பாஜக அலுவலகத்திற்கு வளையல், சேலை!

கோவை: சேலம் ரயில் கோட்டத்தை எதிர்த்து பாஜகவினர் கேரளாவில் பந்த் நடத்தியதைக் கண்டித்து, தமிழக பாஜக அலுவலகங்களுக்கு இந்து மக்கள் கட்சி சார்பில் சேலை, வளையல் போன்றவை அனுப்பப்பட்டது.

சேலம் ரயில்வே கோட்டம் நேற்று உதயமானது. இதற்கு எதிர்ப்பு தெரிவித்து நேற்று கேரளாவில் பாஜக சார்பில் முழு அடைப்புப் போராட்டம் நடத்தப்பட்டது.

இதற்கு இந்து மக்கள் கட்சி கடும் கண்டனம் தெரிவித்திருந்தது. சேலம் கோட்டத்தை கேரள பாஜகவினர் எதிர்க்கின்றனர். இதேபோல பெங்களூரில் திருவள்ளுவர் சிலையை திறப்பதற்கு எதிர்ப்பு தெரிவித்துள்ள பாஜகவைச் சேர்ந்த முன்னாள் எம்.எல்.ஏ நீதிமன்றத்தில் தடை உத்தரவு வாங்கியுள்ளார்.

எனவே இப் பிரச்சனைகளில் தமிழக பாஜக தனது நிலைப்பாட்டை தெளிவு படுத்த வேண்டும். இல்லாவிட்டால், பாஜக அலுவலகங்களுக்கு சேலை, வளையல்களை அனுப்பி வைப்போம் என்று இந்து மக்கள் கட்சி கூறியிருந்தது.

இந்த நிலையில் நேற்று பாஜக அலுவலகங்களுக்கு இந்து மக்கள் கட்சி சேலை, வளையல்களை அனுப்பி வைத்து சலசலப்பை ஏற்படுத்தியுள்ளது.