வெறும் 7 நிமிடம் தான்.. முடிந்துபோன டிக்கெட் முன்பதிவு.. பொங்கல் சிறப்பு ரயிலுக்கு போட்டா போட்டி

சென்னை: பொங்கல் பண்டிகையையொட்டி சென்னையில் இருந்து ஏராளமான மக்கள் சொந்த ஊர் செல்ல உள்ளனர். இதற்காக பொங்கலுக்காக இருமார்க்கமாக 5 ஜோடி சிறப்பு ரயில்கள் இயக்கப்பட உள்ளன. இதற்கான டிக்கெட் முன்பதிவு இன்று காலை 8 மணிக்கு துவங்கியது. வெறும் 7 நிமிடத்தில் டிக்கெட்டுகள் அனைத்தும் முன்பதிவு செய்யப்பட்டன.

அடுத்த மாதம் பொங்கல் பண்டிகை கொண்டாடப்பட உள்ளது. இதற்காக சென்னையில் இருந்து தமிழ்நாட்டின் பிற இடங்கள் மற்றும் அண்டை மாநிலங்களில் உள்ள மக்கள் அதிகளவில் சொந்த ஊர் திரும்ப உள்ளனர்.

இதற்காக தெற்கு ரயில்வே சார்பில் சிறப்பு ரயில்கள் ஆண்டுதோறும் இயக்கப்படும். அதேபோல் இந்த ஆண்டும் சிறப்பு ரயில்கள் இயக்கப்படும் என அறிவிக்கப்பட்டுள்ளது.

5 ஜோடி சிறப்பு ரயில்

அதன்படி மொத்தம் 10 சிறப்பு ரயில்கள் இயக்கப்பட உள்ளது. அதன்படி தாம்பரம்-நெல்லை (06021), நெல்லை - சென்னை எழும்பூர் (06022), தாம்பரம்-நாகர்கோவில் (06041), நாகர்கோவில் -தாம்பரம் (06042), இருமார்க்கமாக கொச்சுவேலி -தாம்பரம் (060044/06043), எர்ணாகுளம் -டாக்டர் எம்ஜிஆர் சென்னை சென்ட்ரல் (06046/06045), தாம்பரம்-திருநெல்வேலி (06057/06058) என மொத்தம் 10 சிறப்பு ரயில்கள் இயக்கப்பட உள்ளன.

தாம்பரம்-திருநெல்வேலி சிறப்பு ரயில்

அதன்படி தாம்பரம் -திருநெல்வேலி (06021) சிறப்பு ரயில் ஜனவரி 12ம் தேதி தாம்பரத்தில் இருந்து இரவு 9 மணிக்கு புறப்பட்டு மாறுநாள் காலை 9 மணிக்கு திருநெல்வேலியை சென்றடையும். மறுமார்க்கமாக ஜனவரி 13ம் தேதி திருநெல்வேலியில் இருந்து மதியம் 1 மணிக்கு புறப்படும் சிறப்பு ரயில் (06022) மறுநாள் அதிகாலை 3.20 மணிக்கு சென்னை எழும்பூரை வந்தடையும்.

தாம்பரம்-நாகர்கோவில் சிறப்பு ரயில்

மேலும் தாம்பரம்-நாகர்கோவில் சூப்பர் பாஸ்ட் சிறப்பு கட்டண சிறப்பு ரயில் (06041) ஜனவரி 13ம் தேதி தாம்பரத்தில் இருந்து புறப்பட்டு மறுநாள் காலை 7.10 மணிக்கு நாகர்கோவிலை சென்றடையும். அதன்பிறகு நாகர்கோவில்-தாம்பரம் சூப்பர் பாஸ்ட் சிறப்பு கட்டண சிறப்பு ரயில் (06042) மறுமார்க்கமாக ஜனவரி 16ம் தேதி மாலை 5.10 மணிக்கு நாகர்கோவிலில் இருந்து புறப்பட்டு மறுநாள் காலை 7.30 மணிக்கு தாம்பரத்தை வந்தடையும்.

சிறப்பு கட்டண ரயில்

மேலும் தாம்பரம்-திருநெல்வேலி சிறப்பு கட்டண சிறப்பு ரயில் (06057) ஜனவரி 16ம் தேதி இரவு 10.30 மணிக்கு தாம்பரத்தில் இருந்து புறப்பட்டு மறுநாள் காலை 9 மணிக்கு திருநெல்வேலியை சென்றடையும். மறுமார்க்கமாக ஜனவரி 17 ல் திருநெல்வேலியில் இருந்து இரவு 10.30 மணிக்கு புறப்படும் சிறப்பு கட்டண சிறப்பு ரயில் (06058) மறுநாள் காலை 9.20 மணிக்கு தாம்பரத்தை வந்தடையும்.

எர்ணாகுளம்-சென்னை சென்ட்ரல் சிறப்பு ரயில்

எர்ணாகுளம் -டாக்டர் எம்ஜிஆர் சென்னை சென்ட்ரல் சிறப்பு ரயில் (06046) ஜனவரி 12ம் தேதி எர்ணாகுளத்தில் இருந்து நள்ளிரவு 11.20 மணிக்கு புறப்பட்டு மறுநாள் காலை 11.30 மணிக்கு சென்னை சென்ட்ரல் ரயில் நிலையத்தை வந்தடையும். மறுமார்க்கமாக டாக்டர் எம்ஜிஆர் சென்னை சென்ட்ரல் - எர்ணாகுளம் சிறப்பு ரயில் (06046) ஜனவரி 13ம் தேதி மதியம் 2.50 மணிக்கு சென்னை சென்ட்ரலில் இருந்து புறப்பட்டு மறுநாள் அதிகாலை 3.10 மணிக்கு எர்ணாகுளத்தை சென்றடைய உள்ளது.

கொச்சுவேலி-தாம்பரம் சிறப்பு ரயில்

கொச்சுவேலி-தாம்பரம் சிறப்பு ரயில் (06044) ஜனவரி 17 ம் தேதி கொச்சுவேலியில் இருந்து புறப்பட்டு மறுநாள் காலை 6.20 மணிக்கு தாம்பரம் வந்தடையும். மறுமார்க்கமாக ஜனவரி 18 ல் காலை 10.30 மணிக்கு தாம்பரத்தில் இருந்து புறப்படும் தாம்பரம் - கொச்சுவேலி சிறப்பு ரயில் (06043) மறுநாள் அதிகாலை 3.20 மணிக்கு கொச்சுவேலியை சென்றடையும்.

7 நிமிடத்தில் முடிந்த டிக்கெட் பதிவு

இந்த சிறப்பு ரயில்களுக்கான டிக்கெட் முன்பதிவு இன்று காலை 8 மணிக்கு துவங்கி நடைபெற உள்ளது என்று தெற்கு ரயில்வே சார்பில் அறிவிப்பு வெளியிடப்பட்டது. இதையடுத்து பலரும் போட்டிப்போட்டு கொண்டு டிக்கெட் முன்பதிவு செய்தனர். இதனால் வெறும் 7 நிமிடத்தில் அனைத்து டிக்கெட்டுகளும் முன்பதிவு செய்யப்பட்டது.

English summary

A large number of people from Chennai are going to their hometown on the occasion of Pongal. For this, 5 pairs of special trains will be run for Pongal in both directions. Southern Railway has announced that ticket booking for this will be held from 8 am today.