறிமுகப்படுத்திய தனது சொந்த xAI-ஐ வலுப்படுத்துவதையும் நோக்கமாகக் கொண்டது என்றும் கூறியுள்ளது.

இந்த வழக்கின் முடிவை இப்போது கலிபோர்னியாவின் ஓக்லாந்தில் உள்ள ஒரு ஜூரியும், அமெரிக்க மாவட்ட நீதிபதி இவோன் கொன்சாலஸ் ரோஜர்ஸும் தீர்மானிப்பார்கள். இதன் தீர்ப்பு சிலிக்கான் வேலியில் ஏஐ-யின் எதிர்காலத்தை தீர்மானிப்பதாக இருக்கக் கூடும் என எதிர்பார்க்கப்படுகிறது. ஓபன் ஏஐ நிறுவனம் தான் சாட் ஜிபிடி AI மாடலை உருவாக்கியது குறிப்பிடத்தக்கது.

ஆல்ட்மேனுக்கு எதிரான மஸ்க்கின் குற்றச்சாட்டுகள் குறித்து முடிவெடுப்பதில் நீதிபதிக்கு வழிகாட்டும் வகையில், 9 நடுவர்கள் ஒரு ஆலோசனைத் தீர்ப்பை வழங்குவார்கள்; இது சட்டப்பூர்வமாகக் கட்டுப்படுத்தாத ஒரு பரிந்துரையாக இருக்கும். மஸ்க், ஆல்ட்மேன் மற்றும் ப்ராக்மேன் ஆகியோர் சாட்சியம் அளிப்பார்கள். OpenAI-இன் முன்னாள் தலைமை விஞ்ஞானி இல்யா சுட்ஸ்கேவர், OpenAI-இன் முன்னாள் தலைமை தொழில்நுட்ப அதிகாரி மீரா முராட்டி மற்றும் மைக்ரோசாப்ட் தலைமை நிர்வாக அதிகாரி சத்யா நாதெல்லா ஆகியோரும் சாட்சியம் அளிப்பார்கள் என எதிர்பார்க்கப்படுகிறது.

இந்த வழக்கின் முடிவு செயற்கை நுண்ணறிவு துறையை தலைகீழாக மாற்றக்கூடும். மஸ்க் கோரும் தீர்வு, இந்த ஆண்டின் இறுதிக்குள் பொதுப் பங்கு வெளியீட்டிற்கு விரைந்து கொண்டிருக்கும் OpenAI நிறுவனத்தை முடக்கிவிடக்கூடும். 850 பில்லியன் டாலருக்கும் அதிகமான மதிப்புள்ள OpenAI நிறுவனத்திற்கு, மஸ்க் உடனான இந்த வழக்கு ஒரு பெரும் அபாயமாக மாறியுள்ளது.

க்ரோக் (Grok) என்ற சாட்பாட்டைத் தயாரிக்கும் xAI நிறுவனம், மஸ்க்கின் ஸ்பேஸ்எக்ஸ் (SpaceX) நிறுவனத்தின் ஒரு பகுதியாக ஜூன் மாத தொடக்கத்திலேயே பொதுப் பங்கு வெளியீட்டிற்கு வரும் என்று எதிர்பார்க்கப்படுகிறது. மஸ்க் வெற்றி பெற்றால், ஸ்பேஸ் எக்ஸுடன் இணைந்து 1.25 டிரில்லியன் டாலர் மதிப்புள்ள xAI நிறுவனம் , செயற்கை நுண்ணறிவு துறையில் ஒரு பெரிய வளர்ச்சியைப் பெறக்கூடும்.