அமெரிக்க அதிபராக 2வது முறையாகப் பதவியேற்றார் பராக் ஒபாமா

வாஷிங்டன்: அமெரிக்க அதிபராக 2வது முறையாக பராக் ஒபாமா நேற்று பதவியேற்றுக் கொண்டார். இருப்பினும் இன்று மீண்டும் நடைபெறும் பதவியேற்பு விழாவில் மறுபடியும் அவர் பதவியேற்கவுள்ளார்.

நேற்று நடந்த எளிமையான நிகழ்ச்சியில் உச்சநீதிமன்ற தலைமை நீதிபதி ஜான் ராபர்ட்ஸ் ஒபாமாவுக்குப் பதவிப்பிரமாணம் செய்து வைத்தார்.

முன்னதாக ஞாயிற்றுக்கிழமை மதியம் 12 மணிக்கு அவரது முதல் பதவிக் காலம் முடிவுக்கு வந்தது. கடந்த ஆண்டு நவம்பரில் அதிபர் தேர்தல் நடைபெற்று அவர் வெற்றிபெற்ற போதிலும் ஞாயிற்றுக்கிழமை மதியம்தான் அவரது இரண்டாம் பதவிக்காலம் தொடங்கியது.

மனைவி மிஷல் ஒபாமாவின் தந்தை அவருடைய தாயாருக்கு அறுபது ஆண்டுகளுக்கு முன்பு பரிசளித்த பைபிள் சாட்சியாக ஒபாமா பதவிப் பிரமாணம் எடுத்துக் கொண்டார்.

முன்னதாக, அமெரிக்கத் துணை அதிபராக ஜோ பிடன் வாஷிங்டனில் ஞாயிற்றுக்கிழமை பதவியேற்றார். தலைநகர் வாஷிங்டனில் பிடனின் அதிகாரபூர்வ இல்லத்தில் அமெரிக்க உச்ச நீதிமன்ற துணை நீதிபதி சோனியா ஸோட்டாமேயர் பதவிப் பிரமாணம் செய்துவைத்தார்.

அமெரிக்க அதிபராக தேர்ந்தெடுக்கப்படுபவர் ஜனவரி 20ம் தேதி பதவியேற்க வேண்டும் என்பது அங்குள்ள அரசியல்சாசனம் கூறுகிறது. எனவேதான் நேற்று ஒபாமா பதவியேற்றார். ஆனால்நேற்று அரசு விடுமுறை என்பதால் பெரிய அளவிலான விழா போல அது நடைபெறவில்லை. அதனால்தான் இன்று மீண்டும் பிரமாண்டமான ஒரு நிகழ்ச்சியில் ஒபாமா மீண்டும் பதவிப்பிரமாணம் எடுத்துக் கொள்ளவுள்ளார்.

இதுபோன்று இரு முறை பதவியேற்கும் 7வது அதிபர் ஒபாமா ஆவார் என்பது குறிப்பிடத்தக்கது.

English summary

Stepping into his second term, President Barack Obama took the oath of office Sunday in an intimate swearing-in ceremony at the White House, the leader of a nation no longer in the throes of the recession he inherited four years ago but still deeply divided.