ஒரே எம்.ஐ.எம். எம்.பி அரசுக்கு ஆதரவு

ஹைதராபாத்: ஒரே ஒரு எம்.பி.யை கொண்டுள்ள ஆந்திர மாநில, மஜ்லிஸ் இ இத்தேஹதுல் முஸ்லிமீன் கட்சி, நம்பிக்கை தீர்மானத்திற்கு ஆதரவாக வாக்களிக்க முடிவு செய்துள்ளது.

எம்.ஐ.எம். எனப்படும் இந்தக் கட்சியின் எம்.பியான அசதுதின் ஓவைசி இதுகுறித்து ஹைதராபாத்தில் செய்தியாளர்களிடம் பேசுகையில், பாஜக ஆட்சிக்கு வந்து விடக் கூடாது என்பதுதான் எங்களது முக்கிய எண்ணம். எனவே அரசுக்கு ஆதரவாக வாக்களிப்போம்.

இந்திய - அமெரிக்க அணு சக்தி ஒப்பந்தம் எந்த வகையிலும், எந்த மதத்திற்கும் எதிரானதல்ல. எனவே இது முஸ்லீம்களுக்கு எதிரானது என்று கூறுவது தவறு.

ஆனால் சில கட்சிகள், இது முஸ்லீம்களுக்கு எதிரானது என்று பிரசாரம் செய்து முஸ்லீம்களுக்கும், பிற சமுதாயத்தினருக்கும் இடையே பிளவை ஏற்படுத்த முயலுகின்றன. இதை ஏற்க முடியாது என்றார்.