தங்கம் வென்ற தங்கங்கள்

வெங்காய பட்ஜெட் - தமிழக பட்ஜெட் பற்றி தமிழ் மாநில காங்கிரஸ் விமர்சனம்

சென்னை:

முதல்வர் மு. கருணாநிதி தாக்கல் செய்த பட்ஜெட் வெங்காய பட்ஜெட் என்று தமிழ் மாநில காங்கிரஸ் (தமாகா) விமர்சனம் செய்தது.

தமிழக சட்டப்பேரவையில் இது தொடர்பாக வியாழக்கிழமை நடந்த விவாதம்:

குமாரதாஸ் (தமாகா): பெரியார் பாணியில் சொல்வது என்றால் தமிழக அரசின் பட்ஜெட் ஒரு வெங்காய பட்ஜெட். உரித்தால் ஒன்றும் இருக்காது.

முதல்வர்: வெங்காயத்தை உரித்துப் பார்த்தால் ஒன்றும் இருக்காது. சாப்பிட்டுப் பார்த்தால் உடம்புக்கு நல்லது. குறிப்பாக இதயத்துக்கு நல்லது என்று மருத்துவர்கள் தெரிவிக்கின்றனர்.

சபாநாயகர்: குமாரதாஸும் ஒரு டாக்டர்தான். அவருக்கும் அது தெரியும்.

குமாரதாஸ்: உடம்புக்கு நல்லது என்பது தெரியும். ஆனால், வெங்காயத்தை உரித்தால், மக்கள் கண்களில் நீர் வரும்.

முதல்வர்: தொலைநோக்கோடு உரித்துப் பார்த்தால் கண்ணீர் வராது. பக்கத்தில் வைத்து உரித்தால் கண்ணீர் வரத்தான் செய்யும்.

பெர்னார்டு (திமுக): அப்படி வரும் கண்ணீரும், ஆனந்தக் கண்ணீராகத்தான் இருக்கும்.