2ஜி ஊழல் வழக்கு: சிறப்பு நீதிமன்றத்தில் இன்று மீண்டும் விசாரணை-கனிமொழி, ராசா ஆஜர்

டெல்லி: கோடை விடுமுறைக்கு பின் இன்று திறக்கப்படும் டெல்லி சிறப்பு நீதிமன்றத்தில் 2ஜி ஸ்பெக்ட்ரம் வழக்கு விசாரணை மீண்டும் துவங்கவிருக்கிறது.

விசாரணையைத் தொடர்ந்து கனிமொழி, ராசா உள்ளிட்டோர் சிறப்பு சிபிஐ கோர்ட்டில் ஆஜர்படுத்தப்படுகின்றனர்.

2ஜி ஸ்பெக்ட்ரம் வழக்கு டெல்லி சிறப்பு சிபிஐ நீதிமன்றத்தில் நடந்து வருகிறது. கோடை விடுமுறைக்காக மூடப்பட்ட நீதிமன்றம் இன்று திறக்கப்படுகிறது. இதையடுத்து 2ஜி உள்ளிட்ட பல வழக்கு விசாரணை இன்று மீண்டு துவங்குகிறது.

2ஜி விவகாரத்தில் முன்னாள் அமைச்சர் ஆ.ராசா, கனிமொழி எம்.பி., கலைஞர் டிவி இயக்குனர் சரத் குமார் ஆகியோர் கைது செய்யப்பட்டு திஹார் சிறையில் அடைக்கப்பட்டுள்ளனர். கனிமொழி எம்பிக்கு ஜாமீன் கொடுக்க மறுத்த உச்ச நீதிமன்றம் சிறப்பு நீதிமன்றத்தில் ஜாமீன் கேட்டு விண்ணப்பிக்குமாறு அவரிடம் கூறியது.

இந்நிலையில் விடுமுறை முடிந்து இன்று நீதிமன்றம் திறக்கப்படுகிறது. இதையடுத்து 2ஜி ஊழல் வழக்கு விசாரணை மீண்டும் துவங்குகிறது. இந்த வழக்கில் இதுவரை 2 குற்றப்பத்திரிக்கைகளை சிபிஐ தாக்கல் செய்துள்ளது. இதில் 14 தனி நபர்கள் மற்றும் 3 தொலைத் தொடர்பு நிறுவனங்கள் உள்பட மொத்தம் 17 பேர் மீது குற்றம் சாட்டப்பட்டுள்ளது.

ஜூலை 2-வது வாரத்தில் தனது மூன்றாவது குற்றப்பத்திரிக்கையை சிபிஐ தாக்கல் செய்யப்படும் என்று தெரிகிறது.

முதல் குற்றப்பத்திரிக்கை ஏப்ரல் 2-ம் தேதி தாக்கல் செய்யப்பட்டது. அதில் ராசா, பல்வா, முன்னாள் தொலைத் தொடர்புத்துறை செயலாளர் சித்தார்த் பஹுரா, ராசாவின் உதவியாளர் சந்தோலியா, யூனிடெக் நிறுவன எம்.டி. சஞ்சய் சந்திரா, டிபி ரியாலிட்டி பிரமோட்டர் வினோத் கோயங்கா, ரிலையன்ஸ் அடாக் அதிகாரிகள் ஹரி நாயர், சுரேந்திர பிபாரா, கௌதம் தோஷி ஆகியோரின் பெயர்கள் இடம் பெற்றன.

2-வது குற்றப்பத்திரிக்கையில் கனிமொழி, கலைஞர் டிவி நிர்வாக இயக்குநர் சரத்குமார் ரெட்டி ஆகியோரின் பெயர்கள் இடம் பெற்றன என்பது நினைவிருக்கலாம்.

முனனாள் அமைச்சர் ராசா, திமுக எம்.பி. கனிமொழி, ஸ்வான் டெலிகாம் நிறுவன பிரமோட்டர் ஷாஹித் உஸ்மான் பல்வா உள்ளிட்ட 14 பேர் சிறப்பு நீதிமன்ற நீதிபதி ஓ.பி.ஷைனி முன்பு இன்று ஆஜர்படுத்தப்படுகின்றனர்.

English summary

Delhi special court resumes its function from today after being closed for summer vacation. Hence, 2G scam hearing will start again from today. Former minister A. Raja, Kanimozhi MP and others will be produced before the special court judge O.P. Saini.