சோனியாவை சந்திக்கிறார் திருநாவுக்கசர் - காங்.கில் இணைகிறார்

சென்னை: தமிழகத்தின் மூத்த அரசியல் தலைவர்களில் ஒருவரான எஸ்.திருநாவுக்கரசர் பாஜகவுக்கு முழுக்குப் போட்டு விட்டு காங்கிரஸ் கட்சியில் இணையவுள்ளார். இதற்காக வருகிற 20ம் தேதி சோனியா காந்தியை திருநாவுக்கரசர் சந்தித்துப் பேசுகிறார்.

1977-ம் ஆண்டு அ.தி.மு.க. சார்பில் அறந்தாங்கி சட்டமன்ற தொகுதியில் போட்டியிட்டு வெற்றி பெற்றவர் திருநாவுக்கரசர். அத் தேர்தலுக்குப் பின்னர் துணை சபாநாயகராக்கினார் எம்.ஜி.ஆர். அன்று முதல் எம்.ஜி.ஆர். மனதில் மட்டுமல்லாமல் அவரது அரசிலும் முக்கியப் பங்கு வகித்து வந்தார் திருநாவுக்கரசர்.

எம்.ஜி.ஆர். இளைஞர் அணி மாநில செயலாளராகவும் திருநாவுக்கரசர் நியமிக்கப்பட்டார். எம்.ஜி.ஆரின் அன்புக்கு பாத்திரமான அவர், எம்.ஜி.ஆர். மறைவுக்குப் பின்னர் ஜெயலலிதா, அதிமுகவின் தலைவியாக உருவெடுப்பதற்கு மிகவும் உதவியாக இருந்தவர் திருநாவுக்கரசர்.

இவரும், சாத்தூர் ராமச்சந்திரனுரம், ஜெயலலிதா ஆதரவு எம்.எல்.ஏக்களுடன் ஆம்னி பஸ்களில் ஊர் ஊராக சென்ற காட்சி தமிழக மக்கள் மனதிலிருந்து இன்னும் கூட மறைந்திருக்காது.

சில காலம் கழித்து எம்.ஜி.ஆர். அ.தி.மு.க. என்ற தனிக்கட்சியை தொடங்கினார்.பின்னர் அதைக் கலைத்து விட்டு அதிமுகவில் மீண்டும் இணைந்தார். பிறகு மீண்டும் அங்கிருந்து வெளியேறினார்.

கடைசியாக அவர் பாஜகவில் இணைந்தார். அங்கு ராஜ்யசபா எம்.பியாக தேர்ந்தெடுக்கப்பட்டார். தேசிய செயலாளராக தற்போது இருக்கிறார். வாஜ்பாய் அமைச்சரவையில் இடம் பெற்று இணை அமைச்சராக செயல்பட்டவர் திருநாவுக்கரசர்.

இந்த நிலையில் பாஜகவுக்கு முழுக்குப் போட முடிவு செய்துள்ளார் திருநாவுக்கரசர். அங்கிருந்து தற்போது காங்கிரஸுக்கு வரவுள்ளார்.

சில நாட்களுக்கு முன்பு டெல்லி சென்ற அவர், ராகுல் காந்தியை சந்தித்து பேசியுள்ளார். பின்னர் சோனியாகாந்தி, பிரதமர் மன்மோகன்சிங், சோனியாவின் அரசியல் ஆலோசகர் அகமது பட்டேல், ஆஸ்கர் பெர்னாண்டஸ், பிரணாப் முகர்ஜி, ப.சிதம்பரம், ஜி.கே.வாசன் என பலரையும் அவர் சந்தித்து பேசினார்.

இந்த நிலையில் அவர் 20-ந் தேதி டெல்லி செல்கிறார். அங்கு அவர் மீண்டும் சோனியா காந்தி, ராகுல் காந்தி மற்றும் தலைவர்களை சந்தித்து காங்கிரசில் இணைவது பற்றிய அதிகாரப்பூர்வ அறிவிப்பை வெளியிடுகிறார்.

இதையடுத்து தீபாவளிக்குப் பின்னர் அல்லது சில நாட்களுக்கு முன்பாக மதுரை அல்லது திருச்சியில் நடைபெறும் பிரமாண்ட பொதுக் கூட்டத்தில் காங்கிரஸில் சேருகிறார் திருநாவுக்கரசர். இந்த இணைப்பு நிகழ்ச்சிக்கு அனேகமாக ராகுல் காந்தி வரக் கூடும் எனத் தெரிகிறது.

அதிமுகவிலிருந்து வெளியேறிய பின்னர் தனிக் கட்சி, மீண்டும் அதிமுக, பாஜக என சென்று கொண்டிருந்த திருநாவுக்கரசர் தற்போது இன்னொரு தேசியக் கட்சியான காங்கிரஸுக்குச் செல்கிறார். இருப்பினும் அவர் திமுகவில் இதுவரை சேர்ந்ததில்லை என்பது குறிப்பிடத்தக்கது.