ஆபாச சிடி தயாரித்த வாலிபருக்கு போலீஸ் வலை

திருநெல்வேலி: நெல்லையில் ஆபாச படங்களின் டிவிடி மற்றும் சிடிக்கள் தயாரித்து விற்பனை செய்து வந்த வாலிபரை போலீசார் தேடி வருகின்றனர்.

அவரது வீட்டிலிருந்த ரூ. 2 லட்சம் மதிப்புள்ள ஆபாச பட டிவிடி, சிடிக்களையும் அதை தயார் செய்ய பயன்படுத்திய கம்ப்யூட்டர்க், காப்பியர்கள் ஆகியவற்றையும் போலீசார் பறிமுதல் செய்ததோடு அவருடைய வீட்டிற்கும் சீல் வைத்தனர்.

நெல்லை, தச்சநல்லூர் அருகேயுள்ள மேலக்கரை கிராமத்தில் திருட்டு விசிடி மற்றும் டிவிடிகள் லைசென்ஸ் இல்லாமலும், அரசு அனுமதி பெறாமலும், தயார் செய்து விற்பனை செய்து வருவதாக போலீசாருக்கு ரகசிய தகவல் கிடைத்தது.

இத்தகவலின் பேரில் உதவி போலீஸ் கமிஷனர் ஞானசேகரன் தலைமையில் தனிப் படையினர் விசாரணை நடத்தி மேலக்கரை கிராமத்தில் உள்ள ஒரு வீட்டை சுற்றி வளைத்தனர்.

ஆனால் திருட்டு விசிடி தயாரிப்பதாக சொல்லப்பட்ட அந்த வீடு பூட்டப்பட்டிருந்தது. அந்த வீட்டை போலீசார் பூட்டை உடைத்து திறந்து சோதனை நடத்தினர்.

வீட்டிற்குள் அரசின் லைசென்ஸ் பெறாத சிவாஜி, மற்றும் அழகிய தமிழ்மகன் உள்ளிட்ட சில சினிமா சிடிக்கள் இருந்தன. மேலும் அந்த வீட்டில் சுமார் 1,000க்கும் மேற்பட்ட ஆபாச டிவிடி மற்றும் சிடிக்கள் இருந்தன.

அவற்றையும் கம்ப்யூட்டர், சிடி ரைட்டர்கள், டிவிடி காப்பியர்கள் உள்ளிட்ட பொருட்களை போலீசார் பறிமுதல் செய்து வீட்டிற்கு சீல் வைத்தனர்.

இது குறித்து போலீஸ் கமிஷனர் மஞ்சுநாதா கூறுகையில்,

திருட்டு சிடி தயாரித்த காமராஜ் என்பவர் சிந்துபூந்துரையை சேர்ந்தவர். அவர் போலீசார் சோதனை நடத்த வருவது தெரிந்து தலைமறைவாகி விட்டார். அவரைப் பிடிக்க தனிப்படை அமைக்கப்பட்டுள்ளது.

இவருடன் வேறு யாராவது தொடர்பு வைத்து இந்த டிவிடிக்களை விற்பனை செய்தார்களா என்பது குறித்து விரிவான விசாரணைக்கு உத்தரவிடப்பட்டுள்ளது.

காமராஜ் மீது நெல்லை, ஜங்சன் காவல் நிலையத்தில் பல வழக்குகள் நிலுவையில் உள்ளன என்றார்.