சிவாஜி போஸ்டர்களுக்கு மதுரையில் தடை

மதுரை:இடைத் தேர்தல் நடைபெறும் மதுரை மேற்குத் தொகுதிக்குள் ரஜினிகாந்த்தின் சிவாஜி பட சுவரொட்டிகளை ஒட்ட தேர்தல் ஆணையம் தடை விதித்துள்ளது. சுவரொட்டிகளை அப்புறப்படுத்தும் நடவடிககையும் முடுக்கி விடப்பட்டுள்ளது.

ரஜினிகாந்த் நடித்த சிவாஜி ஜூன் 15ம் தேதி ரிலீஸ் ஆகிறது. இதையொட்டி மதுரை நகர் முழுவதும் சிவாஜி பட சுவரொட்டிகள், கட் அவுட்கள் தூள் பறக்கின்றன.

இந்த நிலையில் இடைத் தேர்தல் நடைபெறும் மதுரை மேற்குத் தொகுதிக்குள் சிவாஜி பட சுவரொட்டிகளை ஒட்டக் கூடாது என தேர்தல் ஆணையம் உத்தரவிட்டுள்ளது. தொகுதிக்குள் ஒட்டப்பட்டிருந்த சுவரொட்டிகளும் அப்புறப்படுத்தப்பட்டன. இதனால் ரஜினி ரசிகர்கள் ஆத்திரமடைந்தனர்.

சிவாஜி சுவரொட்டிகளை அப்புறப்படுத்தக் கூடாது, அனுமதிக்க வேண்டும் என்று கூறி தேர்தல் பார்வையாளரான அஜய் தியாகியிடம் மாவட்ட ரசிகர் மன்றம் சார்பில் மனு கொடுக்கப்பட்டது.

அதற்கு அஜய் தியாகி ரசிகர் மன்ற நிர்வாகிகளிடம் பேசுகையில், கோபப்படாதீங்க, நானும் ரஜினி ரசிகர்தான். அங்கு இங்கு மட்டுமல்ல,உலகின் பல பகுதிகளிலும் ரசிகர்கள், மன்றங்கள் உள்ளன.எனவே சிவாஜிக்கு எதிராக நான் செயல்படவில்லை. ஆனால்,தேர்தல் நடைபெறும் மதுரை மேற்குத் தொகுதிக்குள், சுவெராட்டிகள் ஒட்டக் கூடாது. அதனால்தான் அகற்றினோம் என்று கூறி அனுப்பி வைத்தார்.