ஆஸி. தேர்தலில் ஹோவர்ட் படுதோல்வி - புதிய பிரதமர் கெவின் ரூட்

பிரிஸ்பேன்: ஆஸ்திரேலிய தேர்தலில் பிரதமர் ஜான் ஹோவர்ட் படு தோல்வி அடைந்தார். அவரது ஆட்சியும் பறிபோனது. தொழிலாளர் கட்சி ஆட்சியைப் பிடித்துள்ளது. அக்கட்சியின் தலைவர் கெவின் ரூட் புதிய பிரதமராகிறார்.

ஆஸ்திரேலியாவில் நடந்த பொதுத் தேர்தலில் கடந்த 11 ஆண்டுகளாக ஆட்சிப் பொறுப்பில் இருந்து வந்த ஹோவர்ட் ஆட்சிக்கு முடிவு கட்டப்பட்டுள்ளது.

ஆட்சியைப் பறி கொடுத்த ஹோவர்ட், தனது சொந்தத் தொகுதியான பென்னிலாங்கிலும் படு தோல்வி அடைந்துள்ளார். அங்கு தொழிலாளர் கட்சியைச் சேர்ந்த பெண் வேட்பாளர் வெற்றி பெற்றுள்ளார். இதன் மூலம் கடந்த 1929ம் ஆண்டுக்குப் பிறகு பதவியில் இருந்த ஒரு பிரதமர் சொந்த்த தொகுதியில் தோற்ற பரிதாபத்தை ஹோவர்ட் சந்தித்துள்ளார்.

தேர்தலில் வெற்றி பெற்ற பின்னர் தனது கட்சி நிர்வாகிகளோடு, தொண்டர்களைச் சந்தித்தார் கெவின் ரூட். அவர்கள் மத்தியில் ரூட் பேசுகையில், புதிய பாதையில் ஆஸ்திரேலியாவை வழி நடத்திச் செல்வேன். ஆஸ்திரேலியாவின் நட்பு நாடுகளோடு உறவு வலுப்படுத்தப்படும். ஆஸ்திரேலியாவின் எதிர்காலத்தை பிரகாசமாக்க பாடுபடுவேன்.

ஆசிய நாடுகள் முழுமைக்கும், ஐரோப்பாவில் உள்ள பிற நட்பு நாடுகளுக்கும் நாம் இன்று நல்ல செய்தியை அனுப்பியுள்ளோம். ஈராக்கில் நிலை கொண்டுள்ள ஆஸ்திரேலிய படைகளை வாபஸ் பெற நடவடிக்கை எடுக்கப்படும் என்றார் ரூட்.

கடந்த 1996ம் ஆண்டு தொழிலாளர் கட்சி ஹோவர்ட் கட்சியிடம் ஆட்சியை இழந்தது. அதன் பின்னர் இப்போது மீண்டும் ஆட்சிக்கு வந்துள்ளது.

ஹோவர்ட்டுக்கு எதிரான மக்கள் அதிருப்தி, அவரது வெளியுறவுக் கொள்கைகளால் ஏற்பட்ட பெரும் அதிருப்தி ஆகியவைதான் அவரது ஆட்சிக்கு உலை வைத்து விட்டன.

மாறாக, கெவின் ரூட், ஹோவர்ட்டைப் போல அல்லாமல், அமெரிக்காவை வெறுப்பவர். ஆசிய நாடுகள் மீது பாசம் கொண்டவர். சீனாவுடனும், பிற ஆசிய நாடுகளுடனும் உறவை வலுப்படுத்திக் கொள்வதில் ஆர்வம் கொண்டவர். மேலும், ஈராக்கில் ஆஸ்திரேலிய படைகள் இருப்பதையும் எதிர்த்து வருபவர்.

ரூட் பிரதமர் பதவிக்கு வருவதன் மூலம் ஆஸ்திரேலியாவின் வெளியுறவுக் கொள்கையில் பெரும் மாற்றம் ஏற்படும் என்று நம்பப்படுகிறது. மேலும் அமெரிக்காவுடனான ஆஸ்திரேலியாவின் நெருக்கமும் குறையும் எனத் தெரிகிறது.

பொதுத் தேர்தலில் ரூட் கட்சி வெற்றி பெற்றாலும் கூட, நாடாளுமன்ற மேல் சபையில் (செனட்) இன்னும் ஹோவர்ட் கட்சிக்குத்தான் பெரும்பான்மை பலம் உள்ளது. அடுத்த ஆண்டு ஜூலை மாதம்தான் செனட் சபைக்கு தேர்தல் வருகிறது. எனவே அதுவரை ஹோவர்ட் கட்சியினரின் இடைஞ்சல்களை தொழிலாளர் கட்சி சந்திக்க வேண்டியிருக்கும்.