2 கிராம் தங்கத்தில் சைக்கிள் செய்து சாதனை!

நாகப்பட்டினம்:

தமிழகத்தை சேர்ந்த வாலிபர் ஒருவர், ஒரே மாதத்தில் 2 கிராம் தங்கத்தில் மிகச் சிறிய சைக்கிளை செய்து சாதனை செய்துள்ளார்.

நாகை மாவட்டம் மயிலாடுதுறை கூறைநாடு அருகேயுள்ளது தணியூர் என்ற சிறிய கிராமம். இங்குள்ள வாணிபத் தெருவைச் சேர்ந்த குஞ்சிதபாதம். நகைத் தொழிலாளி. இவரது மகன் சீனீவாசன். சிறு வயது முதலே சாதனை செய்ய வேண்டும் என தீராத ஆர்வம் கொண்டவர்.

இந்த ஆர்வத்தின் காரணமாக ஒரே மாதத்தில் 2 கிராம் தங்கத்தில் மிகச் சிறிய சைக்கிளை செய்து சாதனை படைத்துள்ளார் சீனீவாசன். பெரிய சைக்கிள்களுக்கு என்ன என்ன பொருட்கள் உண்டோ அதே போன்று வடிவமைத்துள்ளார்.

இதனை கண்டு அப்பகுதி ரோட்டரி லயன்ஸ் நிர்வாகிகள் சீனீவாசனுக்கு பாராட்டு தெரிவித்துள்ளனர். சாதனை செய்யும் இதே போன்ற இளைஞர்களுக்கு அரசு தானாக முன்வந்து மேலும் சாதனைகள் செய்ய ஊக்குவிக்க வேண்டும் என்பதே பலரது எதிர்பார்ப்பு ஆகும்.