அட பாருங்களேன்.. வீட்டுக்கு நரேந்திர மோடி பெயர்.. கர்நாடக பாஜக தொண்டரின் விசுவாசம்!

Published: Sunday, May 1, 2022, 10:51 [IST]

Subscribe to Oneindia Tamil

பெங்களூர்: கர்நாடகத்தில் பாஜக தொண்டர் ஒருவர் தான் புதிதாக கட்டிய வீட்டுக்கு பிரதமர் நரேந்திர மோடியின் பெயர் சூட்டி உள்ளார். இந்த வீட்டுக்கு நாளை மறுநாள் (மே 3) கிரகப்பிரவேஷம் நடத்தப்பட உள்ளது. இந்த வீட்டின் படம் தற்போது இணையதளத்தில் வேகமாக பரவி வருகிறது.

கர்நாடக மாநிலம் தாவணகெரே மாவட்டம் சென்னகிரி டவுன் ககதூர் ரோட்டில் வசித்து வருபவர் ஹாலேஸ். பா.ஜனதா தொண்டரான இவர்பிரதமர் நரேந்திர மோடியின் தீவிரமான தொண்டர்.

இவரது மகள் புவனேஸ்வரி திருமணம் முடிந்து ஆஸ்திரேலியாவில் உள்ள நியூ சவுத் வேல்ஸ் நகரில் தனது கணவருடன் வசித்து வருகிறார். இந்த நிலையில் ஹாலேஸ் தனது மகளுக்காக வீடு கட்ட முடிவு செய்தார்.

மகளுக்காக கனவு இல்லம்

அதன்படி அவர் தனக்கு சொந்தமான நிலத்தில் புதிதாக வீடு கட்ட துவங்கினார். 2 மாடியாக வீடு கட்டி முடிக்கப்பட்டுள்ளது. தனது மகளுக்காக கட்டிய கனவு இல்லத்தை அவர் ரசித்து ரசித்து கட்டியுள்ளார். பல்வேறு சொகுசு வசதிகள் செய்யப்ட்டுள்ளன. இந்நிலையில் தான் இவரது வீட்டு படங்கள் இணையதளங்களில் தீயாக பரவி வருகிறது. காரணம் என்னவெனில் இவர் வீட்டுக்கு வைத்த பெயர் தான்.

நரேந்திர மோடியின் பெயர்

அதாவது ஹாலேஸ் தனது மகளுக்காக ஆசையாக கட்டிய வீட்டுக்கு குடும்பத்தினர் யார் பெயரையும் வைக்கவில்லை. மாறாக பிரதமர் நரேந்திர மோடியின் பெயரை சூட்டியுள்ளார். அதாவது, வீட்டுக்கு ‛நரேந்திர மோடி நிலையம்' என பெயர் சூட்டியுள்ளார். இது கன்னட மொழியில் கல்வெட்டாக வீட்டின் முன்புறம் பதிக்கப்பட்டுள்ளது. மேலும் வீட்டின் நுழைவு பாதையில் பிரதமர் நரேந்திர மோடியின் புகைப்படத்தையும் அவர் பெரிதாக பதித்துள்ளார்.

நாளை மறுநாள் கிரகப்பிரவேஷம்

இந்த புதிய வீட்டின் கிரகப்பிரவேஷம் நாளை மறுநாள் நடைபெற உள்ளது. சன்னகிரி எம்எல்ஏ விருபாக்சப்பா வீட்டை திறந்து வைக்கிறார். ஹாலேஸ் மட்டுமின்றி அவரது மகள் புவேனஷ்வரியும் பிரதமர் நரேந்திர மோடியின் பற்றாளர் தான். குஜராத் முதல்வராக இருந்தபோதே நரேந்திர மோடியை அவர்கள் பின்தொடர்ந்து வந்துள்ளனர். இதனால் சமீபத்தில் கியாஸ் மானியத்தை விட்டு கொடுக்க நரேந்திர மோடி கூறிய நிலையில் முதல் ஆளாக ஹாலேஸ் அதை செய்து அவரது ஆதரவாளர் என்பதை நிரூபித்தார்.

என்ன சொல்கிறார் ஹாலேஸ்

இதுகுறித்து ஹாலேஸ் கூறுகையில், ‛‛வீட்டுக்கு சிவாஜி என பெயர் சூட்ட குடும்பத்தினர் விரும்பினர். ஆனால் அதில் எனக்கு விருப்பம் இல்லை. நான் பிரதமர் நரேந்திர மோடியின் தீவிர ஆதரவாளன். இதனால் புதிய வீட்டிற்கு அவரது பெயரை வைத்துள்ளேன். இதன்மூலம் நான் பெருமை அடைகிறேன்'' என்றார்.

Published On May 1, 2022