ஜெட் ஏர்வேசின் நியூயார்க்-மும்பை தினசரி சேவை

நியூயார்க்:இந்தியாவின் முன்னணி தனியார் விமான நிறுவனமான ஜெட் ஏர்வேஸ் வரும் ஆகஸ்ட் 5 முதல் நியூயார்க்-மும்பை இடையே தினசரி விமான சேவையை தொடங்கவிருக்கிறது.

இந்த விமானம் பெல்ஜியம் தலைநகர் பிரஸல்ஸ் வழியாகச் செல்லும்.

நியூஜெர்சி நகரின் நிவார்க் சர்வதேச விமான நிலையத்திலிருந்து அமெரிக்க நேரப்படி தினமும் இரவு 8.25க்கு புறப்படும் விமானம் அடுத்தநாள் இரவு இந்திய நேரப்படி 11.30 மணிக்கு மும்பை வந்து சேரும்.

அதே போல் மும்பையிலிருந்து இந்திய நேரப்படி மதியம் 2.10க்கு புறப்படும் விமானம் அதே நாள் அமெரிக்க நேரப்படி காலை 11.55 மணிக்கு நிவார்க் விமான நிலையத்தை சென்றடையும்.

மத்திய அரசின் ஏர்-இந்நியா நிறுவனம் நியூயார்க்-மும்பை இடையே புதிய நேரடி விமான சேவையை ஆரம்பித்துள்ளது. அந்த சேவை இன்றிலிருந்து செயல்பட இருக்கிறது என்பது குறிப்பிடத்தக்கது.

ஜெட் ஏர்வேஸ் தனது விமான சேவையை 3.7 பில்லியன் டாலர்கள் மதிப்பில் விரிவுபடுத்தப்பட உள்ளது. போயிங் 777 மற்றும் ஏர்பஸ் 330 உட்பட 20 விமானங்களை வாங்கவும் திட்டமிட்டுள்ளது குறிப்பிடத்தக்கது.