கிருஷ்ணகாந்த் உடல் தகனம்

டெல்லி:

நேற்று காலை மரணமடைந்த துணை ஜனாதிபதி கிருஷ்ணகாந்தின் இறுதிச் சடங்குகள் இன்று மாலை முழு அரசுமரியாதையுடன் நடைபெறும்.

கிருஷ்ணகாந்த்தின் இல்லத்தில் வைக்கப்பட்டிருந்த அவருடைய உடலுக்கு ஆயிரக்கணக்கான மக்கள் கண்ணீர்அஞ்சலி செலுத்தினர்.

பின்னர் இன்று மாலை 3.30 மணிக்கு அவருடைய உடல் ராணுவ வாகனத்தில் ஏற்றப்பட்டு நிகாம்போத் காட்மயானத்திற்கு ஊர்வலமாக எடுத்துச் செல்லப்பட்டது.

இதைத் தொடர்ந்து மாலை 5.25 மணிக்கு வேத மந்திரங்கள் முழங்க முழு அரசு மரியாதையுடன் துப்பாக்கிக்குண்டுகள் முழங்க அவருடைய உடல் தகனம் செய்யப்பட்டது.

ஜனாதிபதி டாக்டர் அப்துல் கலாம், பிரதமர் வாஜ்பாய், துணைப் பிரதமர் அத்வானி, காங்கிரஸ் தலைவர் சோனியாகாந்தி ஆகியோர் உள்பட ஏராளமான தலைவர்கள் கிருஷ்ணகாந்த்தின் இறுதி ஊர்வலத்தில் கலந்து கொண்டனர்.