பெட்ரோல் (ரூ.4), டீசல் (ரூ.2) விலை அதிரடி உயர்வு

டெல்லி: ஐக்கிய முற்போக்குக் கூட்டணி மீண்டும் பதவியேற்ற பின்னர் முதல் முறையாக இன்று பெட்ரோல், டீசல் விலை உயர்த்தப்பட்டுள்ளது.

பெட்ரோல் லிட்டருக்கு ரூ. 4ம், டீசல் லிட்டருக்கு ரூ. 2ம் உயர்த்தப்பட்டுள்ளது.

இன்று பிரதமர் மன்மோகன் சிங்கை, பெட்ரோலியத் துறை அமைச்சர் முரளி தியோரா சந்தித்து இதுகுறித்து ஆலோசனை நடத்தினார். அதன் பின்னர் பெட்ரோல், டீசல் விலை உயர்வு குறித்த அறிவிப்பு வெளியிடப்பட்டது.

அதன்படி பெட்ரோல் விலை லிட்டருக்கு 4 உயர்த்தப்பட்டுள்ளது. டீசல் விலை ரூ. 2 உயர்த்தப்பட்டுள்ளது. இன்று நள்ளிரவு 12 மணி முதல் இந்த விலை உயர்வு அமலுக்கு வருகிறது.

சர்வதேச சந்தையில் கச்சா எண்ணெயின் விலை பேரலுக்கு 72 டாலராக உயர்ந்திருப்பதால், எண்ணெய் நிறுவனங்களின் தொடர் வலியுறுத்தலைத் தொடர்ந்து பெட்ரோல், டீசல் விலையை மத்திய அரசு உயர்த்தியுள்ளது.

பெட்ரோல், டீசல் விலை உயர்த்தப்பட்டபோதிலும் சமையல் எரிவாயு மற்றும் மண்ணெண்ணை ஆகியவற்றின் விலையில் எந்த மாற்றமும் இல்லை.