ரன் அவுட்டை தடுத்துட்டாரு.. நடுவரிடம் சொன்ன ஷமி, பண்ட்.. ரகுவன்ஷிக்கு 3வது அம்பயர் கொடுத்த அதிர்ச்சி

Updated: Sunday, April 26, 2026, 20:56 [IST]

Subscribe to Oneindia Tamil

லக்னோ: லக்னோ அணிக்கு எதிரான போட்டியில் கேகேஆர் அணியின் இளம் வீரரான ரகுவன்ஷி ஃபீல்டிங் செய்வதை தடுப்பதாக அவுட் கொடுக்கப்பட்டு வெளியேற்றப்பட்டுள்ளார். ஐபிஎல் வரலாற்றில் ஃபீல்டிங்கை தடுத்ததாக கூறி விக்கெட் கொடுக்கப்பட்ட 4வது வீரர் என்ற மோசமான சாதனையை ரகுவன்ஷி படைத்திருக்கிறார்.

ஐபிஎல் தொடரில் லக்னோ அணிக்கு எதிரான போட்டியில் கேகேஆர் அணி விளையாடி வருகிறது. இந்தப் போட்டியில் டாஸ் வென்ற லக்னோ அணியின் கேப்டன் ரிஷப் பண்ட் பவுலிங்கை தேர்வு செய்தார். 2வது ஓவரிலேயே டிம் செஃபெர்ட் டக் அவுட்டாகி வெளியேற, அடுத்த ஓவரில் கேப்டன் ரஹானே 10 ரன்கள் எடுத்து வெளியேறினார். அப்போது ரகுவன்ஷி - கேமரூன் க்ரீன் கூட்டணி இணைந்தது.

இருவருமே நிதானமாக விளையாடி ரன்களை சேர்த்தனர். அப்போது பிரின்ஸ் யாதவ் வீசிய 4வது ஓவரின் கடைசி பந்தில் ரகுவன்ஷி மிட் ஆன் திசையில் பந்தை அடித்துவிட்டு ரன் சேர்க்க முயற்சித்தார். பாதி கிரீஸ் வந்த பின், கேமரூன் க்ரீன் ரகுவன்ஷியை திருப்பி அனுப்பினார். இதனால் ரகுவன்ஷி பின்னால் பார்த்து கொண்டே கிரிஸை நோக்கி ஓடினார்.

பின்னால் திரும்பி ஓடும் போது, அவரின் கால்களில் பந்து அடித்தது. இதனால் ரன் அவுட் அடிக்க முயற்சித்த போது பந்தை தடுத்துவிட்டதாக முகமது ஷமி, ரிஷப் பண்ட் நடுவரிடம் கோரிக்கை வைத்தனர். இதனால் கள நடுவர் உடனடியாக அந்த கோரிக்கையை 3வது நடுவரிடம் கொண்டு சென்றார். சில நிமிடங்கள் ஆராய்ந்த நடுவர், திடீரென யாரும் எதிர்பார்க்காத வகையில் ரகுவன்ஷிக்கு அவுட் என்று தீர்ப்பு கொடுத்தார்.

இது ரகுவன்ஷிக்கு மட்டுமல்லாமல் மொத்த கேகேஆர் அணிக்கும் அதிர்ச்சியை ஏற்படுத்தியது. உடனடியாக கேகேஆர் அணியின் பயிற்சியாளர் அபிஷேக் நாயர் 4வது நடுவரிடம் சென்று வாக்குவாதத்தில் ஈடுபட்டார். இதனால் கோபம் அடைந்த ரகுவன்ஷி, பவுண்டரி லைன் அருகே வந்த போது, பேட்டால் தரையில் அடித்து கொந்தளித்தார்.

இதன் மூலமாக ஃபீல்டிங் டிஸ்டர்பன்ஸ் என்று அவுட் கொடுக்கப்பட்ட 4வது வீரராக ரகுவன்ஷி பெயர் எடுத்துள்ளார். இதற்கு முன்பாக ஃபீல்டிங் டிஸ்டர்பன்ஸ் கோரிக்கை அடிப்படையில் யூசுப் பதான், அமித் மிஸ்ரா மற்றும் ஜடேஜா ஆகியோர் இதே பாணியில் ஆட்டமிழந்துள்ளனர். ஆனால் ரகுவன்ஷி விஷயத்தில் நடுவர் தவறான தீர்ப்பு அளித்துள்ளதாக விமர்சனங்கள் எழுந்துள்ளன.