மகாதேவனுக்கு ஜெ. ஆப்பு-தளவாய்க்கு பதவி!

சென்னை:ஜெயலலிதா பேரவைச் செயலாளர் பொறுப்பில் இருந்து சசிகலாவின் அக்காள் மகன் டி.டி.வி. மகாதேவன் திடீரென நீக்கப்பட்டுள்ளார். அந்தப்பொறுப்பில் மாஜி மந்திரி தளவாய் சுந்தரம் நியமிக்கப்பட்டுள்ளார்.

அதிமுகவில் நெடு நாட்களாய் ஒதுக்கப்பட்டே இருந்தவர் மகாதேவன். ஆனால், சமீபத்தில் மீண்டும் தலையெடுத்தார். அவரை திடீரென ஜெ.பேரவை செயலாளராக்கினார் ஜெயலலிதா. இதையடுத்து தினகரன்-மகாதேவன் இடையே அதிகாரப் போட்டி எழுந்தது. இருவரின்ஆதரவாளர்களும் அடித்துக் கொண்டு உருண்டனர்.

ஆனாலும் மகாதேவனையே ஆதரித்தார் ஜெயலலிதா. இதனால் வெறுத்துப் போயிருந்தார் தினகரன். ஆனால், அதிமுக இலக்கணப்படி திடீரெனமகாதேவனை ஒரங்கட்ட ஆரம்பித்தார் ஜெயலலிதா. சமீபத்தில் உண்ணாவிரதம் நடத்தியபோது கூட அந்த இடத்துக்கு மகாதேவன் வரக் கூடாது எனஉத்தரவு போட்டார்.

இதனால் மகாதேவன் தலையில் கத்தி தொங்குவது உறுதியானது. இந் நிலையில் அவரை பதவியை விட்டு தூக்கியதோடு வேறு பதவி ஏதும்கொடுக்காமல் தவிக்க விட்டுள்ளார் ஜெயலலிதா.

இது தொடர்பாக ஜெயலலிதா வெளியிட்டுள்ள அறிக்கையில்,

அதிமுக அமைப்பு செயலாளர் பொறுப்பில் இருக்கும் தளவாய்சுந்தரம், ஜெயலலிதா பேரவை செயலாலர் பொறுப்பில் இருக்கும்டி.டி.வி.மகாதேவன், இளைஞர் அணி செயலாளர் பொறுப்பில் இருக்கும் ராஜ ரத்தினம், மாணவரணி செயலாளர் பொறுப்பில் இருக்கும் சக்திவேல்ஆகியோர் இன்று முதல் அவரவர் வகிக்கும் பொறுப்புகளில் இருந்து விடுவிக்கப்படுகிறார்கள்.

அதிமுக அமைப்பு செயலாளர் பொறுப்பில் முன்னாள் அமைச்சர் சின்னசாமியும், அதிமுக ஜெயலலிதா பேரவை பொறுப்பில் முன்னாள் அமைச்சர்தளவாய்சுந்தரம் ஆகியோர் இன்று முதல் நியமிக்கப்படுகிறார்கள்.

அதிமுக இளைஞர் அணி செயலாளர் பொறுப்பில் முன்னாள் அமைச்சர் எம்.சி.சம்பத், அதிமுக மாணவரணி செயலாளர் பொறுப்பில் ஆர்.பி.உதயகுமார் ஆகியோர் நியமிக்கப்படுகிறார்கள்.

கரூர் மாவட்ட செயலாளர் பொறுப்பில் இருக்கும் சின்னசாமி, கரூர் மாவட்ட ஜெயலலிதா பேரவை செயலாளர் பொறுப்பில் இருக்கும் வி.செந்தில்பாலாஜி ஆகியோர் பொறுப்புகளில் இருந்த விடுவிக்கப்படுகிறார்கள்.

கரூர் மாவட்ட கழக செயலாளர் பொறுப்பில் செந்தில் பாலாஜி நியமிக்கப்படுகிறார். மதுரை மாநகர் மாவட்ட மாணவரணி செயலாளர் பொறுப்பில்இருந்து ஆர்.பி.உதயகுமார் விடுவிக்கப்படுகிறார்கள் எனக் குறிப்பிடப்பட்டுள்ளது.

இதன்மூலம் அதிமுகவில் மீண்டும் தினகரன் கை ஓங்கியுள்ளது. மகாதேவனுக்கு மீண்டும் அரசியல் அமாவாசை ஆரம்பித்துவிட்டது.