எடப்பாடி, ஓபிஎஸ்ஸால் கட்சியில் இருந்து நீக்கப்பட்ட உறுப்பினர்கள் 1,17,000 பேர்: கேசிபி சொன்ன கணக்கு!

Updated: Sunday, April 9, 2023, 15:58 [IST]

Subscribe to Oneindia Tamil

சென்னை : எடப்பாடி பழனிசாமி மற்றும் ஓ.பன்னீர்செல்வத்தால் அதிமுகவில் இருந்து நீக்கப்பட்ட உறுப்பினர்கள் மட்டுமே 1,17,000 பேர், தற்போது நிலவும் அசாதாரணமான சூழ்நிலையில் ஒன்றுபட்ட அதிமுக என்பது தான் காலத்தின் தேவை என கே.சி.பழனிசாமி தெரிவித்துள்ளார்.

அதிமுக கட்சிக் கட்டுப்பாட்டை மீறியதாக ஓபிஎஸ் - ஈபிஎஸ் இருவராலும் கூட்டாக கட்சியை விட்டு நீக்கப்பட்டவர் அதிமுக முன்னாள் எம்.பி கேசி பழனிசாமி. எம்.ஜி.ஆர் காலத்திலேயே எம்.எல்.ஏவாக இருந்த கேசி பழனிசாமி, அதிமுகவில் இருந்து நீக்கப்பட்ட நிலையில், தன்னை யாரும் கட்சியில் இருந்து நீக்க முடியாது எனக் கூறி, அதிமுக நிர்வாகி போலவே தற்போதும் மிகத் தீவிரமாகச் செயல்பட்டு வருகிறார்.

1,17,000 members were removed from the AIADMK by EPS OPS : says KC Palanisamy

தமிழ்நாடு முழுவதும் பயணித்து பல இடங்களில் ஆலோசனைக் கூட்டங்களை நடத்தி வருகிறார் கேசி பழனிச்சாமி. காணொளிக் காட்சி வாயிலாகவும் அவ்வப்போது தொண்டர்களுடன் அவ்வப்போது உரையாடி வருகிறார். அதிமுகவுக்கு தலைமை தாங்க ஓபிஎஸ், ஈபிஎஸ் இருவருக்குமே தகுதி இல்லை என்று தொடர்ந்து பேசி வருகிறார் கேசிபி.

எடப்பாடி பழனிசாமி தலைமையை விரும்பாத அதிமுக தொண்டர்களை ஒன்றிணைத்து, பொதுச்செயலாளர் தேர்தலை நடத்தப்போவதாக கூறியிருந்தார் கேசி பழனிசாமி. இந்நிலையில், அதிமுக வழக்குகளில் எடப்பாடி பழனிசாமிக்கு சாதகமான தீர்ப்புகள் வந்த நிலையில், அதிமுகவின் பொதுச் செயலாளராகப் பொறுப்பேற்றுள்ளார் ஈபிஎஸ். இதனால், கிட்டத்தட்ட எடப்பாடி பழனிசாமியின் கையில் வந்துள்ளது அதிமுக.

இந்நிலையில், இதுதொடர்பாக பேசியுள்ள கே.சி.பழனிசாமி, "அதிமுக என்பது எம்.ஜிஆரா உருவாக்கப்பட்ட திராவிடக் கட்சி. தொண்டர்களால் வலிமையான கட்சியாக உருவானது அதிமுக. குடும்ப ஆட்சிக்கும், லஞ்சம் - ஊழலுக்கும் எதிராகத் தொடங்கப்பட்ட கட்சி. தற்போது அதிமுக என்பது திராவிடமா - இந்துத்துவா கொள்கையா என்ற இரண்டிற்கும் இடையே மாட்டிக்கொண்டு விழிக்கிறது. தற்போதைய தலைமையிடம் கொள்கைத் தெளிவு இல்லை.

புதிய உறுப்பினர்கள் சேர்க்கை என்பது ஒருபுறமிருக்க எடப்பாடி பழனிசாமி மற்றும் ஓ.பன்னீர்செல்வம் ஆகிய இருவரால் கட்சியிலிருந்து நீக்கப்பட்ட உறுப்பினர்கள் மட்டுமே 1,17,000 பேர். மேலும் இருவரின் நடவடிக்கைகள் பிடிக்காமல் தாமாக கட்சியிலிருந்து விலகிய உறுப்பினர்களும் பலர். தற்போது நிலவும் அசாதாரணமான சூழ்நிலையில் ஒன்றுபட்ட அதிமுக என்பது தான் காலத்தின் தேவை" எனத் தெரிவித்துள்ளார்.