'நக்கீரன்' கோபாலுக்கு தந்தை பெரியார் விருது

சென்னை: தமிழக அரசின் 2009ம் ஆண்டுக்கான தந்தை பெரியார் விருது 'நக்கீரன்' இதழின் ஆசிரியர் கோபாலுக்கு வழங்கப்படுகிறது.

இது குறித்து தமிழக அரசு வெளியிட்டுள்ள அறிவிப்பில் கூறப்பட்டுள்ளதாவது:

தமிழ்மொழி வளர்ச்சிக்கும், தமிழ்ப் பண்பாட்டு மேன்மைக்கும் தொண்டாற்றிடும் தமிழறிஞர்கள், கவிஞர்கள், சமூக நீதிக்கு உழைத்திடும் பெருமக்கள் ஆகியோரில் சிறந்தோரைத் தேர்வு செய்து சான்றோர்கள் பெயரில் ஆண்டுதோறும் தமிழக அரசின் சார்பில் விருதுகள் வழங்கப்படுகின்றன.

இதன்படி, 2010ஆம் ஆண்டிற்கான 'அய்யன் திருவள்ளுவர் விருது' முனைவர் ஐராவதம் மகாதேவனுக்கு வழங்கிட தமிழக அரசு முடிவு செய்துள்ளது.

2009ம் ஆண்டிற்கு, சமூக நீதிக்கான 'தந்தை பெரியார் விருது'
நக்கீரன் ஆசிரியர் கோபாலுக்கும், 'அறிஞர் அண்ணா விருது' முனைவர் ஔவை நடராசனுக்கும், 'அண்ணல் அம்பேத்கர் விருது' கிருஷ்ணம்மாள் ஜெகந்நாதனுக்கும், 'பெருந்தலைவர் காமராஜர் விருது' விருதுநகர் ஆர்.சொக்கர் (சட்டப் பேரவை முன்னாள் உறுப்பினர்) ஆகியோருக்கு வழங்கப்படுகிறது.

மேலும், 'பாரதியார் விருது' டி.என்.இராமச்சந்திரனுக்கும், 'தமிழ்த் தென்றல் திரு.வி.க. விருது' அண்ணாமலை என்ற இமயத்துக்கும், 'பாவேந்தர் பாரதிதாசன் விருது' கவிஞர் தமிழ்தாசனுக்கும், 'முத்தமிழ்க் காவலர் கி.ஆ.பெ. விசுவநாதம் விருது' தாயம்மாள் அறவாணனுக்கும் வழங்கப்படுகிறது.

விருது பெறுவோர் ஒவ்வொருவருக்கும் தமிழக அரசின் சார்பில் தலா ஒரு லட்சம் ரூபாய் பொற்கிழி, தங்கப் பதக்கம் வழங்கப்படும்.

வரும் 15ம் தேதி திருவள்ளுவர் தினத்தன்று சென்னையில் நடைபெற உள்ள விழாவில் முதல்வர் கருணாநிதி விருதுகளை வழங்குவார்.