Gold Price Today: ஏறிய வேகத்தில் இறங்கிய தங்கம் விலை.. காலையில் உச்சம்! பிற்பகலில் சரிவு.. சென்னையில் ரேட் எவ்வளவு?

சென்னை: சென்னையில் ஆபரணத் தங்கம் இன்று காலை சவரனுக்கு ரூபாய் 2 ஆயிரத்திற்கு மேல் உயர்ந்து அதிர்ச்சி கொடுத்தது. தீபாவளி தினமான நேற்றும், சனிக்கிழமையும் விலை சரிந்த நிலையில், இன்று தடாலடியாக மீண்டும் உயர்ந்தது. இதனால் நகை பிரியர்கள் அதிர்ச்சி அடைந்த நிலையில், பிற்பகலில் ஆறுதல் அளிக்கும் விதமாக விலை குறைந்துள்ளது.

தங்கம் விலை இன்று மாலையில் சவரனுக்கு ரூ.1440 குறைந்து, ஒரு சவரன் தங்கம் விலை சென்னையில் ரூ.96,000-க்கு விற்பனை செய்யப்படுகிறது. சென்னையில் ஒரு கிராம் தங்கம் ரூ.12,000-க்கு விற்பனை செய்யப்படுகிறது.

ஒரு லட்சத்தை நெருங்கும் தங்கம் விலை

தங்கம் விலை நினைத்து பார்க்க முடியாத அளவிற்கு உயர்ந்து வருகிறது. இந்த ஆண்டில் மட்டும் தங்கம் விலை கிட்டத்தட்ட ரூ. 40 ஆயிரம் உயர்ந்து அதிர வைத்துள்ளது. ஆண்டின் தொடக்கத்தில் 22 காரட் ஆபரணத் தங்கம் ஒரு சவரன் விலை சுமார் ₹57 ஆயிரமாக இருந்த நிலையில், தற்போது விலை ஒரு லட்சத்தை நெருங்கி செல்கிறது.

ஒரு லட்சத்தை நோக்கி தங்கம் விலை செல்வது நகை பிரியர்களை அதிர்ச்சி அடைய வைத்து வருகிறது. இந்த மாதத்திலும் தங்கம் விலையானது கடுமையாக உயர்ந்து வருகிறது. கடந்த 17-ம் தேதி கிராம் ரூ. 12,200-க்கும், சவரன் ரூ. 97,600-க்கும் விற்பனை ஆனது. முதல் முறையாக புதிய உச்சத்தை தொட்ட தங்கம் விலை மறுநாள் அதாவது 18 ஆம் தேதி குறைந்து கிராம் ரூ. 12 ஆயிரத்துக்கும், சவரன் ரூ. 96 ஆயிரத்துக்கும் விற்கப்பட்டது.

தொடர்ந்து விலை சரியுமா?

ஞாயிற்றுக்கிழமை தங்கம் மார்க்கெட்டுக்கு விடுமுறை என்பதால் விலையில் மாற்றம் இல்லாமல் அதே விலைக்கு விற்பனை ஆனது. தீபாவளி நாளான நேற்றும் ஆறுதல் அளிக்கும் விதமாக தங்கத்தின் விலை கிராம் 80 ரூபாய் குறைந்து ரூ. 11,920-க்கும், சவரன் ரூ. 640 குறைந்து ரூ.95,360-க்கும் விற்பனையானது. தங்கம் விலை தொடர்ந்து மூன்றாவது நாளாக இன்றும் சரியுமா என நகை பிரியர்கள் எதிர்பார்த்திருந்தனர்.

தற்போதைய தங்கம் விலை என்ன?

இந்த நிலையில், விலை மீண்டும் கடுமையாக உயர்ந்து அதிர்ச்சி அளித்துள்ளது. இன்று கிராம் 260 ரூபாய் உயர்ந்து ரூ. 12,180-க்கும், சவரன் ரூ. 2,080 அதிகரித்து ரூ. 97,440-க்கும் விற்பனை ஆனது. தங்கம் விலை மறுபடியும் கிராம் ரூ. 12 ஆயிரத்தையும், சவரன் ரூ. 97 ஆயிரத்தையும் தாண்டியது நகை பிரியர்களுக்கு அதிர்ச்சி கொடுத்தது.

இந்த நிலையில் இன்று மாலையில் தங்கம் விலை சரிந்துள்ளது. காலையில் சவரனுக்கு ரூ.2080 கூடிய நிலையில் மாலையில் ரூ.1440 குறைந்தது. ஒரு சவரன் தங்கம் விலை இன்று சென்னையில் ரூ.96,000-க்கு விற்பனை செய்யப்படுகிறது. ஒரு கிராம் தங்கம் காலையில் ரூ.260 உயர்ந்த நிலையில் மாலையில் ரூ.180 குறைந்துள்ளது. சென்னையில் ஒரு கிராம் தங்கம் ரூ.12,000-க்கு விற்பனை செய்யப்படுகிறது.

English summary

Gold Price Today: In Chennai, the price of ornamental gold shocked buyers this morning as it rose by over ₹2,000 per sovereign. After declining on both Diwali day and Saturday, the price suddenly surged today. However, by the afternoon, it dropped again slightly, offering some relief to jewellery enthusiasts who were initially shocked.