குண்டு கல்யாணம் வீட்டில் எம்.ஜி.ஆர்.!!

சென்னை:நடிகரும், அதிமுக பேச்சாளருமான குண்டு கல்யாணம் வீட்டில் எம்.ஜி.ஆர். உருவம் போன்ற நிழல் தென்பட்டதாக புருடா பரவியது. இதைப் பார்க்க பலரும் அங்கு கூடியதால் பெரும் பரபரப்பு ஏற்பட்டது.

நடிகர் குண்டு கல்யாணத்துக்கு சினிமா வாய்ப்புகள் சுத்தமாக இல்லை. இதனால் அதிமுகவில் மிகத் தீவிரமான தொண்டராக இருந்து வருகிறார். தேர்தல் நேரத்தில் தமிழகம் முழுவதும் சூறாவளி பிரச்சாரம் செய்வார்.

கல்யாணத்தின் வீடு சென்னை ராயப்பேட்டை லாயிட்ஸ் காலனியில் உள்ளது. நேற்று கல்யாணம் வீட்டின் மின் விளக்கைப் போட்டபோது கட்டிலின் நிழல், எம்.ஜி.ஆர். படுத்திருப்பதைப் போன்று தெரிந்ததாம்.

உடனே கல்யாணம், அக்கம் பக்கத்தினரை அழைத்தார். அனைவரும் ஓடி வந்து அந்த நிழலைப் பார்த்தனர்.

எம்.ஜி.ஆர். படுத்திருப்பதைப் போலவே இருப்பதாக கல்யாணம் சொன்னதை சிலர் ஏற்றனர். பலர் மறுத்தனர்.

ஆனாலும் தகவல் தெரிந்ததும் ஏராளமானோர் அங்கு குவிந்துவிட்டனர். இதனால் குண்டு கல்யாணத்தின் வீட்டில் கூட்டம் அலை மோதியது.