சனிப்பெயர்ச்சி: திருநள்ளாறில் பக்தர்கள் சனி வழிபாடு

காரைக்கால்:சனிப் பெயர்ச்சியையொட்டி காரைக்காலை அடுத்துள்ள திருநள்ளாறில் சனி பகவான் ஆலயத்தில் லட்சக்கணக்கான பக்தர்கள் இன்று தரிசனம் செய்து வழிபட்டனர்.

30 மாதங்களுக்கு ஒரு முறை சனிப் பெயர்ச்சி நடைபெறும். ஒரு ராசியிலிருந்து இன்னொரு ராசிக்கு சனி பகவான் இடம் பெயருவார். அந்த வகையில் இன்று பிற்பகல் 12.19 மணிக்கு கடக ராசியிலிருந்து சிம்ம அணிக்கு சனி பகவான் இடம் பெயர்ந்தார்.

இதையொட்டி திருநள்ளாறில் உள்ள சனி பகவான் ஆலயத்தில் சிறப்பு அபிஷேகங்கள், வழிபாடுகள் நடந்தன.

இதையொட்டி லட்சக்கணக்கான பக்தர்கள் திருநள்ளாறில் குவிந்துள்ளனர். நள தீர்த்தத்தில் குளித்து விட்டு ஆலயப் பிரவேசம் செய்து சனி பகவானை பக்தர்கள் தரிசித்து வருகின்றனர்.

இதையொட்டி திருநள்ளாறில் பலத்த பாதுகாப்புக்கு ஏற்பாடு செய்யப்பட்டுள்ளது.

இதேபோல தேனி மாவட்டம் குச்சனூரில் உள்ள சனி பகவான் ஆலயத்திலும் ஆயிரக்கணக்கான பக்தர்கள் தரிசனம் செய்தனர்.