ஐடி பூங்கா: சிறிய நிறுவனங்களுக்கு முன்னுரிமை- அமைச்சர் பூங்கோதை

திருச்சி: தமிழகத்தில் வேலை வாயப்பை பெருக்கும் வகையில், தகவல் தொழில்நுட்ப பூங்காக்களில் சிறிய நிறுவனங்களுக்கும் முன்னுரிமை அளிக்கப்படும் என்று தகவல் தொழில்நுட்பவியல் துறை அமைச்சர் பூங்கோதை தெரிவித்துள்ளார்.

இது குறித்து தமிழக தகவல் தொழில்நுட்பவியல் துறை அமைச்சர் பூங்கோதை திருச்சியில் செய்தியாளர்களிடம் பேசுகையில்,

தமிழகத்தில் இளைஞர்களுக்கு வேலை வாய்ப்பை உருவாக்குவது குறித்து மாணவர்களிடம் எடுத்துக் கூறும் நோக்கில் எல்காட் நிறுவனமும், நாஸ்காம் நிறுவனமும் இணைந்து எம்பவர் ஐ.டி என்ற நிகழ்ச்சி நடத்தி வருகின்றது.

கடந்த ஆண்டு இந்த நிகழ்ச்சி நெல்லையில் நடத்தியது. இதில் 17 ஆயிரம் மாணவர்கள் பயனடைந்தனர்.

இதன் அடுத்த கட்டமாக தற்போது, திருச்சியில் கேர் கல்வி வளாகத்தில் டிசம்பர் 4 ம் தேதி நடைபெற உள்ளது.

இந்த நிகழ்ச்சியில் மத்திய மண்டலத்துக்குட்பட்ட மாவட்டங்களில் இருந்து 106 கல்லூரிகளைச் சேர்ந்த 10 ஆயிரம் முதல் 12 ஆயிரம் மாணவர்கள் பங்கேற்க உள்ளனர்.

இந்த நிகழ்ச்சியில் நானும், தமிழக அமைச்சர்கள் கே.என். நேரு, செல்வராஜ், கனிமொழி எம்.பி, தகவல் தொழில்நுட்பவியல் துறை செயலர் டேவிதார் மற்றும் தகவல் தொழில்நுட்ப நிறுவனத்தின் பிரதிநிதிகள் பங்கேற்க உள்ளனர்.

இதனையடுத்து அடுத்த ஆண்டு மதுரையில், எம்பவர் ஐ.டி நிகழ்ச்சி நடத்தப்படும். இதனால் தமிழத்தில் உள்ள ஆறு இரண்டாம் நிலை நகரங்கள் வளர்ச்சி பெறுவதோடு, தமிழகமும் முன்னேற்றமடையும்.

திருச்சியில் தகவல் தொழில்நுட்ப பூங்காவுக்கான அடிப்படை உள்கட்டமைப்பு பணிகள் மூன்று மாதத்தில் நிறைவடையும். இதில், ஒன்பது நிறுவனங்கள் இடம் பெறுகின்றன.

மதுரையில் எச்.சி.எல் உள்ளிட்ட ஏழு நிறுவனங்களும், நெல்லையில் இரண்டு நிறுவனங்களும் இடம் பெற முன்வந்துள்ளன.

வேலைவாய்ப்பை உருவாக்குவது தான் முக்கிய நோக்கம் என்பதால் தகவல் தொழில்நுட்ப பூங்காவில் சிறிய நிறுவனங்களும் வந்தால் வரவேற்போம் என்றார்.