திமுக தேர்தல் அறிக்கைக்கு போட்டி.. 2021 இடைக்கால பட்ஜெட்.. சலுகைகளை அள்ளிவீசும் திட்டத்தில் அதிமுக.!
சென்னை: தமிழக அரசு தாக்கல் செய்யவுள்ள அடுத்தாண்டுக்கான இடைக்கால பட்ஜெட்டில் ஏராளமான சலுகைகளை அள்ளி வீச திட்டம் தயாராகி வருகிறது.
சட்டமன்றத் தேர்தலை கருத்தில் கொண்டு இடைக்கால பட்ஜெட் அறிவிப்புகள் வெளியாகும் என எதிர்பார்க்கப்படுகிறது.
திமுக தேர்தல் அறிக்கை தயாரிக்க குழு அமைத்துள்ள நிலையில் இடைக்கால பட்ஜெட்டை தயாரிக்க இ.பி.எஸ். தீவிரம் காட்டி வருகிறார்.
தனிக்குழு நியமனம்
தமிழகத்தில் இன்னும் 6 மாதங்களில் சட்டமன்றத் தேர்தல் நடைபெறவுள்ள நிலையில், தேர்தல் அறிக்கை தயாரிப்பதற்காக டி.ஆர்.பாலு எம்.பி. தலைமையில் திமுக குழு அமைத்துள்ளது. அந்தக் குழுவின் முதற்கட்ட ஆலோசனைக் கூட்டம் நடைபெற்று முடிந்துள்ள நிலையில் தேர்தல் அறிக்கையில் இடம்பெற வேண்டிய அம்சங்கள் குறித்து விவாதிக்கப்பட்டு வருகிறது.
மருத்துவம்
வழக்கமான தேர்தல் அறிக்கையாக இல்லாமல் இந்த முறை கல்வி மற்றும் மருத்துவத் துறைகளில் ஏராளமான அறிவிப்புகளும், வாக்குறுதிகளும் திமுக அளிக்கக்கூடும் எனத் தெரிகிறது. இதனை ஸ்மெல் செய்த முதலமைச்சர் எடப்பாடி பழனிசாமி தேர்தலுக்கு முன் தாக்கல் செய்யப்படும் இடைக்கால பட்ஜெட்டில் திமுகவுக்கு போட்டியாக எண்ணற்ற அறிவிப்புகளை வெளியிடும் திட்டத்தில் இருக்கிறார்.
அதிமுக ஆலோசனை
இதற்காக இடைக்கால பட்ஜெட்டில் இடம்பெற வேண்டிய விவகாரங்கள் குறித்து விரைவில் ஆலோசனைக் கூட்டங்களையும் நடத்த இருக்கிறார். சட்டமன்றத் தேர்தலில் இளைஞர்களின் வாக்குகளை ஈர்க்கும் வகையில் அவர்களை முன்னிறுத்தி இடைக்கால பட்ஜெட்டில் முக்கிய அறிவிப்புகள் வெளியிடவும் அதிமுக தரப்பில் ஆலோசிக்கப்பட்டு வருகிறது.
நிதி ஆதாரம்
இதனிடையே கூடுதல் நிதி கோருவதற்காக துணை முதல்வரும், நிதி அமைச்சருமான ஓ.பன்னீர்செல்வம் விரைவில் மத்திய நிதி அமைச்சர் நிர்மலா சீதாராமனை நேரில் சந்திப்பார் எனத் தெரிவிக்கப்படுகிறது. மேலும், டிசம்பர் மாதம் முதல் வாரத்தில் அதிமுக தேர்தல் அறிக்கை தயாரிப்பு குழு பற்றிய அறிவிப்பு வெளியாகும் எனத் தெரிகிறது.
Click it and Unblock the Notifications
Sign in with Google